មន្ត្រីជាន់ខ្ពស់នៃក្រសួងវប្បធម៌និងវិចិត្រសិល្បៈ ការបំផុសស្មារតីអ្នកបន្តវេន ពិសេសយុវជន ឲ្យយល់ដឹងអំពីតម្លៃពិតនៃវប្បធម៌ ដ៏សម្បូរបែបរបស់ដូនតា ដែលបានបន្សល់ទុកមក ជាមួយនឹងបញ្ហាប្រឈមក្នុងយុគសម័យសាកលភាវូបនីយកម្ម កំពុងកើតមានក្នុងវិស័យវប្បធម៌ជាតិ!
បច្ចុប្បន្ននេះ វប្បធម៌ ប្រពៃណីខ្មែរ កំពុងជួបបញ្ហាប្រឈមចំពោះមុខ ហើយក៏កំពុងទទួលការរងគ្រោះជាងមុនផងដែរ អាស្រ័យដោយមានកង្វះខាតការចូលរួមថែរក្សា និង ទប់ស្កាត់នូវឥទ្ធិពលអាក្រក់នៃវប្បធម៌បរទេស ដែលកំពុងទាក់ទាញតាមរយៈសម្ភារៈទំនើបនិយម បានជ្រាបចូលយ៉ាងខ្លាំងក្នុងយុគសម័យសាកលភាវូបនីយកម្ម ដែលបង្កើតជាផលអវិជ្ជមាន និង វិជ្ជមានផង ក្នុងវិស័យវប្បធម៌របស់ជាតិ ។
លោកជំទាវ ម៉ិញ កុសនី រដ្ឋលេខាធិការក្រសួងវប្បធម៌ និង វិចិត្រសិល្បៈ មានប្រសាសន៍យ៉ាងដូច្នេះនាល្ងាចថ្ងៃទី២៧ ខែមីនា ឆ្នាំ២០១៩ នៅទីក្រុងវប្បធម៌ប្រវត្តិសាស្ត្រអង្គរសៀមរាប ក្នុងពិធីអបអរសាទរ ( ទិវាវប្បធម៌ជាតិ ៣មីនា ) លើកទី២១ ឆ្នាំ២០១៩ ក្រោមប្រធានបទ យុវជនដើម្បីវប្បធម៌ជាតិ និងបើកមហោស្រពសិល្បៈជាតិ ល្ខោនស្រមោលស្បែកធំ លើកទី២ ឆ្នាំ២០១៩ ។
លោកជំទាវបញ្ជាក់ថា ដើម្បីដោះស្រាយលើវិបត្តិនៃការព្រួយបារម្ភ ដូចដែលមានបញ្ហាប្រឈមខាងលើ ជារៀងរាល់ឆ្នាំ ក្រសួងវប្បធម៌ និងវិចិត្រសិល្បៈ តែងតែបានប្រមូលនូវគ្រប់មធ្យោបាយ ផ្តួចផ្តើមគំនិត បំផុសចលនាសិល្បៈទូទាំងប្រទេស រួមទាំងសិល្បៈមហាជននានាទាំងក្នុង និងក្រៅប្រទេស ដើម្បីរួមគ្នាស្វែងរកគន្លឺះនិងចាត់វិធានការ ជួយទ្រទ្រង់និងសង្គ្រោះនូវរាល់ទម្រង់បេតិកភណ្ឌអរូបីយទាំងឡាយ ដែលកំពុងប្រឈមនឹងការបាត់បង់ ឲ្យស្ថិតក្នុងស្ថានភាពរស់រវើក តាមរយៈនៃការរៀបចំបើកមហោស្រព ដើម្បីបង្ហាញនូវតម្លៃបេតិកភណ្ឌកេដំណែលដូនតា និង អប់រំផ្សព្វផ្សាយឲ្យបានទូលំទូលាយក្នុងស្រទាប់មហាជន ជាពិសេស គឺ យុវជន ដើម្បីរួមគ្នាគាំទ្រ ថែរក្សាការពារ នូវទម្រង់បេតិកភណ្ឌសិល្បៈអរូបិយ ឲ្យស្ថិតស្ថេរគង់វង្សតទៅ ។
លោកជំទាវ គូសបញ្ជាក់ថា ការប្រារព្ធទិវាវប្បធម៌ជាតិលើកទី២១ឆ្នាំនេះ ក្រោមប្រធានបទ យុវជនដើម្បីវប្បធម៌ជាតិ និង បើកមហោស្រពសិស្បៈ ល្ខោនស្រមោលស្បែកធំ លើកទី២ ឆ្នាំ២០១៩ គឺផ្តោតជាសំខាន់ទៅលើ ការបន្តលើកកម្ពស់ស្មារតីប្រជាជន មហាជន ជាពិសេសគឺយុវជន ដែលជាអ្នកបន្តវេន ឲ្យកាន់តែមានការយល់ដឹង អំពីតម្លៃពិតនៃវប្បធម៌ជាតិដ៏សម្បូរណ៍បែប ដែលជាមរតកដូនតាបានបន្សល់ទុកឲ្យ ។
ល្ខោនស្រមោលស្បែកធំនៅប្រទេសកម្ពុជា ជាប្រភេទសិល្បសក្ការៈ ព្រោះល្ខោនស្រមោលស្បែកធំ សម្តែងតែរឿងរាមកេរ្ត៍តែមួយប៉ុណ្ណោះ ដែលជាទេវកថាបង្ហាញអំពីមហិទ្ធរឹទ្ធិព្រះរាមអវតានៃព្រះនរាយណ៍ ជាសិល្បៈបូរាណខ្មែរមានកំណើតតាំងពីសតវត្សរ៍ទី៦មកម្លេះ និងជាទម្រង់សិល្បៈមានសុក្រឹតភាព បានចាក់ឬសយ៉ាងជ្រៅក្នុងសង្គមខ្មែរ ។ ល្ខោនស្រមោលស្បែកធំ ត្រូវអង្គការយូណេស្កូ ប្រកាសទទួលស្គាល់ជាស្នាដៃឯក នៃ មរតកវប្បធម៌អរូបិយរបស់ពិភពលោក នៅថ្ងៃទី២៥ ខែវិច្ឆកា ឆ្នាំ២០០៥ នៅទីក្រុងប៉ារីស ប្រទេសបារាំង ៕
អត្ថបទ និងរូបភាព៖ លោក ងិន គឹមឡេង
