នៅទីបញ្ជាការដ្ឋានយោធភូមិភាគទី១ ខេត្តស្ទឹងត្រែង នៅថ្ងៃទី២៧ ខែមីនា ឆ្នាំ២០១៩ ឯកឧត្តម វង សូត រដ្ឋមន្ត្រីក្រសួងសង្គមកិច្ច និងលោកជំទាវ បានអញ្ចើញជាអធិបតី ក្នុងពិធីសំណេះសំណាល សួរសុខទុក្ខ នាយទាហាន ពលទាហា នៅទីបញ្ជាការដ្ឋានយោធភូមិភាគទី១ ខេត្តស្ទឹងត្រែង។
មានប្រសាសន៍ក្នុងពិធីសំណេះសំណាល ឯកឧត្តម វង សូត រដ្ឋមន្ត្រីសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា ឆ្លើយតបទៅនិង អនុសាសន៍ដ៏ថ្លៃថ្លា ពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានជំរុញឲ្យគ្រប់ក្រសួង ស្ថាប័ន ធ្វើយ៉ាងណា បង្កើនភាពភាពស្និតស្នាល កក់ក្តៅជា នាយកទាហាន ពលទាហាន ដែលកំពុងបម្រើការឈរជើងទៅតាម ភូមិភាគ និងកំពុងឈរជើងតាមខ្សែបន្ទាត់ព្រំដែន ពិសេសនោះក្នុងឪកាសពិធីចូលឆ្នាំប្រពៃណីជាតិខ្មែរដែលខិតជិតមកដល់ខាងមុខ។
ឯកឧត្តម វង សូត រដ្ឋមន្ត្រី សង្គមកិច្ច យុទ្ធជន និងយុវនីតិសម្បទា បានមានប្រសាសន៍ថា កងយោធពលខេមរៈភូមិន្ទ ក៏ដូចជាកម្លាំងប្រដាប់អាវុធទាំងអស់ ដែលជាកម្លាំងស្នូល ក្នុងការការពារសន្តិសុខសណ្តាប់ និងសុវត្តិភាពប្រទេសជាតិ ព្រមទាំងបានរួមចំណែកយ៉ាងច្រើនក្នុងការការការពារស្ថេរភាពនយោបាយនៅកម្ពុជា។
ឯកឧត្តមបន្តថាការអភិវឌ្ឍន៍រីកចំរើនរបស់ប្រទេសកម្ពុជានាពេលបច្ចុប្បន្ននេះ ពិតជាមិនអាចផ្តាច់បានពីកងទ័ព្ទ កងកម្លាំងប្រដាប់អាវុធគ្រប់ប្រភេទ ព្រោះ កងកម្លាំងប្រដាប់អាវុធនេះជាគ្រឹះដ៏រឹងមាំសម្រាប់ការកសាងសន្តិភាព សន្តិសុខសណ្តាប់ធ្នាប់ ស្ថេរភាពនយោបាយ និងការអភិវឌ្ឍន៍នៅកម្ពុជា។
ឯកឧត្តមរដ្ឋមន្ត្រីក្រសួងសង្គមកិច្ចអតីតៈយុទ្ធជននិងយុវនីតិសម្បទាបានក្រើនរំលឹកដល់កងទ័ព្ទទាំងអស់ត្រូវក្តាប់ឲ្យជាប់នូវប្រសាសន៍របស់សម្តេចអគ្គមហា សេនាបតីតេជោហ៊ុន សែន នាយករដ្ឋមន្ត្រី ដែលក្នុងរយះពេលកន្លងមកនេះ សម្តេចបានចូលរួមអបអរសាទរខួបទី២០នៃការបង្កើកងទ័ពជើងគោក ក្នុងនោះសម្តេចបានផ្តល់អនុសាសន៍១០ចំនុច ជាពិសេស ត្រូវបន្តពង្រឹងសាមគ្គីភាពផ្ទៃក្នុង ដើម្បីយើងរក្សាបាននូវសុខសន្តិភាព សណ្តាប់ ធ្នាប់សាធារណៈជូនជាតិមាតុភូមិ ព្រមទាំងត្រូវការពារឲ្យបានគត់មត់ និងផ្តល់នូវទំនុកចិត្ត និងជំនឿជឿជាក់របស់ប្រជាជនយើង នោះទើបហៅថាជោគជ័យគ្រប់កិច្ចការទាំងអស់របស់ប្រទេសជាតិ ។
ឆ្លៀតក្នុងឪកាសនោះ ឯកឧត្តមរដ្ឋមន្ត្រី និងលោកជំទាវ បានឧបត្ថម្ភដល់បញ្ជាការដ្ឋានយោធភូមិភាគទី១មានដូចជា៖
១.ស្រាបៀរ ២០០កេស សម្រាប់ពិធីបាយសាមគ្គី
២.ទឹកក្រូច ២០០កេស
៣. មី ១០០កេស
៤. ត្រីខ ១០កេស និងឧបត្ថម្ភដល់នាយទាហាន ពលទាហាន១១៤៥នាក់ ក្នុងមួយនាក់ៗ ទទួលបានថវិកា ៥០.០០០រៀល និងឧបត្ថម្ភថវិកាចំនួន ២០លានរៀល សម្រាប់ចូលរួមចំណែកអភិវឌ្ឍសំណង់អគារក្នុងបញ្ជាការដ្ឋានយោធភូមិភាគទី១ផងដែរ៕
អត្ថបទ និងរូបភាព៖ មន្ទីរព័ត៌មានស្ទឹងត្រែង
