នៅថ្ងៃទី២៨ ខែមីនា ឆ្នាំ២០១៩ គណៈប្រតិភូគណៈកម្មការទី១ព្រឹទ្ធសភា បានជួបសំណេះសំណាលជាមួយក្រុមប្រឹក្សាខេត្ត គណៈអភិបាលខេត្ត មន្ទីរ អាជ្ញាធរ អង្គភាព និងស្ថាប័នពាក់ព័ន្ធក្នុងខេត្តសៀមរាប ដើម្បីស្វែងយល់អំពីការអនុវត្តសិទ្ធមនុស្ស ការដោះស្រាយពាក្យបណ្តឹងរបស់ប្រជាពលរដ្ឋ សិទ្ធទទួលបានការជុំនំជុំរះក្តីដោយយុត្តិធម៌ និងបញ្ហាអ្នកជាប់ឃុំលើសនីតិវិធី ស្ថានភាពនៃការអនុវត្តក្រមទាំង៤ បញ្ហាប្រឈម និងការលំបាក ព្រមទាំងសំណូមពរនានារបស់អាជ្ញាធរខេត្ត និង អង្គភាពចំណុះខេត្ត ដែលជួបប្រទះក្នុងការអនុវត្តការងារកន្លងមក ។
មានប្រសាសន៍ក្នុងកិច្ចសំណេះសំណាលនោះ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានធ្វើសេចក្តីរាយការណ៍ថា ស្ថានភាពភូមិសាស្ត្រ សន្តិសុខ សេដ្ឋកិច្ចរបស់ខេត្ត នាឆ្នាំ២០១៨ ព្រមទាំងកិច្ចអភិវឌ្ឍន៍របស់ខេត្ត បានផ្តោតសំខាន់ទៅលើវិស័យកសិកម្ម និង ទេសចរណ៍ ក្នុងនោះខេត្តសៀមរាប ជាតំបន់ប្រមូលផ្តុំ ទៅដោយភ្ញៀវទេសចរណ៍ មកពីគ្រប់មជ្ឈដ្ឋាននានានៅលើពិភពលោក ចូលមកទស្សនាកម្សាន្ត រួមនឹងសមទ្ធិផលដែលខេត្តសម្រេចបានកន្លងមក និង បញ្ហាប្រឈមមួយចំនួន ដែលខេត្តបានជួបប្រទះ និងកំពុងបន្តធ្វើការដោះស្រាយ ។
មានប្រសាសន៍នាឱកាសនោះ ឯកឧត្តម យ៉ង់ សែម ប្រធានគណៈកម្មការទី១ព្រឹទ្ធសភា ក៏បានគូសបញ្ជាក់ផងដែរថា ដំណើរចុះមកបំពេញបេសកកម្មនៅខេត្តសៀមរាបនាពេលនេះ គណៈប្រតិភូបានចុះជួបធ្វើការសំណេះសំណាលជាមួយបងប្អូន ក្រុមប្រឹក្សាសង្កាត់ទាំង ១២ របស់ក្រុងសៀមរាប ដោយពួកគាត់បានលើកនូវសំណូមពរមួយចំនួន ដោយផ្តោត សំខាន់ ទៅលើការរស់នៅ និង ទុក្ខលំបាករបស់ប្រជាពលរដ្ឋ នៅក្នុងតំបន់គ្រប់គ្រង ដោយអាជ្ញាធរជាតិអប្សរា រួមទាំងការផ្តល់នូវបណ្ណកម្មសិទ្ធិសម្គាល់អចលនទ្រព្យមានការយឺតយ៉ាវ , បញ្ហាគ្រឿង ញៀន ,បញ្ហាសំណង់អាណាធិបតេយ្យនៅលើដីចំណីផ្លូវ និង ផ្លូវសាធារណៈ ព្រមទាំងសំណូមពរមួយចំនួនទៀត ដែលក្រុមប្រតិភូទទួល បានក្នុងដំណើរបំពេញបេសកកម្មនាពេលនេះ។ ក្នុងនោះឯកឧត្តមក៏បានលើកផងដែរ អំពីការអនុវត្តច្បាប់ និង ការដោះស្រាយរាល់បញ្ហាវិវាទរបស់ប្រជាពលរដ្ឋ ។
ជាមួយគ្នានោះ អាជ្ញាធរក្រុង អាជ្ញាធរជាតិអប្សរា បានធ្វើការបកស្រាយថា ជាការពិត ការអនុវត្តច្បាប់ ក្នុងតំបន់គ្រប់គ្រងដោយអាជ្ញាធរជាតិអប្សរា បានធ្វើឲ្យប៉ះពាល់ដល់ផ្លូវចិត្ត និង ផលប្រយោជន៍របស់ប្រជាពលរដ្ឋ ដែលរស់នៅ និង ប្រកបរបរចិញ្ចឹមជីវិតនៅក្នុងតំបន់នោះ ដូចជា ការមិនអនុញ្ញាតឲ្យសាងសង់លំនៅដ្ឋានថ្មី គឺមានសិទ្ធត្រឹមធ្វើការជួសជុលលំនៅដ្ឋាន និង ត្រូវសុំការអនុញ្ញាតពីអាជ្ញាធរជាតិអប្សរាជាមុន ការអនុវត្តច្បាប់នេះ ដោយសារនេះគឺជាតំបន់បុរាណដ្ឋាន អ្នកជំនាញអាចនឹងបាត់បង់នូវសំណៅសំខាន់ផ្សេងៗ នៅពេលប្រជាពលរដ្ឋ ជីកកាប់គាស់ដីក្នុងបរិវេណលំនៅដ្ឋានរបស់ពួកគាត់ មួយវិញទៀតវាធ្វើឲ្យប៉ះពាល់បរិស្ថាន ក្នុងតំបន់ប្រាសាទនានាផងដែរ។ មួយវិញទៀត ការអនុវត្តច្បាប់នេះ ក៏មាននៅតំបន់មួយចំនួនក្រៅពីតំបន់គ្រប់គ្រងដោយអាជ្ញាធរជាតិអប្សរាផងដែរ ដូចជា តំបន់ដែលអាចដែលមានទីទួលបុរាណដ្ឋាន និង បឹងបុរាណ ។ល។ ដោយឡែក រាល់ការផ្តល់នៅប័ណ្ណកម្មសិទ្ធិសម្គាល់អចលនទ្រព្យ នៅមានការយឺតយ៉ាវ ដោយសារការបំពេញបែបបទលិខិតស្នាមមិនត្រឹមត្រូវ និង ប៉ះពាល់ តំបន់ទីទួលបុរាណដ្ឋាន និង ដីស្ថិតនៅក្នុងចំណាត់ការរបស់តុលាការ ព្រមទាំងបញ្ហាទំនាស់ និង មិនទទួលស្គាល់ការកំណត់ដីផ្លូវជាដើម ។ ក្នុងនោះ ប្រជាពលរដ្ឋមួយចំនួន ដែលរស់នៅលើដីចំណីផ្លូវ ដីគម្រោងផ្លូវ នៅពេលអាជ្ញាធរចុះធ្វើការរុះរើ បានធ្វើការទាមទារនូវសំណង នៃផលប៉ះពាល់ទៀតផង ។
ក្នុងនោះដែរឯកឧត្តម ទៀ សីហា ក៏បានគូសបញ្ជាក់ថា រាល់បញ្ហាដែលមានកើតនៅក្នុងខេត្តសៀមរាប អាជ្ញាធរខេត្តបានធ្វើការ ដោះស្រាយជាបន្តបន្ទាប់ ហើយមួយចំនួនបានកំពុងបន្តធ្វើការដោះស្រាយ ទាំងក្នុងប្រព័ន្ធតុលាការ និង ក្រៅប្រព័ន្ធតុលាការ ។
ឯកឧត្តមក៏បានបន្តទៀតថា ចំពោះបញ្ហាគ្រឿងញៀន នាពេលកន្លងមកកម្លាំងសមត្ថកិច្ចបានធ្វើការទប់ស្កាត់ និងបានធ្វើការការបង្ក្រាបជាបន្តបន្ទាប់ ដើម្បីធានាសន្តិសុខ សុវត្ថិភាពជូនដល់ ប្រជាពលរដ្ឋ និង ភ្ញៀវទេសចរណ៍ ។
ចំពោះបញ្ហាអាជ្ញាធរជាតិអប្សរា មិនអនុញ្ញាតឲ្យប្រជាពលរដ្ឋធ្វើការសាងសង់លំនៅដ្ឋាន នៅក្នុង តំបន់រមណីយដ្ឋានប្រាសាទអង្គរនោះ ដោយសារប្រាសាទអង្គរត្រូវបានចុះបញ្ជីជាសម្បត្តិបេតិកភណ្ឌពិភពលោក ជាសម្បត្តិវប្បធម៌របស់មនុស្សជាតិលើពិភពលោក ដូច្នេះអាជ្ញាធរត្រូវគោរពតាមគោលការណ៍ដែលបានកំណត់ក្នុងខ្លឹមសារនៃការចុះបញ្ជីនេះ មួយវិញទៀត រាជរដ្ឋាភិបាលកម្ពុជា បានលើកឡើងថា ប្រាសាទអង្គរវត្ត ជាមេមាន់ពងមាស ព្រមទាំងធ្វើការអភិរក្ស និង អភិវឌ្ឍន៍ ទៅជាតំបន់ទេសចរណ៍ មាសបៃតងទៀតផង ។
រីឯការអនុវត្តច្បាប់នៅតាមពន្ធនាគារវិញ ឯកឧត្តមអភិបាលខេត្ត ក៏បានបញ្ជាក់ផងដែរថា នៅក្នុងពន្ធនាគារខេត្តសៀមរាប អ្នកទោស ៧០ភាគរយ គឺជាពិរុទ្ធជនករណីគ្រឿងញៀន ដែលមានចំនួនលើសលប់គួឲ្យមានការព្រួយបារម្មណ៍ ។
បន្ទាប់ពីជួបសំណេះសំណាលពិភាក្សាប្រកបដោយ កិច្ចសហការខ្ពស់នាពេលនោះ ឯកឧត្តម យ៉ង់ សែម ក៏បានធ្វើការថ្លែងនូវអំណរគុណ ចំពោះអាជ្ញាធរខេត្តសៀមរាប ដែលបានផ្ដល់របាយការណ៍ទៅតាមការរំពឹងទុក ក្នុងដំណើរបេសកកម្មសិក្សាស្វែងយល់របស់គណៈប្រតិភូគណៈកម្មការទី១ព្រឹទ្ធសភា នៅក្នុងខេត្តសៀមរាបនាពេលនេះ។
អត្ថបទ និងរូបភាព៖ លោក ខេង ឧត្តម
កែសម្រួលអត្ថបទ៖ លោក សេង ផល្លី
