ថ្លែងនៅក្នុងពិធីបើកវគ្គបណ្តុះបណ្តាល ស្តីពីការគ្រប់គ្រងធនធានមនុស្សតាមប្រព័ន្ធព័ត៌មានវិទ្យា នៅខេត្តសៀមរាប ថ្ងៃទី២៥ខែមីនាឆ្នាំ២០១៩ឯកឧត្តម នុត ច័ន្ទសុខា រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា៖វគ្គបណ្តុះបណ្តាល ស្តីពីការគ្រប់គ្រងធនធានមនុស្សតាមប្រព័ន្ធព័ត៌មានវិទ្យា ហៅកាត់ថា HRMIS ដែលជាប្រធានបទដ៏មានសារៈសំខាន់ និងជាយន្តការស្នូលក្នុងការគាំទ្រដល់ដំណើរការអភិបាលកិច្ចល្អរបស់អង្គភាពនីមួយៗ ក្រោមឱវាទក្រសួងកសិកម្ម រុក្ខាប្រមាញ់ និងនេសាទ។
ម្យ៉ាងវិញទៀតការរៀបចំឲ្យមានវគ្គបណ្តុះបណ្តាល នាពេលនេះ បានបង្ហាញអំពីការយកចិត្តទុកដាក់ និងគាំទ្រយ៉ាងពេញទំហឹង ចំពោះការអភិវឌ្ឍន៍ និងគ្រប់គ្រងធនធានមនុស្សក្នុងវិស័យកសិកម្ម ដែលដាក់ចេញឲ្យអនុវត្តក្នុចំណោមកម្មវិធីអាទិភាពទី៥ របស់ក្រសួងកសិកម្ម រុក្ខាប្រមាញ់ និងនេសាទ នឹងចូលរួមគាំទ្រផងដែរនូវកម្មវិធីជាតិកំណែទម្រង់រដ្ឋបាល សាធារណៈ របស់រាជរដ្ឋាភិបាលកម្ពុជា។
ឯកឧត្តម បន្តថា៖វគ្គបណ្តុះបណ្តាលនេះ នឹងជួយឱ្យអ្នកដែលមាន តួនាទីគ្រប់គ្រង និងដឹកនាំអង្គភាព/មន្ទីរ យល់ច្បាស់ពីគោលបំណង មុខងារនិងធាតុសំខាន់ៗ លក្ខណៈសម្បត្តិនៃការប្រើប្រាស់ប្រព័ន្ធ កត្តាជោគជ័យនៃការអនុវត្ត សារៈប្រយោជន៍ និងរបៀបរបបនៃការប្រើប្រាស់ប្រព័ន្ធ HRMIS ដើម្បីយកទៅអនុវត្តឲ្យមានប្រសិទ្ធភាព នៅតាមអង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ។
ឯកឧត្តម នុត ច័ន្ទសុខា បញ្ជាក់ទៀតថា៖នៅក្នុងចតុកោណទី៤ នៃយុទ្ធសាស្ត្រចតុកោណដំណាក់ទី៤ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត និងឈ្លាសវៃបំផុតរបស់ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងយុគ-សម័យសេដ្ឋកិច្ចពុទ្ធិ និងបច្ចេកវិទ្យាព័ត៌មាន បានកំណត់យ៉ាងច្បាស់ថា ការកសាងសមត្ថភាព និងការអភិវឌ្ឍធនធានមនុស្សប្រកបដោយសមត្ថភាព និងគុណធម៌ គឺជាកត្តាគន្លឹះសម្រាប់ទ្រទ្រង់កំណើនសេដ្ឋកិច្ច និងភាពប្រកួតប្រជែងរបស់ប្រទេសទាំងក្នុងពេលចំពោះមុខ ទាំងសម្រាប់អនាគត។
ឯកឧត្តម រដ្ឋលេខាធិការប្រចាំការសង្កត់ធ្ងន់ថា៖ពិតណាស់ ទោះជាអង្គភាពរដ្ឋ ឬវិស័យឯកជនក្តី ជាមូលដ្ឋានគ្រឹះដំបូងចាំបាច់ត្រូវតែមាន ផែនការធនធានហិរញ្ញវត្ថុ និងធនធានមនុស្សល្អ។ ប៉ុន្តែការមានតែផែនការធនធានហិរញ្ញវត្ថុ និងធនធានមនុស្សល្អ ក៏នៅមិនទាន់គ្រប់គ្រាន់ដែរ តែត្រូវមានការដឹកនាំ និងចាត់ចែងល្អ ទើបអង្គភាព ឬក្រុមហ៊ុនមួយដំណើរការ និងអភិវឌ្ឍន៍ទៅមុខបានដោយជោគជ័យ។ ការដឹកនាំ និងគ្រប់គ្រងធនធានមនុស្សប្រកបដោយតម្លាភាព ប្រសិទ្ធភាព ត្រូវមានការចូលរួមចាត់ចែង និងគ្រប់គ្រងការងារយ៉ាងសកម្មពីធនធានមនុស្សក្រោមបង្គាប់។
ដូច្នេះ ក្បាលម៉ាស៊ីនដឹកនាំ និងបុគ្គលិក ឬមន្ត្រីថ្នាក់ក្រោម ជាសរសៃឈាមប្រទាក់ក្រឡាគ្នា និងមានចលនាសកម្មបំផុត ហើយវាជាធាតុពីរមិនអាចខ្វះគ្នាបានឡើយ។ក្បាលម៉ាស៊ីនដឹកនាំ ដែលជាទូទៅគេហៅថាមេ នោះ ត្រូវមានទេពកោសល្យក្នុងការដឹកនាំ ការគ្រប់គ្រង និងការប៉ិនប្រសប់ក្នុងប្រើប្រាស់មនុស្សឱ្យអស់សក្តានុពល ដោយមិនលំអៀង។
ក្នុងសេចក្តីរាយការណ៍របស់លោក ទី ចាន់ណា ប្រធាននាយកដ្ឋានបុគ្គលិកនិងអភិវឌ្ឍន៍ធនធានមនុស្ស នៃក្រសួងកសិកម្ម រុក្ខាប្រមាញ់និងនេសាទ ថា៖វគ្គបណ្តុះបណ្តាល ស្តីពីការគ្រប់គ្រងធនធានមនុស្សតាមប្រព័ន្ធព័ត៌មានវិទ្យា សម្រាប់ឆ្នាំ២០១៩នេះ មានចំនួន០៤វគ្គ គឺធ្វើនៅខេត្តសៀមរាប ចំនួន២វគ្គ ខេត្តកំពង់ចាម ០១វគ្គ និងនៅខេត្តកំពត ០១វគ្គ។
សម្រាប់ខេត្តសៀមរាបមានរយៈពេលបីថ្ងៃពីថ្ងៃទី២៥ដល់ថ្ងៃទី២៧ខែមីនាឆ្នាំ២០១៩ ជាវគ្គទី១ ដោយមានសិក្ខាកាមចូលរួមជាថ្នាក់ដឹកនាំអង្គភាព ថ្នាក់ដឹកនាំមន្ទីរ និងការិយាល័យ រដ្ឋបាល បុគ្គលិក សរុបចំនួន៤៦នាក់ មកពីអង្គភាពថ្នាក់កណ្តាល ចំនួន០៥អង្គភាព និងមន្ទីរកសិកម្ម រុក្ខាប្រមាញ់ និងនេសាទខេត្ត ចំនួន០៧មន្ទីរ គឺ ខេត្តកំពង់ចាម ព្រះវិហារ ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ និងខេត្តបៃលិន។
សូមជំរាបថា៖នាយកដ្ឋានបុគ្គលិកនិងអភិវឌ្ឍន៍ធនធានមនុស្ស នៃក្រសួងកសិកម្ម រុក្ខាប្រមាញ់និងនេសាទបានរៀបចំវគ្គបណ្តុះបណ្តាលធ្វើឡើងនៅសណ្ឋាគាររីជិនស៊ីអង្គរខេត្តសៀមរាបក្នុងគោលបំណងដើម្បីពង្រឹងសមត្ថភាពការគ្រប់គ្រងមន្ត្រីរាជការតាមប្រព័ន្ឋព័ត៌មានវិទ្យាឱ្យថ្នាក់ដឹកនាំអង្គភាព មន្ទីរ និងការិយាល័យរដ្ឋបាលបុគ្គលិក បានយល់ដឹងបន្ថែម ពាក់ព័ន្ឋទៅនឹងវិធាននិងនិតិវិធីការអនុវត្តន៍ ប្រើប្រាស់ប្រព័ន្ឋគ្រប់គ្រងមន្ត្រីរាជ តាមប្រព័ន្ឋព័ត៌មានវិទ្យានិងយកទៅអនុវត្តឱ្យមានប្រសិទ្ឋភាពនៅតាមអង្គភាពក្រោមឱវាទក្រសួងកសិកម្មរុក្ខាប្រមាញ់និងនេសាទ សំដៅជំរុញការចូលរួមអនុវត្តកំណែទម្រង់រដ្ឋបាលសាធារណៈ របស់រាជរដ្ឋាភិបាល។
អត្ថបទ និង រូបថត : លោក យូ វង្ស
