អភិបាលរងខេត្តសៀមរាប ដឹកនាំក្រុម ក្រុមគ្រូពេទ្យស្ម័គ្រចិត្ត មកពីមន្ទីរពេទ្យចិន រស្មីអង្គរ ខេត្តសៀមរាប ចំនួន ០៨នាក់ រួមជាមួយវេជ្ជបណ្ឌិតចំនួន ០៣នាក់មកពី នៃសាធារណរដ្ឋ ប្រជាមានិតចិន ដើម្បីពិនិត្យ និងព្យាបាល ដោយឥតគិតថ្លៃ ជូនដល់ប្រជាពលរដ្ឋ ក្នុងឃុំត្បែង ស្រុកបន្ទាយស្រី ខេត្តសៀមរាប។
តាមការបញ្ជាក់របស់ ប្រធានការិយាល័យកុងស៊ុលចិន ប្រចាំនៅខេត្តសៀមរាប បានឲ្យដឹងថា ក្រុមវេជ្ជបណ្ឌិតជំនាញ មកពីក្រុងថៃចូវ ខេត្តជាំងស៊ូ នៃសាធារណរដ្ឋប្រជាមានិតចិន មានជំនាញលើផ្នែកជំងឺទូទៅ ជំងឺសន្លាក់ លើសឈាម ព្យាបាលឆ្អឹង និងជំនាញព្យាបាលដោយការចាក់ម្ជុលវិទ្យាសាស្ត្រ រួមនិងក្រុមគ្រួពេទ្យជំនាញមកពីខេត្តសៀមរាប ដើម្បីពិនិត្យ និងព្យាបាលជំងឺជូនបងប្អូនប្រជាពលរដ្ឋ ឲ្យអស់ពីលទ្ធភាព។
មានប្រសាសន៍សំណេះសំណាលក្នុងឱកាសនោះ លោក ពិន ប្រាកដ អភិបាលរងខេត្តសៀមរាប បានបញ្ជាក់ថា សុខភាព គឺជាកត្តាចំបងដែលមនុស្សយើងគ្រប់រូប ត្រូវយកចិត្តទុកដាក់ខ្ពស់ឲ្យបានជាប្រចាំ ។ នេះ ជាលើកដំបូងហើយ ដែលក្រុមគ្រូពេទ្យស្ម័គ្រចិត្ត បានចុះមកដល់ឃុំត្បែងនេះ ដើម្បីព្យាបាល និងពិនិត្យជំងឺដល់ប្រជាពលរដ្ឋដោយមិនគិតថ្លៃ និងមិនរើសអើង ឬ ប្រកាន់ន្និនាការនយោបាយឡើយ។ ការមកដល់របស់ក្រុមគ្រូពេទ្យស្ម័គ្រចិត្តចិននាពេលនេះ បានបង្ហាញពីទំនាក់ទំនងល្អរវាងរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី និងបណ្ដាប្រទេសជាមិត្ត ហើយសកម្មភាពមនុស្សធម៌នេះដែរ ក៏បានជម្រុញឲ្យគុណភាពវិស័យសុខាភិបាលនៅកម្ពុជាកាន់តែមានប្រសិទ្ធភាព តាមរយៈកិច្ចសហប្រតិបត្តិការ ជាមួយ ក្រុមគ្រូពេទ្យបរទេសជំនាញ។
លោក ពិន ប្រាកដ បានថ្លែងអំណរគុណ ដល់ការិយាល័យកុងស៊ុលចិន ប្រចាំនៅខេត្តសៀមរាប និងក្រុមគ្រូពេទ្យ មកពីទីក្រុងថៃចូវ ខេត្តជាំងស៊ូ និង មន្ទីរពេទ្យចិន រស្មីអង្គរ សមាគមពាណិជ្ជកម្មចិនប្រចាំខេត្ត អាជ្ញាធរមូលដ្ឋាន និង សប្បុរសជនទាំងអស់ ដែលមានវត្តមាននាពេលនេះ ដែលនេះគឺជាសកម្មភាពមនុស្សធម៌មិនអាចកាត់ថ្លៃបាន ដែលវាបានចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋកម្ពុជា នៅតាមមូលដ្ឋាន។
សូមជម្រាបថា ប្រជាពលរដ្ឋ ចំនួន១៥០នាក់ មកពី៧ភូមិនៅក្នុងឃុំត្បែង ដែលបានមកទទួលសេវាព្យាបាល ពីគ្រូពេទ្យស្ម័ត្រចិត្តចិនក្នុងឱកាសនោះ ហើយភាគច្រើនជាជំងឺចាស់ជរា ជំងឺលើសឈាម ស្លាប់មួយចំហៀងខ្លួន រួមទាំងជំងឺទូទៅ។ លើសពីនោះ អ្នកជំងឺម្នាក់ៗ ទទួលបាន មី១កេស មុង១ ក្រម៉ា ១ សារុង១ និង ថវិកា ១ម៉ឺនរៀលផងដែរ ៕
អត្ថបទ និង រូបភាព ៖ លោក គឿន វេត លោក ខេង ឧត្តម និងលោក វ៉ាន់ លីហួង
កែសម្រួលអត្ថបទ៖ សេង ផល្លី
