ថ្ងៃទី២១ ខែមីនា ឆ្នាំ២០១៩ ឯកឧត្តម ទៀ សីហា អភិបាលខេត្តសៀមរាប បានអញ្ជើញជាអធិបតីក្នុងពិធីកាត់ឬសបញ្ចុះខណ្ឌសីមា ព្រះវិហារវត្តព្រះក្រាល ស្ថិតក្នុង ភូមិថ្មី ឃុំខ្នងភ្នំ ស្រុកស្វាយលើ ខេត្តសៀមរាប ហើយទីនេះក៏ជារមណីយដ្ឋានប្រវត្តិសាស្ត្រ ដ៍មានសក្តានុ នៃឧទ្យានជាតិភ្នំគូលេនផងដែរ។
ឯកឧត្តម ទៀ សីហា បានលើកឡើងថា៖ វិស័យអាណាចក្រ និងវិស័យពុទ្ធចក្រគឺមានទំនាក់ទំនងគ្នាយ៉ាងស្អិតរមួត ហើយវិស័យទាំង២នេះគឺជាកញ្ចក់ឆ្លុះបង្ហាញជាសត្យានុម័ត ឲ្យឃើញអំពីការវិវឌ្ឍរីកចម្រើននៃសង្គមជាតិ ហើយ សមិទ្ឋិផលទាំងនេះកើតឡើងដោយសារប្រទេសជាតិយើងមានសន្តិភាពគ្រប់គ្រាន់ ក្រោមការដឹកនាំរបស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រី នាំឱ្យប្រទេសជាតិយើង មានសុខសន្តិភាពស្ថេរភាព និងភាពរីកចំរើនសម្បូរសប្បាយ។ ជាមួយគ្នានេះ ដោយសារភូមិសាស្ត្រនៃព្រះវិហារនេះ ស្ថិតនៅក្នុងឧទ្យានជាតិភ្នំគូលេន គឺជាតំបន់ដែលឈើរាជរដ្ឋាភិបាលអភិរក្សព្រៃឈើ និងសត្វព្រៃ ព្រះសង្ឃបានដើរតួនាទីយ៉ាងសំខាន់ក្នុងការផ្ដល់ឱវាទ អប់រំពុទ្ធបរិស័ទ ឲ្យចៀងវាងការកាប់បំផ្លាញព្រៃឈើ និងទន្ទ្រានយកដីសម្បត្តិរដ្ឋ មកធ្វើជាសម្បត្តិផ្ទាល់ខ្លួន ដែលវាប្រាសចាកពីការអប់រំរបស់ព្រះពុទ្ធ។
ឯកឧត្តម ទៀ សីហា បានបន្ថែមថា ការបាត់បង់ព្រៃឈើ ជាការបាត់បង់គម្របបៃតង និងនាំមកនូវគ្រោះមហន្តរាយផ្សេងៗដូចជាទឹកជំនន់ ខ្យល់ព្យុះ និងភាពរាំងស្ងួត ព្រមទាំងបាត់បង់ជីវចម្រុះសម្រាប់សត្វអាស្រ័យ និងស្នាក់នៅផងដែរ។
ឯកឧត្តម បានបញ្ជាក់ថា៖ ស្ថានភាពព្រៃឈើនៅតំបន់ភ្នំគូលេនបច្ចុប្បន្ន ត្រូវរងការលួចកាប់ និងរិចរិលជាបន្តបន្ទាប់ ទោះបី អាជ្ញាធរខេត្ត និងមន្ត្រីជំនាញពាក់ពន្ឋ័ ខិតខំប្រឹងប្រែង ទប់ស្កាត់យ៉ាងណាក៏ដោយ។ ហេតុនេះ ដើម្បីជំនះនូវបញ្ហាប្រឈមនានា តម្រូវឱ្យមានការចូលរួមទាំងអស់គ្នា ឲ្យបានទូលំទូលាយពីសំណាក់អាជ្ញាធរគ្រប់លំដាប់ មន្ត្រីការពារបរិស្ថាន និងប្រជាពលរដ្ឋគ្រប់ស្រទាប់ ទើបសម្រេចគោលដៅនៃការគ្រប់គ្រងធនធានព្រៃឈើដោយចីរភាព។
បើតាមរបាយការណ៍របស់អាជ្ញាធរស្រុកស្វាយលើ បានបង្ហាញថា វត្តព្រះក្រាល ជាអារាមព្រះពុទ្ឋសាសនាមានវ័យមួយ ដែលបានបាត់ឈ្មោះនៅអំឡុងឆ្នាំ១៩៧៣។ ក្រោយថ្ងៃរំដោះ៧មករា១៩៧៩ ទីអារាមនេះត្រូវបានសម្តេចព្រះសុគន្ឋាធិបតី សម្តេចព្រះសង្ឃរាជគណៈធម្មយុត្តិកនិកាយ បានដឹកនាំកសាងឡើងវិញ តែនៅឆ្នាំ២០០៤ អារាមនេះក៏បានក្លាយទៅជាវត្តមហានិកាយវិញ ដោយប្រធានមន្ទីរធម្មការ និងសាសនាខេត្តសៀមរាប និងសមិទ្ឋផលដែលសម្ពោធដាក់ឱ្យប្រើប្រាស់នាពេលនេះ ជាថវិកាបានមកពីការចូលរួមរបស់ប្រជាពុទ្ឋបរិស័ទជិតឆ្ងាយទាំងក្នុងនិងក្រៅប្រទេសសរុបចំនួន ២៥២,៥០០ដុល្លារអាមេរិក។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ សេង ផល្លី
