នៅព្រឹកថ្ងៃទី២០ ខែមីនា ឆ្នាំ២០១៩នេះ លោកអាគិហិរូ កាតូ (Akihiro Kato) ជនជាតិជប៉ុន ម្ចាស់ក្លឹបបាល់ទាត់អង្គរ ថាយហ្គឺរ (Angkor Tiger ) ដែលមានមូលដ្ឋាន ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប បានផ្ដល់ថវិកាចំនួន ៤,០៤៥ដុល្លារសហរដ្ឋអាមេរិច ដើម្បីចូលរួមរំលែកទុក ដល់គ្រួសារសពលោក ហ៊ឹម ចាន់ តែត្រូវបានសម្លាប់ដោយជនជាតិជប៉ុនពីរនាក់ កាលពី ថ្ងៃទី១៧ ខែមីនា ឆ្នាំ២០១៩។
យោងតាមបណ្តាញសង្កមFacebook ផ្ទាល់ខ្លួនផ្លូវការ របស់លោកអាគិហិរូ កាតូ (Akihiro Kato) បានបង្ហាញថា លោកពិតជាមានការសោកស្តាយយ៉ាងខ្លាំង ចំពោះករណីក៏គួរឲ្យរន្ធត់មួយនេះ ដែលជនសង្ស័យជាជនជាតិជប៉ុនពីរនាក់ បានប្លន់អារកសម្លាប់អ្នកបើកបររថយន្តឈ្នូលជនជាតិខ្មែរ។ ហេតុការណ៍ដែលគួរឱ្យសោកសង្រែកនេះ បានធ្វើឱ្យលោក ដែលជាជនជាតិជប៉ុន សុំការអភ័យទោសប្រជាពលរដ្ឋខ្មែរទាំងអស់។
ទន្ទឹមនឹងការសុំទោសផងដែរ ប្រធានក្លឹបបាល់ទាត់ជនជាតិជប៉ុនរូបនេះ បានចូលរួមថវិកាមនុស្សធម៌ផ្ទាល់ខ្លួនចំនួន ១ពាន់ដុល្លារ ថវិកាមនុស្សធម៌របស់បុគ្គលិកនៃក្លឹបបាល់ទាត់អង្គរ ថាយហ្គឺរ (Angkor Tiger ) រួមនឹងសប្បុរសជនមួយចំនួនទៀត តាមរយៈលោក អាគិហិរូ កាតូ ជូនដល់ប្រពន្ធ និងកូន៤នាក់ របស់ជនរងគ្រោះ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោកឧត្តមសេនីយ៏ត្រីហួត សុធី ស្នងការរងនគរបាលខេត្តសៀមរាប និងជាតំណាងឲ្យក្រុមគ្រួសារសព សូមថ្លែងអំណរគុណ យ៉ាងជ្រៀវជ្រៅបំផុតដល់ក្លឹបបាល់ទាត់ អង្គរ ថាយហ្គឺរ (Angkor Tiger ) និងសូមជូនពរម្ចាស់ក្លិបសមាជិកទាំងអស់ជួបប្រទះតែសេចក្តីសុខ និងជោគជ័យជារៀងរហូតផងដែរ។
គួរបញ្ជាក់ផងដែរថា ក្លឹបបាល់ទាត់នេះ បានបង្កើតនៅឆ្នាំ២០១៥ ពោលគឺលោកបានសម្រេចយកក្លឹបត្រាយអាស៊ីភ្នំពេញ និងប្ដូរទៅជា អង្គរ ថាយហ្គឺរ (Angkor Tiger ) នាពេលបច្ចុប្បន្ន។ វត្តមានរបស់លោកអាគិហិរូ កាតូ (Akihiro Kato) នេះ បានធ្វើឲ្យមានកំណើនអ្នកគាំទ្រក្លឹបយ៉ាងច្រើន ក្រោយពីលោកបានស្នើសុំយកកីឡដ្ឋានខេត្តសៀមរាបធ្វើជាទឹកដីរបស់ក្លឹបបាល់ទាត់ខ្លួន ដើម្បីលេងនៅលីគកំពូលកម្ពុជា។
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ៖ សេង ផល្លី
