មានប្រសាសន៍ នៅបញ្ជាការដ្ឋានយោធភូមិពិសេស នារសៀលថ្ងៃទី១៩ ខែមីនា ឆ្នាំ២០១៩ ឯកឧត្តម ឧត្តមសេនីយឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការនៃបញ្ជាការដ្ឋានកងទ័ពជើងគោក លើកបញ្ជាក់ថា ៖ ការតម្លើងតែងតាំងផ្ទេរមុខតំណែង គឺមិនមែនជាការផ្ទេរសិទ្ធផ្ទេរអំណាចនោះទេ តែគឺជាការផ្ទេរនូវការទទួលខុសត្រូវ ពីមួយជំនាន់ ទៅមួយជំនាន់ទៀត ជាមួយនឹងការធានាឲ្យបាននូវប្រសិទ្ធភាពការងារ ។ដូច្នេះ ការជ្រើសរើស ដើម្បីទទួលបាន អ្នកដែលត្រូវបានទទួលភារកិច្ចបន្តនោះ គឺត្រូវធ្ចើឲ្យបានហ្មត់ចត់ ។
ការបញ្ជាក់យ៉ាងដូច្នេះ ឧត្តមសេនីយ៍ឯក ហ៊ុន ម៉ាណែត បានលើកឡើងក្នុងពិធី ប្រកាសតែងតាំងចូលកាន់មុខតំណែងមេបញ្ជាការថ្មី មេបញ្ជាការរង និង ជានាយសេនាធិការយោធភូមិភាគពិសេស ។ ឯកឧត្តមគូសបញ្ជាក់បន្ថែមថា ៖ តែងតាំងមុខតំណែង គឺត្រូវជ្រលសរើសដោយផ្អែកទៅលើសមត្ថភាពដឹកនាំ ឆន្ទៈ គុណសម្បត្តិស្នាដៃការងារ ក្នុងការបំពេញតួនាទី-ភារកិច្ច រួមទាំងការពិនិត្យមើលទៅលើសុខភាព បទពិសោធន៍ការងារ បទពិសោធន៍ប្រយុទ្ធ បទពិសោធន៍លើដឹកនាំជំនាញអង្គភាព ក្នុងនោះផងដែរ ក៏ត្រូវបានគិតគូរអំពីនិរន្តរភាពនៃការងារដោយផ្អែកលើអាយុ ហើយការតែតាំងនោះ សំខាន់បំផុតគឺ ការតែងតាំងប្រកបដោយប្រសិទ្ធភាព តម្លាភាព និងរក្សាបានសាមគ្គីភាព ។ អង្គភាពកងទ័ព មិនអាចដឹកនាំឲ្យមានការរីកចម្រើនបានទេ បើគ្មានការចូលរួមពីសំណាក់នាយទាហាន នាយទាហានរង គ្រប់ឋានានុក្រម និង ពលទាហាន ។
ការធានានិរន្តរភាពការងារកងទ័ពយូរអង្វែង គឺជាជោគជ័យនៃការពង្រឹងខឿនការពារជាតិ ដោយសមត្ថភាពនៃអ្នកបន្តវេន ។ ឯកឧត្តម ពិនិត្យឃើញថា កន្លងមកយោធភូមិភាគពិសេស រួមទាំងអង្គភាពចំណុះត្រូវបានពង្រឹង និងមានការរីកចម្រើនគួរឲ្យកត់សម្គាល់លើគ្រប់ជំនាញ ជាពិសេសការងារកសាងអង្គភាព ការងារសហការការពារសន្តិសុខ សណ្តាប់ធ្នាប់សាធារណៈ ការងារសហការការពារសុវត្ថិភាពជូនគណប្រតិភូជាន់ខ្ពស់ក្នុងភូមិសាស្ត្រទទួលខុសត្រូវ ការងាររុករក អដ្ឋិធាតុ ការងារសម្ព័ន្ធមេត្រីភាព ការងារលើកកម្ពស់ជីវភាព និងការថែរក្សាសុខុមាលភាពកងទ័ព ក្នុងនោះក៏មានការជួយដល់ប្រជាពលរដ្ឋក្រីក្រផងដែរ ។
ឯកឧត្តមបង្ហាញថា ៖ ពិតជាមានមោទនភាពចំពោះ សមិទ្ធផលដែលយោធភូមិភាគពិសេស ទទួលបានកន្លងមកនេះ ដែលទាំងនោះបានឆ្លុះបង្ហាញអំពីការរខិតខំប្រឹងប្រែង ប្រកបដោយពលីកម្ម និងការប្តេជ្ញាចិត្តខ្ពស់ និង សាមគ្គីភាពគ្រប់បណ្តាអង្គភាពនៅក្នុងទូទាំងយោធភូមិភាគ ដើម្បីបំរើជាតិ មាតុភូមិ ។ ឯកឧត្តមសង្ឃឹមថា ថ្នាក់ដឹកនាំថ្មីរបស់យោធភូមិភាគពិសេស បន្តប្រកាន់ខ្ជាប់ នូវស្មារតីទទួលខុសត្រូវ ដើម្បីនិរន្តរភាពនៃការរីកចម្រើនទៅថ្ងៃអនាគត ទុកជាមូលដ្ឋាន សម្រាប់ការបន្តវេន ទៅគ្រប់ជំនាន់ក្រោយៗទៀត ។ ឧត្តមសេនីយ៍ទោ ពូ សាប៊ុតឌី មេបញ្ជាការង ត្រូវបានប្រកាសចូលកាន់តំណែងជាមេបញ្ជាការយោធភូមិភាគពិសេស ជំនួស នាយឧត្តមសេនីយ៍ ព្រហ្ម ឌិន ដែលត្រូវបានទទួលតំណែងថ្មីជារដ្ឋលេខាធិការក្រសួងការពារជាតិ ៕
អត្ថបទ និងរូបភាព៖ លោក ងិន គឹមឡេង
