រដ្ឋបាលខេត្តសៀមរាប បានរៀបចំបិទ សន្និបាត បូកសរុបលទ្ធផលការងារឆ្នាំ២០១៨ និងលើក ទិសដៅអនុវត្តន៍បន្តឆ្នាំ២០១៩ របស់ខ្លួន បន្ទាប់ពីបាន ដំណើរការពិភាក្សាយ៉ាងផុលផុសអស់រយៈពេលពេញ ២ថ្ងៃ នៅល្ងាចថ្ងៃទី១៩ ខែមីនា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួង ការពារជាតិ និងជាប្រធានក្រុមការងារថ្នាក់កណ្តាលចុះជួយមូលដ្ឋានខេត្តសៀមរាប ។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា រយៈពេល២ថ្ងៃមកនេះ អង្គសន្និបាត បានចូលរួមធ្វើការពិភាក្សានូវរាល់ចំណុចខ្លាំង ចំណុចខ្សោយ និងបញ្ហាប្រឈមនានា ដែលរដ្ឋបាលខេត្ត អាជ្ញាធរ និងមន្ទីរជំនាញបានអនុវត្តនៅឆ្នាំ ២០១៨កន្លងមក និងបានដាក់ចេញនូវផែនការសម្រាប់អនុវត្តបន្ត ដើម្បីឆ្លើយតបទៅនឹងតម្រូវការ ក្នុងក្របខ័ណ្ឌយុទ្ធសាស្ត្រ ស្តីពីកំណែទម្រង់វិមជ្ឈការ និង វិសហមជ្ឈការ នៃរដ្ឋបាលថ្នាក់ក្រោមជាតិ ដើម្បីឱ្យរដ្ឋបាលថ្នាក់ក្រោមជាតិ ក្លាយជាស្ថាប័នអភិបាល កិច្ចមូលដ្ឋានដ៏រឹងមាំសំដៅចូលរួមកាត់បន្ថយភាពក្រីក្រ ធ្វើឱ្យមានចីរភាពដល់ការអភិវឌ្ឍន៍តាមបែបប្រជាធិបតេយ្យ ក្នុងបរិបទនៃការកែទម្រង់រដ្ឋបាលសាធារណៈ តាមបែបវិមជ្ឈការ និងវិសហមជ្ឈការ ។
មានប្រសាសន៍ក្នុងពិធីបិទសន្និបាតសម្តេចពិជ័យសេនា ទៀ បាញ់ បានសម្តែងនូវការកោតសរសើរ និងធ្វើការវាយតម្លៃខ្ពស់ចំពោះលទ្ធផលនៃការចូលរួមខិតខំប្រឹងប្រែង និងកិច្ចសហការគ្នាបានល្អ ក្នុងជួរថ្នាកដឹកនាំ មន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ រួមទាំងអង្គភាព ស្ថាប័នពាក់ព័ន្ធនានាក្នុងខេត្ត ។ ក្នុងការបំពេញតួនាទី ភារកិច្ចរបស់ខ្លួន ដោយផ្អែកតាមផែនការសកម្មភាពការងារក្នុងឆ្នាំកន្លងមក ស្របតាមគោលការណ៍ច្បាប់ និងគោលការណ៍ណែនាំនានារបស់រាជរដ្ឋាភិបាលកម្ពុជា ក្រសួង ស្ថាប័ន និងក្រុមប្រឹក្សាខេត្ត ។
សម្តេចពិជ័យសេនា បានបញ្ជាក់ទៀតថា សម្រេចឲ្យបានតាមការអភិវឌ្ឍកម្មវិធីកំណែទម្រង់ជាអាទិភាព ដែលបានកំណត់ក្នុងយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល សម្រាប់នីតិកាលទី៦ នៃរដ្ឋសភា ។ ដោយផ្អែកលើមូលដ្ឋានលទ្ធផលដែលរាជរដ្ឋាភិបាល ក៏ដូចជារដ្ឋបាលខេត្ត សម្រេចបានក្នុងឆ្នាំ២០១៨កន្លងមក ដើម្បីបន្តការងារ ក្នុងឆ្នាំ២០១៩នេះ យើងត្រូវតរួមគ្នាសម្រេចឱ្យបាននូវទិសដៅជាយុទ្ធ សាស្ត្រសំខាន់ៗរបស់រាជរដ្ឋាភិបាលថែមទៀត ។
សម្តេចពិជ័យសេនា ទៀ បាញ់ ក៏បានរំលឹក ដល់មន្ត្រី ថ្នាក់ដឹកនាំ កងកម្លាំងប្រដាប់អាវុធគ្រប់ជាន់ថ្នាក់ ត្រូវរួមសាមគ្គីគ្នាក្នុងការខិតខំថែរក្សាសន្តិភាព ស្ថិរ ភាព នយោបាយ សន្តិសុខ សណ្តាប់ធ្នាប់សាធារណៈ សំដៅបង្កលក្ខណៈសម្បត្តិអនុគ្រោះដល់ការរីក ចម្រើននៃលទ្ធិប្រជាធិបតេយ្យ សេរីពហុបក្ស និង ការអភិវឌ្ឍន៍លើគ្រប់វិស័យ ។ សម្តេច ក៏បានធ្វើការផ្តាំផ្ញើដល់អង្គសន្និបាត ត្រូវយកចិត្តទុកដាក់លើក កម្ពស់លើការងារសន្តិសុខ សុវត្ថិភាព និងជំរុញការផ្តល់សេវាសាធារណៈជូនប្រជាពលរដ្ឋ ទប់ស្កាត់ និង បង្ក្រាបឱ្យបានទាន់ពេលវេលានូវបទល្មើសនានា សំខាន់បញ្ហាចរាចរគ្រឿងញៀន ព្រមទាំងខិតខំបន្តដោះស្រាយបញ្ហានានា ដែលនៅសេសសល់ឆ្នាំចាស់ឱ្យមានតម្លាភាព គណនេយ្យភាព ប្រសិទ្ធភាពខ្ពស់ ព្រមទាំងបង្កើនការយកចិត្តទុកដាក់លើការផ្សព្វផ្សាយវេទិកាសាធារណៈ នៅតាមមូលដ្ឋាន និងការអនុវត្តនូវគោលនយោបាយភូមិ ឃុំមានសុវត្ថិភាពផងដែរ ៕
អត្ថបទ និងរូបភាព៖ លោក អ៊ិន សីហរីទ្ធ
កែសម្រួលដោយ៖ លោក លីវ សុខុន
