ខេត្តសៀមរាប៖ លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា (FFC) ត្រូវបានបោះឆ្នោតធ្វើជាប្រធានសហព័ន្ធកីឡាបាល់ទាត់អាស៊ីអាគ្នេយ៍ ហៅកាត់ថា AFF សម្រាប់អាណត្តិទី៥ ឆ្នាំ២០១៩-២០២៣ បន្ទាប់ពីឆ្លងកាត់កិច្ចប្រជុំ និងការបោះឆ្នោតជ្រើសរើសប្រធានថ្មី ក្នុងមហាសន្និបាតរបស់ សហព័ន្ធកីឡាបាល់ទាត់អាស៊ីអាគ្នេយ៍ នៅសណ្ឋាគារសុខាអង្គរ ខេត្តសៀមរាប កាលពីថ្ងៃទី១៧ ខែមីនា ឆ្នាំ២០១៩ ។
នេះគឺជាដំណឹងល្អ និងជាសញ្ញាវិជ្ជមានមួយ ដើម្បីជម្រុញការអភិវឌ្ឍន៍វិស័យកីឡាបាល់ទាត់កម្ពុជា ដោយមានប្រមុខថ្នាក់ដឹកនាំសហព័ន្ធកីឡាបាល់ទាត់អាស៊ីអាគ្នេយ៍ គឺជាជនជាតិខ្មែរ ។ មហាសន្និបាតខាងលើ បានធ្វើឡើងក្រោមវត្តមានឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជា (FFC) ហើយក៏មានការចូលរួមអង្កេតការណ៍ពីលោក ម៉ាទៀស ហ្ក្រា ស្ត្រូម (Mattias Grafstrom) តំណាងសហព័ន្ធកីឡាបាល់ទាត់អន្ដរជាតិ(FIFA) និងលោក វ៉ាហីត កាដានី (Vahid Kardany) តំណាងសហព័ន្ធកីឡាបាល់ទាត់អាស៊ី(AFC) ផងដែរ ។
គួរបញ្ជាក់ថា មហាសន្និបាតលើកទី២៦ នឹងត្រូវប្រារព្ធឡើង នៅខេត្តសៀមរាប រៀបចំដោយថ្នាក់ដឹកនាំ ប្រធានសហព័ន្ធកីឡាបាល់ទាត់អាស៊ីអាគ្នេយ៍ ក្រោមកិច្ចសហការជាមួយសហព័ន្ធកីឡាបាល់ទាត់កម្ពុជា ក្នុងនោះក៏មានការយាង និងការអញ្ជើញចូលរួមពីសំណាក់ប្រមុខសហព័ន្ធកីឡាបាល់ទាត់ ដែលជាសមាជិករបស់ ប្រធានសហព័ន្ធកីឡាបាល់ទាត់អាស៊ីអាគ្នេយ៍ ចំនួន ១២ប្រទេសផងដែរ រួមមានអូស្ត្រាលី , ព្រុយណេ , ឥណ្ឌូនេស៊ី , ឡាវ , ម៉ាឡេស៊ី , មីយ៉ាន់ម៉ា , ហ្វីលីពីន , សិង្ហបុរី , ថៃ , ទីម័រខាងកើត, វៀតណាម និងម្ចាស់ផ្ទះកម្ពុជា ដោយសរុបប្រតិភូទាំងអស់ប្រមាណ ៧៥នាក់ ៕
អត្ថបទ និងរូបភាព៖ លោក ជា ស្រស់ និងលោក ខេង ឧត្តម
កែសម្រួលអត្ថបទ៖ លោក សេង ផល្លី
