កាលពីម្សិលមិញថ្ងៃទី១៧ ខែមីនា ប្រមាណម៉ោង៥ល្ងាច មានករណីឃាតកម្មដ៏សាហាវ និងកម្រមួយក្នុងខេត្តសៀមរាប ដែលកើតឡើងលើកំណាត់ផ្លូវជាតិលេខ៦ ត្រង់ចំណុចជញ្ជីងថ្លឹងរថយន្ត ស្ថិតក្នុងភូមិគោកដូង ឃុំពួក ស្រុកពួក ក្នុងករណីឃាតកម្មនេះ ជនជាតិខ្មែរម្នាក់ ត្រូវបាន ជនជាតិជប៉ុន២នាក់ អារកសម្លាប់។
តាមប្រភពពីកន្លែងកើតហេតុបានឲ្យដឹងថា ជនរងគ្រោះ ឈ្មោះ ហ៊ឹម ចាន់ ភេទប្រុស អាយុ៤០ឆ្នាំ មុខរបរ រត់តាក់ស៊ី មាន ប្រពន្ធឈ្មោះ សុខ ចាន់ធឿន អាយុ៣៨ឆ្នាំ មានកូន៤នាក់ ប្រុស៣ ស្រី១ ទីលំនៅភូមិជាន់ត្រាច ឃុំឈូកដាច់ ស្រុកបារាយណ៍ ខេត្តកំពង់ធំ បច្ចុប្បន្នស្នាក់នៅភូមិបឹងដូនប៉ា សង្កាត់ស្លក្រាម ក្រុងសៀមរាប ។ ចំណែកជនសង្ស័យ០២នាក់ ជាជនជាតិជប៉ុន ទី១ ឈ្មោះ អ៊ីស៊ីដា រ៉េមុន (ISHIDA REIMON) ភេទប្រុស អាយុ២៤ឆ្នាំ ទី២ ឈ្មោះ ណាកា គុគី រីយូជី (NAKA KUKI RYUJI) ភេទប្រុស អាយុ២៤ឆ្នាំ បានចូលមកកម្ពុជានៅថ្ងៃទី១៦ ខែមីនា ឆ្នាំ២០១៩ តាមច្រកប៉ោយប៉ែត ខេត្តបន្ទាយមានជ័យ។
បើតាមប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុគេឃើញរថយន្តម៉ាក ហាយឡិនឌឺ ពណ៌ស្ករ ស្លាកលេខ ភ្នំពេញ ២AB ៥២១៨ បានបើកមកឈប់នៅកន្លែងកើតហេតុ ស្រាប់តែគេឃើញមានការប្រតាយប្រតប់គ្នារវាងអ្នកបើករថយន្ត និងអ្នកជិះ។ ប្រភពបន្តដដែលបានបន្តថា បន្តិចក្រោយមកក៏ឃើញអ្នកបើករថយន្ត ត្រូវបានគេទម្លាក់ចេញពីរថយន្ត និងខ្លួនប្រាណប្រលាក់ជោគដោយឈាម បន្ទាប់មកមនុស្សដែលនៅក្នុងរថយន្ត ក៏បើករថយន្តគេចចេញពីកន្លែងកើតហេតុ ឆ្ពោះមកទិសខាងកើត ក្នុងបំណងចូលក្រុងសៀមរាប តែបានចំងាយប្រហែល៣០០ម៉ែត្រ រថយន្តនោះ បានបុកជាមួយគោយន្ដកន្ដ្រៃដឹកស្រូវ ស្របទិសគ្នាទៅមុខលែងរួច ។ បន្ទាប់ពីបុកគោយន្តរួច ជនសង្ស័យទាំង២នាក់បានចុះរត់កាត់វាលស្រែ ក៏ត្រូវកម្លាំងសមត្ថកិច្ច ដេញស្ទាក់ចាប់បាន។
បើតាមការសន្និដ្ឋាន របស់ប្រជាពលរដ្ឋនៅកន្លែងកើតហេតុ ករណីឃាតកម្មនេះ អាចជាការប្លន់សម្លាប់។
បច្ចុប្បន្ន ជនសង្ស័យ ជាជនជាតិជប៉ុនទាំងពីរនាក់ ត្រូវបានកម្លាំងសមត្ថកិច្ចខេត្តសៀមរាប នាំមកសាកសួរ និងកសាងសំណុំរឿងតាមនិតិវិធី៕
អត្ថបទ និងរូបភាព៖ លោក ជា ស្រស់ និងលោក គឿន វេត
កែសម្រួលអត្ថបទ៖ លោក សេង ផល្លី
