ជនជាតិកូរ៉េម្នាក់ ត្រូវបានសមត្ថកិច្ច ត្រៀមរៀបចំបញ្ជូនចេញពីខេត្តសៀមរាប បន្ទាប់ពីរកឃើញថាជនបរទេសរូបនេះ លួចបន្តស្នាក់នៅខុសច្បាប់ អស់រយៈពេលជាង ០៥ឆ្នាំក្នុងប្រទេសកម្ពុជា។
លោកវរសេនីយ៏ឯក តូច សុគន្ធ នាយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលខេត្តសៀមរាប បានឲ្យដឹងថា ផ្អែកតាមការស្រាវជ្រាវ ត្រួតពិនិត្យ របស់កម្លាំងសមត្ថកិច្ចជំនាញ នៃនគរបាលខេត្ត នៅវេលាម៉ោងប្រមាណ៣រសៀល ថ្ងៃទី១៤ ខែមីនា ឆ្នាំ២០១៩ នៅចំណុចក្រុមហ៊ុនទេសចរណ៍កូរ៉េត្រាវែល ស្ថិតនៅភូមិ គ្រួស សង្កាត់ ស្វាយដង្គំ ក្រុងសៀមរាប កម្លាំងនគរបាលជំនាញបានអញ្ជើញជនជាតិកូរ៉េម្នាក់មកសាកសួរនៅការិយាល័យជំនាញពាក់ព័ន្ធនឹងករណីលួចស្នាក់នៅខុសច្បាប់។
លោកវរសេនីយ៏ឯក បានបង្ហាញថា ជនបរទេសរូបនេះឈ្មោះ លី សឹងហូ (LEE SEUNGHO) ភេទ ប្រុស ជនជាតិកូរ៉េ (សាធារណរដ្ឋកូរ៉េ) កាន់លិខិតឆ្លងដែនលេខ M៦៩៩៩៣៣៣៦ មុខរបរ បុគ្គលិកក្រុមហ៊ុនទេសចរណ៍កូរ៉េត្រាវែល ស្នាក់នៅផ្ទះជួលភូមិ សាលាកន្សែង សង្កាត់ ស្វាយដង្គំ ក្រុងខេត្តសៀមរាប។ ក្រោយពីសមត្ថកិច្ចធ្វើការ ត្រួតពិនិត្យឃើញថាទិដ្ឋាការស្នាក់នៅផុតសុពលភាព អស់រយៈពេល ០៥ឆ្នាំ និង៤២ថ្ងៃហើយនោះ បច្ចុប្បន្នជនបរទេសរូបនេះ ត្រូវបានកម្លាំងនគរបាលជំនាញ បញ្ជូនទៅមណ្ឌលត្រៀមបណ្តេញចេញប្រចាំខេត្តសៀមរាប និងត្រៀមបញ្ជូនទៅកាន់ នាយកដ្ឋានអន្តោប្រវេសន៍ក្រសួងមហាផ្ទៃ ចាត់ការបន្តតាមនីតិវិធីច្បាប់។
តាំងពីថ្ងៃទី ០១ កុម្ភៈ ២០១៤ មូលហេតុ៖មិនបានបន្តសុពលភាពទិដ្ឋាការស្នាក់នៅដោយសារពុំមានថវិការ។បច្ចុប្បន្នជនបរទេសរូបនេះត្រូវកម្លាំងនគរបាលជំនាញបានបញ្ជូនទៅមណ្ឌលត្រៀមបណ្តេញចេញប្រចាំខេត្តសៀមរាបចាត់ការបន្តតាមនីតិវិធីច្បាប់។
អត្ថបទ និងរូបភាព៖ លោក ថាច់ ពិសុទ្ធ
កែសម្រួលអត្ថបទ៖ លោក សេង ផល្លី
