ព្រះសង្ឃ មន្ត្រីរាជការ កងកំលាំងប្រដាប់អាវុធ សិស្ស និសិត្ស ប្រជាពលរដ្ឋ បើកយុទ្ធនាការ ប្រារព្ធទិវាជាតិទីក្រុងស្អាតលើកទី ៧ ក្រោមប្រធានបទ ទីក្រុងស្អាត ទីក្រុងផ្តល់ភាពកក់ក្តៅ។
នាព្រឹកថ្ងៃទី១៤ ខែមិនា ឆ្នាំ២០១៩ ក្រោមវត្តមានឯកឧត្តម ម៉ុម សារឿន អភិបាល នៃគណៈអភិបាលខេត្តស្ទឹងត្រែង ផ្តល់ភាពកក់ក្តៅ ចូលរួមអបអរសាទ ទិវាជាតិទីក្រុង ស្អាតលើកទី៧។ ទិវាជាតិទីក្រុងស្អាតនេះ រៀបចំក្នុងគោលបំណងកាត់បន្ថយ កាក សំណល់ប្លាស្ទិក ជា ពិសេសចូលរួមដល់ការអភិវឌ្ឍន៍ ទីក្រុងឱ្យក្លាយ ជាទីក្រុង ប្រកបដោយភាពទាក់ទាញ និងផ្ដល់ភាពកក់ក្ដៅ សុខមាលភាពរបស់ប្រជាពលរដ្ឋ និងភ្ញៀវទេសចរណ៍។
កាលពីកន្លងទៅ ការប្រកាសជ័យលាភីបេក្ខភាព ក្រុងស្ទឹងត្រែង នៃការប្រកាស លទ្ធផលប្រលងប្រណាំងទីក្រុងស្អាតលើកទី២នេះ បានបង្ហាញថា ក្រុងស្ទឹងត្រែង ទទួលបានផ្ការំដួល មួយទង មានពិន្ទុចំនួន ៤៤ពិន្ទុមានន័យថាកើនពិន្ទុបានចំនួន ៩ពិន្ទុបន្ថែម លើសពីការប្រលងប្រណាំងទីក្រុងស្អាត់លើកទី១ ។
ឯកឧត្តមអភិបាលខេត្ត បានសម្តែងនូវការអបអរសាទរ ចំពោះការ ទទួលបាន ពានរំដួល០១ទង របស់បេក្ខភាពក្រុងស្ទឹងត្រែង ជាមួយនឹង ចលនាប្រឡងប្រណាំង ទីក្រុងស្អាតលើកទី២ ឆ្នាំ២០១៨-២០២១។
ឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែង បានអំពាវ នាវដល់ ប្រជាពលរដ្ឋ មន្ត្រីរាជការជុំវិញខេត្ត សិស្ស និសិត្ស កងកំលាំងប្រដាប់ អាវុធគ្រប់ប្រភេទ ត្រូវចូលរួមទាំងអស់ ដោយមិនសំដៅលើសំរាម១មុខគត់នោះទេ ត្រូវ គិតទៅលើកត្តាសន្តិសុខ សណ្តាប់ធ្នាប់ ការរស់គោរពច្បាប់ ការថែរក្សា ទ្រព្យសម្បត្តិសារធារណៈ ចូលរួមទទួលខុសត្រូវ សម្អាតអនាម័យតាមគេហដ្ឋាន រៀងៗ ខ្លួន និងតាមដងផ្លូវ ដើម្បីយើងទាំងអស់គ្នា រស់នៅប្រកបដោយផាសុខភាព គឺធ្វើឱ្យមាន ការទាក់ទាញទេសចរ ចូលមកកំសាន្តសប្បាយ រឺស្នាក់នៅខេត្ត បង្កផ្តល់ប្រាក់ចំណូល ពីវិស័យទេសចរ យ៉ាងច្រើនសន្ធឹកសន្ធាប់៕
អត្ថបទ និងរូបភាព៖ មន្ទីរព័ត៌មានស្ទឹងត្រែង
