ព័ត៌មានជាតិ ថ្មីៗ
ថ្លែងក្នុងពិធីអបអរសាទរខួបលើកទី១០៨ ទិវាអន្តរជាតិនារី០៨ មីនាឆ្នាំ២០១៩ នៅស្នងការដ្ឋាននគរបាលខេត្តសៀមរាប កាលពីព្រឹកថ្ងៃទី១៣ ខែមីនា ឆ្នាំ២០១៩នេះ លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានសម្ដែងនូវការកោតសរសើរដល់កងកម្លាំងនគរបាលជាតិជានារីទូទាំងប្រទេសនិយាយរួម និង ដោយឡែកនៅស្នងការដ្ឋាននគរបាលខេត្តសៀមរាម ដែលកន្លងមក នារីមានតួនាទីយ៉ាងសំខាន់ក្នុងការងាររបស់កងកម្លាំងនគរបាល បានយកអស់កម្លាំងកាយចិត្ត ប្រាជ្ញា និង ស្មារតីក្នុងកិច្ចសហប្រតិបត្តិការរក្សាសន្តិសុខ សុខសុវត្ថិភាព និងសណ្តាប់ធ្នាប់សង្គមជូនប្រជាពលរដ្ឋ បានយ៉ាងល្អប្រសើរ ។
លោក ទិត្យ ណារ៉ុង មានប្រសាសន៍ទៀតថា ឆ្លៀតក្នុងឱកាសនេះ សូមអំពាវនាវដល់ស្ត្រីដែលជាកងកម្លាំងនគរបាលជាតិទាំងអស់ សូមបន្តខិតខំពង្រឹងនិងពង្រីកសមត្ថភាពរបស់ខ្លួនបន្ថែមទៀត លើចំណេះដឹង ជំនាញ រក្សាភាពម៉ឺងម៉ាត់ឧស្សាហ៍ព្យាយាម អំណត់អត់ធ្មត់ ចូលរួមក្នុងគ្រប់ការងារទាំងការងាររបស់អង្គភាព និង ការងាររបស់សង្គម ពិសេសត្រូវបន្តនូវការផ្សព្វផ្សាយអំពីច្បាប់គ្រឿងញៀន , ច្បាប់ចរាចរណ៍ផ្លូវគោក និងច្បាប់ផ្សេងៗទៀត រួមទាំងការផ្សព្វផ្សាយនូវគោលនយោបាយភូមិឃុំមានសុវត្ថិភាព ទាំងនៅក្នុងសង្គមគ្រួសារ និង នៅសហគមន៍ ដើម្បីចូលរួមចំណែកក្នុងការបង្ការ ទប់ស្កាត់បទល្មើស រក្សាបាននូវសន្តិសុខ សុវត្ថិភាពឲ្យបានកាន់តែល្អប្រសើរឡើងថែមទៀត ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
