ព្រះសង្ឃ រួមជាមួយនឹងក្រុមយុវជន សិស្សានុសិស្សជាច្រើនអង្គ/នាក់ បាននាំគ្នាដាំកូនឈើនៅតាមដងផ្លូវក្នុងភូមិ និងសាលារៀន ដើម្បីបង្កើតទេសភាពបៃតង សម្រាប់រៀចំកន្លែងទាក់ទាញទេសចរនៅតាមភូមិ ស្ថិតនៅក្នុងតំបន់រមណីយដ្ឋានអង្គរ នៅព្រឹកថ្ងៃទី៣០ ខែសីហា ឆ្នាំ២០២២នេះ។
លោក នឹក ពេទ្យ សមាជិកយុវជនកម្មវិធីស្ម័គ្រចិត្ដ ដើម្បីសហគមន៍ខ្ញុំ បានឱ្យដឹងថា បន្ទាប់ពីមានគម្រោងបង្កើតតំបន់ភូមិនេះ ឱ្យក្លាយជាភូមិធម្មជាតិបៃតង ក្រុមយុវជនកម្មវិធី”ការស្ម័គ្រចិត្ដដើម្បីសហគមន៍ សហការជាមួយក្រុមយុវជន និងព្រះសង្ឃ លោកគ្រូអ្នកគ្រូ បាននាំដាំកូនឈើជាច្រើនប្រភេទ ដោយដាំក្នុងសាលារៀនតាប៉ាង និងតាមដងផ្លូវក្នុងឃុំអំពិល ស្រុកប្រាសាទបាគង ដើម្បីបំផុសឱ្យប្រជាពលរដ្ឋក៍ដូចជាយុវជន ចេះស្រលាញ៉បរិស្ថាន និងទេសភាពបៃតង។ លោកថា តំបន់ភូមិតាប៉ាង ស្ថិតក្នុងតំបន់អង្គរ រាល់ការសាងសង់សំណង់ធំៗ មិនអាចធ្វើទៅបាន ដូចនេះក្រុមយុវជនបាននាំគ្នា បង្កើតជាតំបន់ទេសចរ ហើយមានការដាំដើមឈើបន្ថែមទៀត ខណៈដែលទីនោះមានទេសភាពវប្បធម៌គួរឱ្យចង់គយគន់។ ជាមួយគ្នានោះលោកក៍មានគម្រោងបង្កើត កន្លែងតាំងពិព័រណ៌ស្នារដៃរបស់អ្នកភូមិ ដើម្បីធ្វើយ៉ាងណាឱ្យមានការទាក់ទាញអ្នកទេសចរ ព្រោះនៅពេលមានទេសចរ សេដ្ឋកិច្ចប្រជាពលរដ្ឋ ក៍ទទួលបានតាមនោះដែរ។
ព័ត៌មានជាតិ ថ្មីៗ
ជាមួយគ្នានោះដែរ ក្រុមយុវជនដែលបានចូលរួម បានលើកឡើងថា ដើមឈើមិនត្រឹមតែមានសារៈសំខាន់ សំរាប់ជីវិត ប៉ុន្តែជាប្រភេទរុក្ខជាតិ ដែលមានជីវិតយូរបំផុតនៅលើផែនដី ហើយបានផ្តល់អុកស៊ីសែនរក្សាទុកកាបូនស្ថេរភាពដី និងផ្តល់ជីវិតដល់សត្វព្រៃរបស់ពិភពលោក។ ដើមឈើបានធ្វើឱ្យនូវសម្ភារៈប្រើប្រាស់ និងទីជម្រក មានដើមឈើក៍ជួយជម្រុញអ្នកទេសចរទៅកំសាន្ដផងដែរ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
