ឯកឧត្ដម លី រស្មី រដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់ បានបញ្ជាក់ថា គិតចាប់ពីថ្ងៃទី២២ ដល់ថ្ងៃទី៣០ ខែសីហា ឆ្នាំ២០២២នេះ អាជ្ញាធរ និងមន្ត្រីពាក់ព័ន្ធកំពុមមាញឹកក្នុងការកាប់ឆ្កាព្រៃ និងសាងសង់ផ្លូវនៅឃុំរុនតាឯក ស្រុកបន្ទាយស្រី ខេត្ដសៀមរាប សម្រាប់ឱ្យប្រជាពលរដ្ឋចាកចេញពីរមណីយដ្ឋានអង្គរ។ ហើយគិតមកទល់ពេលនេះបានប្រមាណ ៩៥ហិកតា និងការសាងសង់ផ្លូវបានប្រវែងចំនួន ៣ពាន់ម៉ែត្រ ជូនប្រជាពលរដ្ឋតាំងទីលំនៅថ្មីដំណាក់កាលទី១ បន្ទាប់ពីពួកគាត់បានស្ម័គ្រចិត្ដចាកចេញពីរមណីយដ្នានអង្គរ ។
ឯកឧត្ដម លី រស្មី បានឲ្យដឹងទៀតថា សម្រាប់ប្រជាពលរដ្ឋដែលបានស្ម័គ្រចិត្ដទៅរស់នៅភូមិរុនតាឯក គឺត្រូវចាប់ឆ្នោតយកក្បាលដី ទំហំ ២០ គុណ ៣០មែត្រ មានចំនួន ៩៣៦គ្រួសារ ខណៈដែលក្រុមការងាតម្រង់ទិស បានចុះវាស់វែងក្បាលដីក្នុងតំបន់រមណីយដ្ឋានអង្គរ បានជាង ៣ម៉ឺនក្បាលដី។ នាពេលខាងមុខភូមិរុនតាឯកនេះ នឹងក្លាយជាភូមិគំរូនាពេលអនាគត ដោយមានការរៀបចំដាំដើមឈើហូបផ្លែនៅតាមដងផ្លូវ ឱ្យក្លាយជាភូមិទាក់ទាញអ្នកទេសចរផងដែរ។
បើតាមក្រសួង និងមន្ទីររៀបចំដែនដីនគររូបនីយកម្ម និងសំណង់ បានប្រកាសឱ្យប្រជាជាពលរដ្ឋដែលបានចាប់ឆ្នោតយកក្បាលដីរួចហើយ ត្រូវទៅមើលលេខក្បាលដីរបស់ខ្លួន ដែលក្រុមការងារបានដាក់លេខសំគាល់នៅទីតាំងភូមិរុនតាឯក ក្នុងស្រុកបន្ទាយស្រី និងអាចទៅសួរនាំដល់មន្ដ្រីប្រចាំការ នៅក្នុងសាលាបឋមសិក្សា ហ៊ុន សែន រុនតាឯក ខណៈដែលរាជរដ្ឋាភិបាលបានត្រៀមក្បាលដីជាង ៦ពាន់ក្បាលដី សម្រាប់ទុកជូនប្រជាពលរដ្ឋមានលំនៅឋានមិនរៀបរយ នៅក្នុងតំបន់រមណីដ្ឋានអង្គរដែលមកដល់ពេលនេះ មានប្រជាពលរដ្ឋចាប់ឆ្នោតយកក្បាលដី ដោយការពេញចិត្ដចំនួន ៩៣៦គ្រួសារ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
