លោក ពៅ វិសាល ប្រធានផ្នែកកម្មវិធីផ្ដល់ថ្នាំបង្ការ នៃការិយាល័យប្រតិបត្ដិស្រុកសៀមរាប បានឲ្យដឹងនៅថ្ងៃទី១៣ ខែតុលានេះថា ការចាក់វ៉ាក់សំាងបង្ការជំងឺកូវីដ-១៩ ដល់កុមារនៅតាមសាលារៀននេះ ត្រូវបានធ្វើឡើងជាបន្ដបន្ទាប់រហូតដល់ខែវិច្ឆិកា ព្រោះកុមារនៅតាមសាលារៀនបានធ្លាក់ចុះនៅទិន្នន័យនៃការទទួលវ៉ាក់សាំង ដូសជម្រុញ ទើបក្រុមគ្រូពេទ្យបានចាប់ផ្ដើមធ្វើយុទ្ធនការផ្ដល់វ៉ាក់សាំងដល់ពួកគាត់ ដើម្បីកុំឱ្យកុមារពិបាកធ្វើដំណើរទៅមណ្ដលសុខភាព ឬកន្លែងឆ្ងាយពីផ្ទះ ខណៈដែលសាលារៀនជាកន្លែងប្រមូលផ្ដុំសិស្សានុសិស្សដែលមានអាយុបីឆ្នាំឡើងទៅ។ ជាមួយគ្នានោះ ការផ្ដល់វ៉ាក់សាំងដូសជម្រុញនេះ មិនថាតែសិស្សានុសិស្សនៅសាលាមតេយ្យ សាលាបឋមសិក្សា ឬអនុវិទ្យាល័យនោះទេ ថែមទាំងបានផ្ដល់វ៉ាក់សាំងដល់ប្រជាពលរដ្ឋ ដែលមិនទាន់ទទួលវ៉ាក់សាំងដូសជម្រុញផងដែរ។
លោក ពៅ វិសាល បន្ថែមថា កន្លងមកក្រុមគ្រូពេទ្យបានផ្ដល់វ៉ាក់សំាងបង្ការជំងឺកូវីដ-១៩ ជាច្រើនទីតាំងមកហើយនៅតាមវិទ្យាល័យ អនុវិទ្យាល័យ។ លោកបានអំពាវនាវដល់អាជ្ញាធរ គ្រូបង្រៀនជួយសហការជាមួយក្រុមគ្រូពេទ្យចល័ត និងផ្ដល់ដំណឹងដល់សិស្ស និងអាណាព្យាបាលឱ្យទៅចាក់វ៉ាក់សាំងបង្ការជំងឺកូវីដ-១៩ នូវដូសជ្រុញឱ្យបានគ្រប់គ្នាដើម្បីការពារអាយុជីវិតកុមារ។
យោងតាមរបាយការណ៍របស់ក្រុមការងារចាក់វ៉ាក់សាំងការពារជំងឺវីដ-១៩ របស់រដ្ឋបាលខេត្ដសៀមរាប បានបង្ហាញថា មកដល់ខែសីហា ឆ្នាំ២០២២នេះ ការអនុវត្តយុទ្ធនាការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋ ក្នុងខេត្តសៀមរាប សម្រាប់ដូសទី១ សរុបចំនួន ៩៧៧,៩៩៤នាក់ ស្មើនឹង ៩៦% នៃផែនការសរុប ១០២២,១៦១នាក់ ក្នុងនោះសម្រាប់ដូសទី២ ចាក់បានសរុប ៩១៨,៨៩២នាក់ ស្មើរនឹង ៩៤% បើប្រៀបធៀបនឹងការចាក់វ៉ាក់សាំងដូសទី១។ សម្រាប់ដូសទី៣ សរុប ៦១៨,៦៩៦នាក់ ស្មើនឹង ៦៧% បើប្រៀបធៀបជាមួយនឹងការចាក់វ៉ាក់សាំងដូសទី២។ សម្រាប់ដូសទី៤ សរុបចំនួន ២០៥,៨៩៥នាក់ ស្មើនឹង ៣៣% បើប្រៀបធៀបជាមួយនឹងការចាក់វ៉ាក់សាំងដូសទី៣, សម្រាប់ដូសទី៥ មានចំនួនសរុប ១៩,៣៧៩នាក់ ក្នុងនោះកុមារអាយុចាប់ពី១២ ដល់ក្រោម ១៨ឆ្នាំ ចំនួន ៧០៨នាក់ និងប្រជាពលរដ្ឋអាយុ ១៨ឆ្នាំឡើង ចំនួន ១៨,៦៧១នាក់៕
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
