នៅព្រឹកថ្ងៃទី១៣ ខែតុលា ឆ្នាំ២០២២នេះ រដ្ឋបាលក្រុងសៀមរាប បានរៀបចំបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុងអាណត្តិទី៣ ឆ្នាំ២០២២ ក្រោមវត្តមានលោក ទេព ប៊ុនឆាយ ប្រធានក្រុមប្រឹក្សាក្រុង និងលោកស្រី លឹម ផល្លិកា អភិបាលរងក្រុងសៀមរាប ដោយមានការចូលរួមពីសមាជិកក្រុមប្រឹក្សាខេត្ត ក្រុង តំណាងអាជ្ញាធរអប្សរា តំណាងមន្ទីរអង្គភាពនានាក្នុងខេត្ត និងប្រជាពលរដ្ឋជាច្រើនរូប។
លោក ទេព ប៊ុនឆាយ មានប្រសាសន៍ថា វេទិកានាឱកាសនេះ គឺដើមី្បផ្ដល់ព័ត៌មានដល់ប្រជាពលរដ្ឋអំពីការការដែលអាជ្ញាធរមូលដ្ឋានបានអនុវត្តបានកន្លងមក ជាពិសេសវរទិកានេះក៏ជាការឱកាសដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ អាចលើកពីបញ្ហាប្រឈមនានា ដែលកើតមានក្នុងមូលដ្ឋានកន្លងមក ដើម្បីឲ្យអ្នកពាក់ព័ន្ធអាចធ្វើការបកស្រាយ និងកែសម្រួល ធ្វើយ៉ាងណាឲ្យគ្រប់បញ្ហា និងតម្រូវការផ្សេងៗរបស់ប្រជាពលរដ្ឋទទួលបាននូវផលវិជ្ជមាន។
លោកប្រធានក្រុមប្រឹក្សាក្រុង ក៏បានលើកទឹកចិត្តដល់បងប្អូនប្រជាពលរដ្ឋអាចលើកឡើងនូវទុក្ខកង្វល់ បញ្ហាប្រឈម និងសំណូមពរនានា ក្នុងវេទិកានេះឱ្យបានច្រើន ពីព្រោះប្រជាពលរដ្ឋគ្រប់រូប មានសិទ្ធិស្មើៗគ្នា ក្នុងការបញ្ចេញមតិយោបល់តាមរយៈការនិយាយផ្ទាល់មាត់ និងការសរសេរលើក្រដាស ហើយក្រុមប្រឹក្សាក្រុង នឹងធ្វើការប្រមូលនូវរាល់មតិយោបល់ បញ្ហាប្រឈម និងសំណូមពរទាំងនោះ មកធ្វើការពិភាក្សាស្រាយបំភ្លឺឱ្យបានច្បាស់លាស់ ប្រកបដោយតម្លាភាព នឹងឈានទៅរកការដោះស្រាយជូនបានចំគោលដៅ មានប្រសិទ្ធិភាព និងទាន់ពេលវេលា។
គួរឲ្យដឹងដែរថា វេទិកានេះដែរក៏មានប្រជាពលរដ្ឋលើកឡើងនូវសំណួរ សំណូមពរដោយភ្ទាល់ និងជាលាយលក្ខ័ជាអក្សរមួយចំនួនជូនដល់អង្គវេទិការផងដែរ។ ក្នុងនោះអាជ្ញាធរ និងអ្នកពាក់ព័ន្ធក៏បានធ្វើការស្រាយបំភ្លឺ និងពន្យល់ដល់បងប្អូនប្រជាពលរដ្ឋបានមួយចំនួន។ ដោយឡែកចំ0ពោះសំណួរ និងសំណូមពរមួយចំនួនទៀត អ្នកអាជ្ញាធរ និងអ្នកពាក់ព័ន្ធមិនទាន់បានបកស្រាយ ក្រុមការងារនឹងទទួលយកទៅពិនិត្យពិភាក្សាក្នុងក្របខណ្ឌក្រុមប្រឹក្សាក្រុង ហើយនឹងធ្វើការឆ្លើយតបជាលាយលក្ខណ៏អក្សរជូនដល់ម្ចាស់សំណួរ សំណូមពរ តាមរយៈក្រុមប្រឹក្សាសង្កាត់នាពេលឆាប់ៗខាងមុខផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
