រដ្ឋលេខាធិការដ្ឋាន អាកាសចរស៊ីវិល បានរៀបចំសិក្ខាសាលាស្តីពី វប្បធម៌សន្ដិសុខ ដែលជាឯកសារថ្មីមួយ ក្នុងចំណោមឯកសារបណ្តុះបណ្តាលថ្មីៗមួយចំនួន ដែលអង្គការអាកាសចរណ៍ស៊ីវិលអន្តរជាតិ (ICAO) ទើបបង្កើតថ្មីដើម្បីត្រៀមពេលវិស័យអាកាសចរណ៍រីកចម្រើន ដែលតម្រូវឱ្យចាត់វិធានការសន្តិសុខ ឱ្យមានប្រសិទ្ធភាពឆ្លើយតបទៅនឹងការវិវត្តន៍ថ្មីៗ ក្នុងវិស័យអាកាសចរណ៍។ សិក្ខាសាលានេះធ្វើឡើង នៅខេត្ដសៀមរាប មានរយៈពេល ៤ថ្ងៃ ចាប់ពីថ្ងៃទី១៨ ដល់ថ្ងៃទី២១ ខែតុលា ឆ្នាំ២០២២នេះ។
ឯកឧត្ដម គឹម សុភ័ណ រដ្ឋលេខាធិការរដ្ឋាអាកាសចរណ៍ស៊ីវិល មានប្រសាសន៍ថា ដោយសារការរីកចម្រើននៅក្នុងវិស័យអាកាសចរណ៍ស៊ីវិល ជាពិសេសកំណើននៃការសាងសង់អាកាសយានដ្ឋានខ្នាតអន្តរជាតិថ្មីៗដូចជា នៅអាកាសយានដ្ឋានអន្តរជាតិភ្នំពេញថ្មី អាកាសយានដ្ឋានអន្តរជាតិសៀមរាបថ្មី អាកាសយានដ្ឋាន អន្តរជាតិតារាសាគរ និងការពង្រីកអាកាសយានដ្ឋានអន្តរជាតិខេត្តព្រះសីហនុ ដែលកំពង់ដំណើរការស្រាប់ នឹងឈានទៅបើកឱ្យដំណើរការនូវអាកាសយានដ្ឋានថ្មីជាបន្តបន្ទាប់ នោះ អាកាសចរណ៍ស៊ីវិល នឹងឈានដល់ប្រតិបត្តិការពេញលេញឡើងវិញ។ជាមួយគ្នានេះ ការរីកចម្រើនលើវិស័យអាកាសចរណ៍ ត្រូវមានការយកចិត្តទុកដាក់ខ្ពស់ចំពោះការងារ សន្តិសុខ និងសុវត្ថិភាព។
ឯកឧត្ដមបញ្ជាក់ថា បើគ្មានប្រព័ន្ធសន្តិសុខរឹងមាំទេ យើងនឹងអាចជួបបញ្ហាប្រឈមមួយចំនួនដែលអាចនាំមកនូវហានិភ័យនិងផលវិបាកធ្ងន់ធ្ងរមិនខាន។ ដូចនេះការអនុវត្តវិធានការសន្តិសុខ ប្រកបដោយ ប្រសិទ្ធភាព ពិតជាចាំបាច់មិនអាចខ្វះបានឡើយ។ ការចាត់វិធានការឱ្យមានប្រសិទ្ធភាព តម្រូវឱ្យមានការអនុវត្តព្រមគ្នា រវាងអ្នកទទួលខុសត្រូវផ្ទាល់ដូចជា កំលាំងសន្តិសុខគ្រប់ប្រភេទ គ្រប់កម្រិត និងអ្នកចូលរួមសហការអនុវត្តដែលមិនមែនជាកំលាំងសន្តិសុខ ដូចជាអ្នកប្រើប្រាស់សេវាកម្ម អាកាសយានដ្ឋានរួមមាន៖ សេវាកម្មបម្រើលើផ្ទៃដី សេវាកម្មចាក់ប្រេងអាកាសយាន សេវាកម្ម បម្រើម្ហូបអាហារលើអាកាសយាន សេវាកម្មបោសសំអាតក្នុងស្ថានីយ និងនៅក្នុងយន្តហោះ សេវាកម្មលក់វត្ថុអនុស្សាវរីយ៍នៅក្នុងអាកាសយានដ្ឋានផងដែរ។
ឯកឧត្ដមបន្ដថា ដើម្បីឱ្យមានការយល់ដឹងច្បាស់ អំពីវិធានការ សន្តិសុខ ទើបអង្គការអាកាសចរណ៍ស៊ីវិលអន្តរជាតិ (ICAO) នៅក្នុងសម័យប្រជុំលើកទី៤០. បានអនុម័តឱ្យបន្តរៀបចំបង្កើតឯកសារនានា ដើម្បីលើកកម្ពស់ការយល់ដឹងសន្តិសុខ និងវប្បធម៌សន្ដិសុខ ដោយកំណត់យកឆ្នាំ២០២០ ជាឆ្នាំនៃវប្បធម៌សន្ដិសុខ (Year of Security Culture)។ ប៉ុន្តែដោយសារមានការរីករាលដាលនៃជម្ងឺកូវីដ-១៩ (Covid-19) នៅក្នុងឆ្នាំ២០២០ ទើបក្រុមប្រឹក្សាអង្គការអាកាសចរណ៍ស៊ីវិលអន្តរជាតិ (ICAO) បានពន្យារពេលទៅឆ្នាំ២០២១ ជាឆ្នាំនៃវប្បធម៌សន្ដិសុខវិញ។ ដើម្បីទទួលបានភាពជោគជ័យនៃឆ្នាំវប្បធម៌សន្តិសុខនេះអង្គការអាកាសចរណ៍ស៊ីវិលអន្តរ ជាតិ (ICAO) បានកំណត់នូវការងារអត្ថិភាពមួយចំនួនដូចជា អនុវត្តយុទ្ធនាការផ្សព្វផ្សាយឱ្យយល់ដឹងអំពី វប្បធម៌សន្ដិសុខជាសកលផង, ថ្នាក់តំបន់ផង និងរៀបចំព្រឹត្តការណ៍ផ្សេងៗ ដើម្បីលើកកម្ពស់ការយល់ដឹង ។បង្កើនសហប្រតិបត្តិការរវាងស្ថាប័នរដ្ឋ និងក្រុមហ៊ុនឯកជន ឲ្យគាំទ្រដល់ការខិតខំលើក កម្ពស់វប្បធម៌សន្ដិសុខ នៅក្នុងសហគមន៍អាកាសចរណ៍ ដែលម្នាក់ៗត្រូវទទួលខុសត្រូវចំពោះ ការងារសន្តិសុខ។ ដាក់ចេញនូវគោលការណ៍ណែនាំ ឲ្យអនុវត្តនូវយុទ្ធសាស្ត្រ ផែនការនិងយុទ្ធនាការផ្សេងៗ បន្តផ្តល់ការបណ្ដុះបណ្ដាល និងជួយជ្រោមជ្រែង ក្នុងការលើកម្ពស់វប្បធម៌សន្តិសុខនៅក្នុង ស្ថាប័នពាក់ព័ន្ធនឹងអាកាសចរណ៍ស៊ីវិល។
សូមបញ្ជាក់ថា សិក្ខាសាលាស្ដីពីវប្បធម៌សន្ដិសុខនេះ ជាលើកទី៣ហើយ ដែលរៀបចំដោយផ្ទាល់ និងតាមប្រព័ន្ធអនឡាញ ដែលលើកទី១ រៀបចំធ្វើតាមប្រព័ន្ធអនឡាញនៅប្រទេសណូវែលសេឡង់ កាលពីខែមេសា ឆ្នាំ២០២២ និងលើកទី២ក៏រៀបចំធ្វើតាមប្រព័ន្ធអនឡាញ ដែរនៅប្រទេសសិង្ហបុរី កាលពីខែមិថុនា ឆ្នាំ២០២២៕
អត្ថបទ និង រូបភាព៖ លោគ បូ សាវី
