នៅរសៀលថ្ងៃទី១៤ ខែវិច្ឆិកា ឆ្នាំ២០២២ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានដឹកនាំកម្លាំងជំនាញ មេបញ្ជាការ មេបញ្ជាការរង និងមន្ត្រីជំនាញនៃកងរាជអាវុធហត្ថ ខេត្តសៀមរាប សហការជាមួយអ្នកគ្រប់គ្រងសណ្ឋាគារ ចុះត្រួតពិនិត្យផ្ទាល់តាមគោលដៅសំខាន់ៗ ដែលបានកំណត់ ដើម្បីត្រៀមការពារសន្តិសុខ សុវត្ថិភាព ក្នុងពេលប្រជុំនិងស្នាក់នៅរបស់គណៈប្រតិភូយោធាជាន់ខ្ពស់ នៃកិច្ចប្រជុំក្រសួងការពារជាតិអាស៊ានដែលនឹងរៀបចំឡើងក្នុងពេលឆាប់ៗនៅទឹកដីអង្គរខេត្តសៀមរាប។
ក្នុងការចុះពិនិត្យនេះដែរ ក្រុមការងារបានចុះតាមទីតាំងគោលដៅដែលបានកំណត់មួយចំនួនដូចជា៖ បន្ទាយមូលដ្ឋានកងរាជអាវុធហត្ថក្រុងសៀមរាប, សណ្ឋាគារសុខាសៀមរាប, សណ្ឋាគារ FCC, សណ្ឋាគារផាកហៃយ៉ាត់ សៀមរាប និងមហាសណ្ឋាគារអង្គរ ដោយបានពិនិត្យ និងកំណត់ទៅលើទីតាំងបន្ទប់សម្រាប់កិច្ចប្រជុំ បន្ទប់បដិសណ្ឋារកិច្ច ទីកន្លែងទទួលទានអាហារ បន្ទប់ស្នាក់នៅរបស់ភ្ញៀវ ព្រមទាំងប្រព័ន្ឋកាមេរ៉ាសុវត្ថិភាពរបស់សណ្ឋាគារទាំងនោះ ពិនិត្យស្ថានភាពភូមិសាស្ត្រតាមដងផ្លូវសំខាន់ៗមួយចំនួនក្នុងក្រុងសៀមរាបផងដែរ។
ក្នុងឱកាសនោះឯកឧត្តម នាយឧត្តមសេនីយ៍ សៅ សុខា បានណែនាំដល់អ្នកគ្រប់គ្រងសណ្ឋាគារដែលជាគោលដៅ ត្រូវយកចិត្តទុកដាក់ខ្ពស់ក្នុងការរៀបចំ ដើម្បីរក្សាបាននូវសណ្តាប់ធ្នាប់ របៀបរៀបរយ និងសុវត្ថិភាព សេចក្តីថ្លៃថ្នូរ ចៀសវាងនូវបញ្ហាកើតឡើងជាយថាហេតុ។ ឯកឧត្តម ក៍បានណែនាំ និងផ្តល់អនុសាសន៍ ដល់មន្ត្រីក្រោមឱវាទ ជាពិសេសមេបញ្ជាការ មេបញ្ជាការរង នៃកងរាជអាវុធហត្ថខេត្តសៀមរាប ត្រូវសហការដឹកនាំរៀបចំពិនិត្យដោយហ្មត់ចត់ទៅលើសម្ភារៈ និងមធ្យោបាយនាំក្បួនគណៈប្រតិភូ កំណត់គោលដៅឈរជើងប្រចាំបញ្ជា និងចាត់តាំងកម្លាំងផ្លាស់ប្តូរយាមកាមតាមគោលដៅឱ្យបានច្បាស់លាស់ សហការជាមួយកម្លាំងសមត្ថកិច្ចនគរបាលខេត្ត និងកម្លាំងសមត្ថកិច្ចពាក់ព័ន្ឋ ដើម្បីពង្រឹងយន្តការងាររក្សាសន្តិសុខសុវត្ថិភាពសម្រាប់កិច្ចប្រជុំដ៍មានអត្ថន័យ និងសារៈសំខាន់នេះ ឱ្យមានប្រសិទ្ឋភាពខ្ពស់ ដោយឈរលើស្មារតីសហការ ឯកភាព សាមគ្គីភាព និងភាពទទួលខុសត្រូវ សំដៅធ្វើយ៉ាងណារក្សាសន្តិសុខសុវត្ថិភាពឱ្យមានប្រសិទ្ឋិភាពខ្ពស់ ទាំងទិដ្ឋភាពភូមិសាស្ត្រខាងក្រៅ និងទិដ្ឋភាពខាងក្នុងអគារសណ្ឋាគារ ដោយយកគំរូតាមយុទ្ឋសាស្ត្រការពារសន្តិសុខ សុវត្ថិភាពនៃកិច្ចប្រជុំកំពូលអាស៊ានលើកទី៤០-៤១ ក្នុងរាជធានីភ្នំពេញ ដែលកម្ពុជាធ្វើជាម្ចាស់ផ្ទះ ទទួលបានជោគជ័យយ៉ាងត្រចះត្រចង់។
ព័ត៌មានជាតិ ថ្មីៗ
សូមជំរាបថា កិច្ចប្រជុំការពារជាតិអាស៊ាន នឹងរៀបចំចាប់ពីថ្ងៃទី២១ ដល់ទី២៣ ខែវិច្ឆិកា ឆ្នាំ២០២២ នៅសណ្ឋាគារសុខាសៀមរាប ដោយមានវត្តមានចូលរួមពីថ្នាក់ដឹកនាំយោធាជាន់ខ្ពស់ មកពីបណ្តាប្រទេសក្នុងតំបន់អាស៊ាន បណ្តាប្រទេសដៃគូអភិវឌ្ឍ និងប្រទេសមហាអំណាចក្នុងពិភពលោកផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
