កម្មវិធី «ការបញ្ចេញស្នាដៃចម្អិនម្ហូបអង្គរ» ក្រោមប្រធានបទ «ទឹកដី និងការច្នៃប្រឌិត» របស់គម្រោងអង្គការអាគ្រីស៊ុតកម្ពុជា ត្រូវបានធ្វើឡើងជាលើកដំបូងក្នុងខេត្តសៀមរាប នាព្រឹកថ្ងៃទី១៧ ខែវិច្ឆិកា ឆ្នាំ២០២២ នៅភូមិអូរទទឹង សង្កាត់ក្របីរៀល ក្រុងសៀមរាប ក្នុងគោលបំណងលើកកម្ពស់ដល់ផលិតផលកសិកម្ម និងណែនាំឲ្យមេចុងភៅស្គាល់ និងចូលរួមក្នុងការប្រើផលិតផលក្នុងស្រុក មកចម្អិនអាហារបង្ហាញពីថ្វីដៃរបស់ចុងភៅ និងលើកតម្លៃមុខម្ហូបប្រចាំតំបន់ ដែលជាមុខម្ហូបក្នុងការប្រកួតគឺ «ទឹកគ្រឿងសៀមរាប»។
លោក អ៊ឹង គឹមលាង អភិបាលរងខេត្តសៀមរាប មានប្រសាសន៍ថា ការបង្កើតកម្មវិធីនាពេលនេះដែរ គឺជាឱកាសដ៏ពិសេសមួយ ក្នុងការជួយជម្រុញដល់ការដាំបន្លែរបស់កសិករក្នុងខេត្តសៀមរាប ឲ្យពួកគាត់កាន់តែមានការខិតខំក្នុងការផលិតកសិផលផ្សេងៗ ដែលមានគុណភាពល្អ និងចំណេញទាំងអ្នកដាំ អ្នកទិញ និងអ្នកបរិភោគ ជាពិសេសការស្វែងរកទីផ្សារសម្រាប់បន្លែសុវត្ថិភាពរបស់កសិករយើងទៀតផង។ លោកបន្តថាក្នុងនាមរដ្ឋបាលខេត្ត ក្រោយដំណើរទស្សនកិច្ចស្វែងយល់ពីលទ្ធផលកសិកម្មរបស់ប្រជាកសិករគំរូ ២គ្រួសារ ក្នុងចំណោម ៤០៣គ្រួសារ របស់គម្រាងអង្គការអាគ្រីស៊ុត ដែលបានដាំបន្លែសុវត្តិភាពតាមបច្ចេកទេស ដើម្បីធ្វើអោយបាននូវទិន្និផល់ និងគុណភាពខ្ពស់សម្រាប់ផ្គត់ផ្គង់ក្នុងខេត្ត និងឈានទៅដល់ការនំាចេញទៅក្រៅខេត្ត។ ទន្ទឹមនោះប្រជាកសិករ ក៏ជួបនៅបញ្ហាទីផ្សារ និងការវេចខ្ចប់ ដោយអាជ្ញាធរខេត្តនឹងធ្វើការពិភាក្សាជាមួយក្រុមប្រឹក្សាខេត្តអូដឺសែន និងអង្គការអាគ្រីស៊ុត ដើម្បីរកនូវដំណោះស្រាយបញ្ហារទាំងនេះដល់ប្រជាកសិករ។
លោក ឡុង ប៊ុនហោ ប្រធានសមាគមចុងភៅកម្ពុជា បានឲ្យដឹងថា ការជ្រើសរើសយកមុខម្ហូប ”ទឹកគ្រឿងសៀមរាប” សម្រាប់ការប្រកួតធ្វើម្ហូបនាពេលនេះ ព្រោះ ទឹកគ្រឿង ជាមុខម្ហូបរបស់ខ្មែរ ដែលពលរដ្ឋខ្មែរតែងតែធ្វើពិសាជាមួយនឹងបន្លែដែលមាននៅជុំវិញផ្ទះពួកគាត់ ជារួមទឹកគ្រឿងជាមុខម្ហូបដែលបានផ្សាភ្ជាប់ជាមួយពលរដ្ឋកម្ពុជាតាំងពីយូរលង់មកហើយ។ សម្រាប់ការប្រកួតនេះដែរ បេក្ខភាពប្រកួតមានចំនួន ៣ស្ថាប័ន ត្រូវនឹង ៦រូប ដែលចូលរួមជាអ្នកប្រកួតរួមមាន៖ បេក្ខភាពមកពីភោជនីយដ្ឋានអង្គារដី ភោជនីយដ្ឋានមេអំបៅ និងភោជនីយដ្ឋានក្នុងភូមិព្រះដាក់។ ក្នុងព្រឹត្តិការណ៍នៃការប្រកួតម្ហូបនោះ បេក្ខភាពទាំងអស់ តម្រូវឲ្យរៀបចំចម្អិនមុខម្ហូបប្រចាំខេត្តគឺ ទឹកគ្រឿង ដែលតម្រូវឲ្យប្រើបន្លែ ២ផ្នែកគឺ បន្លែក្នុងស្រុក និងបន្លែនាំចូលមកដាំថ្មីនៅក្នុងប្រទេសកម្ពុជា៕
អត្ថបទ និងរូបភាព៖ លោក ជា ស្រស់ លោក ស៊ាន សុផាត
កែសម្រួល៖ លោក អ៊ុន ណារាជ្យ
