កងកម្លាំងប្រដាប់អាវុធជាង២ពាន់នាក់ នឹងត្រូវដាក់ពង្រាយតាមគោលដៅសំខាន់ៗ ដើម្បីការពារសន្ដិសុខ សុវត្ថិភាព គណៈប្រតិភូ នៃកិច្ចប្រជុំអាស៊ានការពារជាតិ នៅខេត្ដសៀមរាប

ដើម្បីធានាសន្ដិសុខ សុវត្ថិភាព សណ្ដាប់ធ្នាប់សាធារណៈជូនគណៈប្រតិភូនៃកិច្ចប្រជុំរដ្ឋមន្ដ្រីការពារជាតិអាស៊ាន (ADMM Reatreat) និងកិច្ចប្រជុំរដ្ឋមន្ដ្រីការពារជាតិអាស៊ានបូក លើកទី៩ (ADMM Plus) ដែលប្រព្រឹត្តិទៅនៅខេត្តសៀមរាប ចាប់ពីថ្ងៃទី២១-២៣ ខែវិច្ឆិកា ឆ្នាំ២០២២ខាងមុខ កម្លាំងសមត្ថកិច្ចការពារជាង ២ពាន់នាក់ នឹងត្រូវដាក់តាមគោលដៅសំខាន់ៗ ក្នុងការការពារសន្តិសុខ និងសុវត្ថិភាពគណៈប្រតិភូឲ្យបានល្អ។

លោកឧត្ដមសេនីយ៍ សឿន សេន អ្នកនាំពាក្យស្នងការដ្ឋាននគរបាល ខេត្ដសៀមរាប បានបញ្ជាក់នៅថ្ងៃទី១៧ ខែវិច្ឆិកានេះថា ការប្រើប្រាស់កម្លាំងជាង ២ពាន់នាក់នេះ គឺមានកម្លាំងនគរបាល កម្លាំងអង្គភាពនគបាលបេតិកភណ្ឌ អង្គភាពនគរបាលទេសចរណ៍ និងកម្លាំងកងរាជអាវុធហត្ថ កងទ័ពអាកាស កងវរៈសេនាតូចស៊ើបការណ៍នៃយោធភូមិភាគទី៤ ដោយកម្លាំងទាំងអស់បានត្រៀមរួចជាស្រេចសម្រាប់ការពារនៅតាមគោលចំនួន ៣២គោលដៅ រួមមានច្រកទ្វារព្រលានយន្ដហោះអន្ដរជាតិសៀមរាប និងនៅតាមដងផ្លូវសំខាន់ៗ និងបណ្ដាគោលដៅសំខាន់ជាច្រើនកន្លែងទៀត។

លោកឧត្ដមសេនីយ៍ ក៏បានអំពាវនាវដល់ប្រជាពលរដ្ឋក្នុងខេត្តទាំងអស់ សូមចូលរួមសហការជាមួយកងកម្លាំងសមត្ថកិច្ចគ្រប់ទីតាំង ដើម្បីរក្សាសណ្ដាប់ធ្នាប់សាធារណៈ សុខសុវត្ថិភាពជូនគណប្រតិភូ នៃកិច្ចប្រជុំការពារជាតិអាស៊ាន ដែលធ្វើឡើងនៅក្នុងខេត្ដសៀមរាបនាពេលខាងមុខនេះ។ លោកក៏បានណែនាំដល់អ្នកគ្រប់គ្រងទីតាំងទាំង៥ ដែលជាគោលដៅសំខាន់សម្រាប់គណៈប្រតិភូ រួមមាន៖ សណ្ឋាគារសុខាសៀមរាប, សណ្ឋាគារ FCC, សណ្ឋាគារផាកហៃយ៉ាត់ សៀមរាប, មហាសណ្ឋាគារអង្គរ និងទីបញ្ជាការកងរាជអាវុធហត្ថក្រុងសៀមរាប ត្រូវយកចិត្តទុកដាក់ខ្ពស់ ក្នុងការរៀបចំដើម្បីរក្សាបាននូវសណ្តាប់ធ្នាប់ របៀបរៀបរយនិងសុវត្ថិភាព សេចក្តីថ្លៃថ្នូរ ចៀសវាងនូវបញ្ហាកើតឡើងជាយថាហេតុ។ ជាមួយគ្នានោះកងរាជអាវុធហត្ថទាំងអស់ ត្រូវសហការដឹកនាំរៀបចំ ពិនិត្យដោយហ្មត់ចត់ទៅលើសម្ភារៈ និងមធ្យោបាយនាំក្បួនគណៈប្រតិភូ កំណត់គោលដៅឈរជើងប្រចាំបញ្ជា និងចាត់តាំងកម្លាំងផ្លាស់ប្តូរយាមកាមតាមគោលដៅឱ្យបានច្បាស់លាស់ សហការជាមួយកម្លាំងសមត្ថកិច្ចនគរបាលខេត្ត និងកម្លាំងសមត្ថកិច្ចពាក់ព័ន្ឋ ដើម្បីពង្រឹងយន្តការងាររក្សាសន្តិសុខសុវត្ថិភាពសម្រាប់កិច្ចប្រជុំដ៍មានអត្ថន័យនិងសារៈសំខាន់នេះ ឱ្យមានប្រសិទ្ឋភាពខ្ពស់។

ព័ត៌មានជាតិ ថ្មីៗ

សាខាកាកបាទក្រហមកម្ពុជា ខេត្តសៀមរាប នាំយកអំណោយផ្ដល់ជូនក្រុមគ្រួសារយុទ្ធជនពលី នៅស្រុកប្រាសាទបាគង

30/11/2025

រដ្ឋបាលខេត្តសៀមរាប រៀបចំវេទិកាផ្សព្វផ្សាយ និងពិគ្រោះយោបល់នៅស្រុកស្រីស្នំ ដើម្បីស្វែងរកបញ្ហាប្រឈម និងដំណោះស្រាយជូនប្រជាពលរដ្ឋ

20/11/2025

សូមបញ្ជាក់ថា កិច្ចប្រជុំរដ្ឋមន្ដ្រីការពារជាតិអាស៊ាន (ADMM Reatreat) និងកិច្ចប្រជុំរដ្ឋមន្ដ្រីការពារជាតិអាស៊ានបូក លើកទី៩ (ADMM Plus ) នឹងប្រព្រឹតទៅចាប់ពីថ្ងៃទី២១-២៣ ខែវិច្ឆិកា ឆ្នាំ២០២២ខាងមុខនេះ នៅសណ្ឋាគារសុខាសៀមរាប ដោយមានវត្តមានថ្នាក់ដឹកនាំយោធាជាន់ខ្ពស់ មកពីបណ្តាប្រទេសក្នុងតំបន់អាស៊ាន បណ្តាប្រទេសដៃគូអភិវឌ្ឍ និងប្រទេសមហាអំណាចក្នុងពិភពលោកផងដែរ៕

អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ