នៅក្នុងពិធីផ្សព្វផ្សាយច្បាប់ចរាចរណ៍ និងចែកមួកសុវត្ថិភាពដល់លោកគ្រូ អ្នកគ្រូ នៅក្នុងក្រុងសៀមរាប នៅព្រឹកថ្ងៃទី១៧ ខែវិច្ឆិកា ឆ្នាំ២០២២ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណ:កម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ថា បញ្ហាគ្រោះថ្នាក់ចរាចរណ៍នៅតែកង្វល់របស់រដ្ឋាភិបាល ព្រោះវាបានធ្វើឱ្យប៉ះពាល់យ៉ាងច្រើនដល់សង្គម និងសេដ្ឋកិច្ចកម្ពុជា។ ចំណែកមូលហេតុដែលបង្កឱ្យមានគ្រោះថ្នាក់ចរាចរណ៍ គឺដោយសារកត្តាមនុស្សដដែល។
លោកជំទាវ បានបន្តថា ក្នុងឆ្នាំ២០២១កន្លងមកនេះ មូលហេតុចម្បងនៃគ្រោះថ្នាក់ចរាចរណ៍ គឺការបើកបរលើសល្បឿនកំណត់៣៨% មិនគោរពសិទ្ធិអាទិភាព២៤% មិនប្រកាន់ស្តាំ១៤% វ៉ាជែង៨% បត់ខ្វះការប្រុងប្រយ័ត្ន ៨% បើកបរក្នុងភាពស្រវឹង ៤% កត្តាយានយន្ត ៣% និងបើកបរក្នុងភាពងងុយដេក ១%។ ជនរងគ្រោះភាគច្រើនមានអាយុពី ១៥ឆ្នាំដល់៣៥ឆ្នាំ។ ក្នុងចំណោមនេះភាគច្រើនជាអ្នកជិះម៉ូតូ គឺប្រមាណជាង៧៥% ហើយមិនពាក់មួកសុវត្ថិភាពមានប្រមាណជាង៧០% ដែលភាគច្រើនមិនពាក់មួកនៅពេលយប់ (គ្រោះថ្នាក់ពេលយប់សរុបប្រមាណ ៥៦% បណ្តាលឱ្យស្លាប់៥៦% និងរបួស៥០%)។ អ្នកស្លាប់ភាគច្រើនគឺនៅរាជធានីភ្នំពេញ ខេត្តកណ្ដាល ខេត្តព្រះសីហនុ និងខេត្តកំពង់ចាម។
លោកជំទាវ អគ្គលេខាធិការគណ:កម្មាធិការជាតិសុវត្ថិភាពចរាចរណ៍ផ្លូវគោក បន្តថា យើងឃើញហើយថា អាត្រាអ្នកស្លាប់ដោយគ្រោះថ្នាក់ចរាចរណ៍នេះ ភាគច្រើនជាអ្នកជិះម៉ូតូមិនពាក់មួយសុវត្ថិភាព ដូចនេះ លោកជំទាវជំរុញឱ្យលោកគ្រូ អ្នកគ្រូជួយផ្សព្វផ្សាយឱ្យកាន់កាន់តែទូលំទូលាយទៅសិស្សានុសិស្សទាំងអស់ពេលធ្វើដំណើរ សូមឱ្យពាក់មួកសុវត្ថិភាពឱ្យបានត្រឹមត្រូវ និងឱ្យបានគ្រប់គ្នា ព្រោះមួកមួយជួយជីវិតបានម្នាក់។
លោក ពិន ប្រាកដ អភិបាលរងខេត្តសៀមរាប បានថ្លែងថា អនុគណ:កម្មការសុវត្ថិភាពចរាចរណ៍ផ្លូវគោកខេត្តសៀមរាប បានរៀបចំលិខិតស្នាមពាក់ព័ន្ធការងារសុវត្ថិភាពចរាចរណ៍ និងបានចេញសេចក្តីអំពាវនាវទប់ស្កាត់គ្រោះថ្នាក់ចរាចរណ៍ រៀបចំយុទ្ធនាការពញ្ញាក់ស្មារតីដល់អ្នកបើកបរយានយន្តគ្រប់ប្រភេទនៅលើដងផ្លូវ នៅមុនឱកាសបុណ្យជាតិសំខាន់ៗ ក្រុមការងារលេខាធិការដ្ឋានបានចុះធ្វើការណែនាំ ផ្សព្វផ្សាយអប់រំ ចែកខិតបណ្ណ និងចងបដាពាក្យស្លោកអប់រំអំពីសុវត្ថិភាពចរាចរណ៍នៅតាមដងផ្លូវជាតិ និងទីប្រជុំជននានាក្នុងខេត្ត ចុះធ្វើការផ្សព្វផ្សាយ អប់រំច្បាប់ស្តីពីចរាចរណ៍ផ្លូវគោក ជូនដល់សហគមន៍ ប្រជាពលរដ្ឋ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស អ្នកប្រើប្រាស់ផ្លូវ និងបានចែកឯកសារពាក់ព័ន្ធនឹងច្បាប់ចរាចរណ៍។
លោកអភិបាលរងខេត្ត បានបន្តថា នៅរយ:ពេល ៩ខែដើមឆ្នាំ២០២២ ខេត្តសៀមរាប មានគ្រោះថ្នាក់ចរាចរណ៍បានកើតចំនួន ៨៦លើក កើនឡើង ៤៤លើក ស្មើ៥១% បណ្តាលអោយមានអ្នកស្លាប់ចំនួន ៨៦នាក់ (ស្រីចំនួន ២៦នាក់) កើនឡើង ៤៨នាក់ ស្មើ៥៦% របួសធ្ងន់ចំនួន ៥៣នាក់ (ស្រីចំនួន ២០នាក់) កើនឡើង ៣៧នាក់ ស្មើ៤៣% របួសស្រាល ចំនួន ៤៤នាក់ (ស្រីចំនួន ១៨នាក់) កើន១៦នាក់ ស្មើ១៩%៕
អត្ថបទ និងរូបភាព: លោកឃុត សៅ កែសម្រួលដោយ លីវ សុខុន!!!
