អគ្គលេខាធិការគណ:កម្មាធិការជាតិសុវត្ថិភាពចរាចរណ៍បង្ហាញថា នៅក្នុងរយ:ពេល ១៥ថ្ងៃ ក្នុងខែវិច្ឆិកានេះ អត្រាគ្រោះថ្នាក់ចរាចរណ៍ និងស្លាប់មានការកើនឡើងគួឱ្យព្រួយបារម្ភ ។លោកជំទាវ មឹន មាណវី រដ្ឋលេខាធិការក្រសួងសាធារណ:ការ និងដឹកជញ្ជូន និងជាអគ្គលេខាធិការ នៃគណ:កម្មាធិការជាតិសុវត្ថិភាពចរាចរណ៍ផ្លូវគោកកម្ពុជា បានមានប្រសាសន៍នៅក្នុងសិក្ខាសាលា ស្តីពីការពង្រឹងសមត្ថភាពសុវត្ថិភាពចរាចរណ៍ផ្លូវគោក ដែលធ្វើនៅខេត្តសៀមរាប នាព្រឹកថ្ងៃទី១៦ ខែវិច្ឆិកា ឆ្នាំ២០២២នេះថា បន្ទាប់ពី រាជរដ្ឋាភិបាលទទួលជោគជ័យក្នុងការគ្រប់គ្រងទប់ស្កាត់បាននូវការរីករាលដាលជំងឺកូវីដ-១៩ និងបានបើក ប្រទេសឡើងវិញលើគ្រប់វិស័យតាំងពីខែតុលា ឆ្នាំ២០២១ មកនោះ ការធ្វើចរាចរណ៍ទូទាំងប្រទេសក៏ចាប់ផ្ដើមមានភាពមមាញឹកយ៉ាងខ្លាំង ហើយស្ថានភាពគ្រោះថ្នាក់ចរាចរណ៍រយ:ពេល ៩ខែដើមឆ្នាំ២០២២នេះ មានសភាពធ្ងន់ធ្ងរ ដោយចំនួនគ្រោះថ្នាក់ អ្នកស្លាប់ និងអ្នករបួស ដោយគ្រោះថ្នាក់ចរាចរណ៍ មានការកើនឡើងធៀបនឹងរយ:ពេលដូចគ្នាឆ្នាំ២០២១ គឺគ្រោះថ្នាក់ចរាចរណ៍កើតឡើងចំនួន ២,២៨៦លើក កើនឡើង២១% អ្នកស្លាប់ចំនួន ១,៣៤២នាក់កើនឡើង ២៧% អ្នករបួសធ្ងន់ ២,០០៤នាក់ កើន២៨% របួសស្រាល ២,៣៩១នាក់កើន ១៤%។
បើយោងតាមរបាយការណ៍របស់អគ្គស្នងការនគរបាលជាតិ គិតត្រឹមរយ:ពេល ១៥ថ្ងៃ ក្នុងខែវិច្ឆិកា ឆ្នាំ២០២២នេះ មានអ្នកស្លាប់ចំនួន ៧០នាក់ បើធៀបនឹងរយ: ១៥ថ្ងៃ នៃខែតុលា ឆ្នាំ២០២២កន្លងមកនេះ មានត្រឹម ៤៦នាក់ កើនឡើង ២៤នាក់ ស្មើ៥២% ក្នុងនោះចំនួនអ្នកស្លាប់ឡើនឡើងគួឱ្យព្រួយបារម្ភ។
លោកជំទាវ បន្តថា គ្រោះថ្នាក់ចរាចរណ៍ដែលមានសភាពធ្ងន់ធ្ងរបណ្តាលឱ្យបាត់បង់ជីវិតមនុស្ស ឬរបួសពិការយ៉ាងអាណោចអាធម រួមជាមួយនឹងការខូចខាតទ្រព្យសម្បត្តិរដ្ឋ និងឯកជន យ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើនដល់សង្គមជាតិ និងសកលលោក រួមទាំងប៉ះពាល់យ៉ាងខ្លាំងដល់ដំណើរការ នៃការដឹកជញ្ជូន ដែលជាដង្ហើមរស់របស់សេដ្ឋកិច្ចជាតិ និងសេដ្ឋកិច្ចគ្រួសារ។ ដូច្នេះហើយទើប អង្គការសហប្រជាជាតិបាន ផ្ដល់អនុសាសន៍ឱ្យគ្រប់ប្រទេសជាសមាជិកដាក់ចេញនូវផែនការទស្សវត្យចរាចរណ៍លើកទី១ ពីឆ្នាំ២០១១ ដល់២០២០ ដោយតម្រូវឱ្យខិតខំកាត់បន្ថយយ៉ាងណាឱ្យបាន៥០% ដែលទិន្នន័យច្បាស់ការមួយបញ្ជាក់ថា សម្រាប់ប្រទេសកម្ពុជាគឺ ប្រមាណ ៧,៣៥០នាក់ នៃចំនួនប៉ាន់ស្មានរួម ១៤,៧០០នាក់។ ប៉ុន្តែកម្ពុជាកាត់បន្ថយបានតែជាង ៤,៧២០នាក់ ស្មើនឹង៦៤% នៃ៥០% ប៉ុន្តែបើធៀបនឹង ចំនួនសរុបរួមគឺបានតែ ៣១% តែប៉ុណ្ណោះ។
ដូចនេះ លោកជំទាវ បានសំណូមពរសុំឱ្យសិក្ខាកាមទាំងអស់ខិតខំត្រង់ត្រាប់ និងផ្លាស់ប្តូរផ្ដល់យោបល់ ដកស្រង់យកចំណេះដឹងថ្មីៗ ដើម្បីពង្រឹងសមត្ថភាពក្នុងការទប់ស្កាត់ កាត់បន្ថយគ្រោះថ្នាក់ចរាចរណ៍ឱ្យបានតាមផែនការជាតិទសវត្សរ៍សុវត្ថិភាពចរាចរណ៍ជាមួយនឹងការបន្តជួយអប់រំផ្សព្វផ្សាយឱ្យអ្នកនៅជុំវិញខ្លួនខិតខំប្រុងប្រយ័ត្ន ក្នុងការធ្វើដំណើរជៀសផុតពីគ្រោះថ្នាក់ចរាចរណ៍។
លោក Weimin Ren ប្រធានផ្នែកដឹកជញ្ជូននៃ UNESCAP បានថ្លែងថា សុវត្ថិភាពចរាចរណ៍ នៅតែជាបញ្ហាប្រឈមដ៏ចម្បងមួយសម្រាប់របស់យើង។នៅក្នុងតំបន់របស់យើង ៩៧% នៃអ្នកស្លាប់ដោយសារគ្រោះថ្នាក់ចរាចរណ៍កើតឡើងនៅក្នុងប្រទេស ដែលមានប្រាក់ចំណូលមធ្យម ជាមួយនឹងអ្នកប្រើប្រាស់ផ្លូវដែលជាជនងាយរងគ្រោះ រួមមាន អ្នកជិះម៉ូតូ ថ្មើរជើង និងអ្នកជិះកង់ ដែលមានចំនួនច្រើនជាង ៥០%។ លោក សង្ឃឹមថា សិក្ខាសាលាពង្រឹងសមត្ថភាព ស្តីពីសុវត្ថិភាពចរាចរណ៍ផ្លូវគោកនៅកម្ពុជា នាពេលនេះ នឹងផ្ដល់ឱកាស ដើម្បីពិភាក្សា ប្រមូលធាតុចូល ផ្លាស់ប្ដូរបទពិសោធន៍ អំពីបញ្ហាសុវត្ថិភាពចរាចរណ៍ និងបញ្ហាប្រឈមនានា ដើម្បីចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ នៅក្នុងប្រទេសកម្ពុជា និងបង្កើតមូលដ្ឋានគ្រឹះដ៏រឹងមាំសម្រាប់កម្ពុជាក្នុងការអនុវត្តផែនការថ្នាក់តំបន់បន្ថែមទៀតនៅថ្នាក់ជាតិ៕
អត្ថបទ និងរូបភាព: លោឃុត សៅ កែសម្រួលដោយ លីវ សុខុន!!!
