រដ្ឋបាលខេត្តសៀមរាប បានរៀបចំចែកអំណោយជូនដល់គ្រួសារ (ក្រ១.ក្រ២ )ចាសជរា ជនពិការ ចំនួន៣៨៤គ្រួសារ ក្នុងឱកាសបុណ្យខួបកំណើត និងចម្រើនព្រះជន្ម ប្រគេនដល់ព្រះមហាវិមលធម្ម ពិន សែម សិរីសុវណ្ណោ ព្រះរាជាគណ: ថ្នាក់ទ គណ:មហានិកាយ ឧត្តមទីប្រឹក្សាសម្តេចព្រះសង្ឃនាយក សមាជិកថេរសភា ក្នុងព្រះពុទ្ធសាសនា នៃព្រះរាជាណាចក្រកម្ពុជា ព្រះនាយកពុទ្ធិកវិទ្យាល័យរាជបូណ៌ និងជាព្រះគ្រូចៅអធិការវត្តរាជបូណ៌ គម្រប់ ៨៣ ឈានចូល ៨៤ព្រះវស្សា នាព្រឹកថ្ងៃទី២៦ ខែធ្នូ ឆ្នាំ២០២២ នៅក្នុងវត្តរាជបូណ៌ ដោយមានការអញ្ជើញចូលរួមពីឯកឧត្តមអ្នកឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាល នៃគណ:អភិបាលខេត្ត និងលោកជំទាវ ព្រមទាំងឯកឧត្តម លោកជំទាវជាសមាជិក សមាជិកាក្រុមប្រឹក្សាខេត្ត គណ:អភិបាលខេត្ត អស់លោក លោកស្រីជាថ្នាក់ដឹកនាំមន្ទីរ អង្គភាពជុំវិញខេត្ត និងមន្ត្រីរាជការ ព្រមទាំងពុទ្ធបរិស័ទផងដែរ ។
បន្ទាប់ពីលោកគ្រូអាចារ្យ បានធ្វើការរៀបចំទៅតាមក្បួនខ្នាតនៃព្រះសម្មាសម្ពុទ្ធ និង ព្រះសង្ឃសូត្រព្រះបរិតរួចមក មានប្រសាសន៍ សំណេះសំណាលនាឱកាសនោះ ឯកឧត្តម ទៀ សីហា អភិបាល នៃគណ:អភិបាលខេត្ត បានមានប្រសាសន៍ថា ព្រះកិត្តិនាម របស់ព្រះមហាវិមលធម្ម ពិន សែម សិរីសុវណ្ណោ ព្រះរាជាគណ:ថ្នាក់ទោ គណ:មហានិកាយ ឧត្តមទីប្រឹក្សាសម្តេចព្រះសង្ឃនាយក សមាជិកថេរសភាក្នុងព្រះពុទ្ធសាសនា នៃព្រះរាជាណាចក្រកម្ពុជា ព្រះនាយកពុទ្ធិកវិទ្យាល័យរាជបូណ៌ និងជាព្រះគ្រូចៅអធិការវត្តរាជបូណ៌ ព្រះអង្គល្បីរន្ទឺ សុះសាយ ហើយត្រូវបានទទួលស្គាល់ពីប្រជាពុទ្ធបរិស័ទទាំងក្នុង និងក្រៅប្រទេស។ ឯកឧត្តមក៏បានលើកពីអត្ថន័យក្នុងការប្រារព្ធឡើងនេះ គឺដើម្បីសម្តែងនូវការគុណូបការ: និងគុណសម្បតិ្តយ៉ាងច្រើនឥតគណនា របស់ព្រះអង្គមកលើសិស្សគណ គ្រប់អង្គ/រូប ជាពិសេសព្រះអង្គបានលះបង់ និងថ្វាយខ្លួនបម្រើនព្រះពុទ្ធ សាសនាអស់មួយជីវិត ទើបថ្ងៃនេះគណ:អភិបាលខេត្ត ក្រុមប្រឹក្សាខេត្ត លោកជំទាវ ឯកឧត្តម លោកស្រី អស់លោក បានរៀបចំនូវអំណោយ សម្រាប់ធ្វើការចែកជូនដល់បងប្អូនប្រជាពលរដ្ឋយើង នាពេលនេះប្រកប សេចក្តីជ្រះថ្លាក្រែលែង ដើម្បីបានរួមចំណែកបំពេញបុណ្យកុសល ជាមួយឯកឧត្តម លោកជំទាវ លោក លោកស្រី និងបងប្អូនប្រជាពុទ្ធបរិស័ទនាពេលនេះ ។ ស្ថិតក្នុងវរកាលដ៏ប្រពៃថ្លៃថ្លាឧត្តុង្គឧត្តមនេះ ឯកឧត្តម ទៀ សីហា បានឧទ្ទិសបួងសួងកុសល្យផលបុណ្យ ដែលយើងទាំងអស់គ្នាបានធ្វើទាំងអម្បាមាណ ប្រគេនថ្វាយព្រះមហាវិមលធម្ម ពិន សែម សិរីសុវណ្ណោ សូមឲ្យព្រះគ្រូមានសុខភាពល្អបរិបូរណ៍ ព្រះជន្មាយុយឺនយូរជាងរយព្រះវស្សា ដើម្បីគង់ជាម្លប់ព្រះធម៌ដល់សិស្សគណគ្រប់ៗអង្គ/នាក់ បានសិក្សាក្រេបជញ្ជក់នូវចំណេះដឹង ក្នុងវិស័យព្រះពុទ្ធសាសនា នៃយើង ដែលជាសាសនារបស់រដ្ឋ។ ដើមី្បចូលរួម ពិធីបុណ្យខួបកំណើត និងចម្រើនព្រះជន្ម ឯកឧត្តម បានប្រគេននូវគ្រឿងឧបភោគបរិភោគ មានអង្ករ ៥០០គក្រ, ទឹកក្រូច ១០កេស, ទឹកសុទ្ធ ២០កេស, ទឹកត្រី ១០យួរ, ទឹក ស៊ីអុីវ ១០យួរ, ត្រីខ ៥កេស, ទឹកដោះគោ ១កេស, តែ ៥គក្រ, ស្ករស ១០គក្រ និងបច្ច័យ ៥លានរៀល និងសាខាកាកបាទ ក្រហមខេត្ត ថវិកា ២លានរៀល សរុប ៧លានរៀល ។
មានសង្ឃដិកានោះដែរ ព្រះមហាវិមលធម្ម ពិន សែម សិរីសុវណ្ណោ ក៏បានផ្តល់នូវពុទ្ធឱវាទល្អៗជាច្រើន ដើមី្បជាត្រីវិស័យ សម្រាប់ថ្នាក់ដឹកនាំ មន្ត្រីរាជការ និងពុទ្ធបរិស័ទ្ធ យកទៅប្រតិបត្តិនៅក្នុងខ្សែជីវិត និងបម្រើការងារជូនប្រជាពលរដ្ឋ ប្រកបដោយសច្ចធម៌បរិសុទ្ធ សំដៅឆ្ពោះទៅការកសាងប្រទេសជាតិ ឲ្យមានភាពរីកចម្រើនលើគ្រប់វិស័យ។ ព្រះអង្គក៏មានសង្ឃដិកាបញ្ជាក់អំពីផ្លូវបុណ្យ និង ផ្លូវបាប ដែលកើតឡើងដោយអំពើរបស់យើងរាល់គ្នា ហើយផ្លូវបុណ្យ គឺកើតឡើងពីចិត្តរបស់យើង ហើយផ្លូវបាបក៏កើតចេញពីអំពើអាក្រក់របស់យើងផងដែរ ។ ដូច្នេះផ្លូវបុណ្យ ផ្លូវបាប គឺស្ថិតនៅជុំវិញខ្លួនរបស់ យើងនៅគ្រប់ដង្ហើមចេញចូលនៃយើង ។
អំណោយដែលបានចែកជូនដល់បងប្អូនទាំង ៣៨៤គ្រួសារ ដោយមួយគ្រួសារទទួលបាន ឃីត១កញ្ចប់ មាន: ភួយ ,មុង , ក្រម៉ា , សារុង ,ខ្នើយ និង ថវិកា ៤ម៉ឺនរៀល និងរៀបចំអាហារជូនផងដែរ៕
អត្ថបទ និងរូបភាព: លោកម៉ី សុខារិទ្ធ កែសម្រួលដោយ លីវ សុខុន!!!
