កម្មវិធីជិះទូកកំសាន្ដនៅតាមដងស្ទឹងសៀមរាប ដែលរៀបចំឡើងដោយសហភាពសហព័ន្ធយុវជនកម្ពុជា (សសយក) បានចាប់ផ្ដើមហើយនៅថ្ងៃទី២៥ ខែធ្នូ ឆ្នាំ ២០២២នេះ ជាមួយនឹងវត្តមានអ្នកទេសចរណ៍ជាតិ-អន្តរជាតិចូលរួមជាច្រើនកុះករ ដែលជាកម្មវិធីដើម្បីត្រៀមអបអរសាទរពិធីបុណ្យឆ្លងឆ្នាសកល និងដើម្បីទាក់ទាញអ្នកទេសចរទៅទស្សនាខេត្ដសៀមរាប នាថ្ងៃឆ្លងសកល ឆ្នាំ២០២៣ខាងមុខ។
បើតាមលោក សេង វិចិត្រ ប្រធានក្រុមការងាររៀបចំជិះទូកកំសាន្ដ របស់សហភាពសហព័ន្ធយុវជនកម្ពុជា មានប្រសាសន៍ថា ការរៀបចំជិះទូកកំសាន្ដនេះធ្វើឡើងរយៈ ៧ថ្ងៃចាប់ពីថ្ងៃទី២៥ ខែធ្នូ ឆ្នាំ២០២២ ដល់ថ្ងៃទី០១ ខែមករា ឆ្នាំ២០២៣ នៅតាមបណ្តោយស្ទឹងសៀមរាប ដើម្បីត្រៀមអបអរសាទរពិធីបុណ្យឆ្លងឆ្នាំ និងចូលឆ្នាំសកល២០២៣ ខាងមុខនេះ ក្រោមកិច្ចសហការជាមួយរដ្ឋបាលខេត្ត និងមន្ទីរអង្គភាពពាក់ព័ន្ធនានាទូទាំងខេត្តសៀមរាប។ កម្មវិធីជិះទូកកំសាន្ដនេះ គឺមានទីតាំងចាប់ពីស្ពានថ្មព្រះរាជដំណាក់ ដល់ស្ពានថ្មវត្តដំណាក់ ដោយមានទូកហង្ស និងទូកអុំជាច្រើនគ្រឿង មកពីតំបន់ទេសចរទន្លេសាបចុងឃ្នៀស និងតំបន់ទេសចរណ៍កំពង់ភ្លក់ ដើម្បីបំរើឱ្យអ្នកទេសចរ។
លោក សេង វិចិត្រ បានបញ្ជាក់ថា ក្នុងកម្មវិធីជិះទូករយៈពេល៧ថ្ងៃនេះដែរ ក៏នឹងមានកម្មវិធីសប្បាយជាច្រើនទៀតរួមមាន៖ ការតាំងពិព័រណ៍អាហារ កម្មវិធីប្រគុំតន្រ្តីជាដើម ដែលការរៀបចំកម្មវិធីនេះក្នុងគោលបំណងទាក់ទាញភ្ញៀវទេសចរណ៍ជាតិ និងអន្តរជាតិ ចូលរួមកម្សាន្តសប្បាយ ស្វែងយល់ពីវប្បធម៌ទំនៀមទម្លាប់ ប្រពៃណី របស់ប្រជាពលរដ្ឋខ្មែរ ក៍ដូចជាជួយដល់សេដ្ឋកិច្ចប្រជាពលរដ្ឋក្នុងខេត្តសៀមរាបផងដែរ។
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ ០១សាវី
កែសម្រួល៖ លោក អ៊ុន ណារាជ្យ
