នៅសាលាខេត្តសៀមរាប នៅព្រឹកថ្ងៃទី១៨ ខែមករា ឆ្នាំ២០២៣នេះ មន្ទីរបរិស្ថានខេត្ត បានរៀបចំកិច្ចប្រជុំបូកសរុបលទ្ធផលការងារបរិស្ថានប្រចាំឆ្នាំ២០២២ និងលើកទិសដៅការងារសម្រាប់អនុវត្តបន្តឆ្នាំ២០២៣ ក្រោមអធិបតីភាព ឯកឧត្តម សៅ សុភាព រដ្ឋលេខាធិការក្រសួងបរិស្ថាន លោក ឃឹម ហ្វីណង់ អភិបាលរងខេត្ត រួមនឹងវត្តមានឯកឧត្តម លោកជំទាវ ប្រតិភូក្រសួងបរិស្ថាន ថ្នាក់ដឹកនាំមន្ទីរអង្គភាពពាក់ព័ន្ធ អាជ្ញាធរក្រុងស្រុក រួមនឹងតំណាងអង្គការដៃគូ ក្រុមហ៊ុនពាក់ព័ន្ឋជាច្រើនរូប។
បន្ទាប់ពីលោកប្រធានមន្ទីរបរិស្ថានខេត្ត បានជម្រាបជូនពិរបាយការណ៍រួចរាល់ លោក ឃឹម ហ្វីណង់ អភិបាលរងខេត្ត បានមានប្រសាសន៏ថា ការរៀបចំហេដ្ឋារចនាសម្ព័ន្ធ និងសម្បទាទេសចរណ៍ធម្មជាតិក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ការចូលរួមកិច្ចសហការជាមួយវិស័យឯកជន ក្នុងការអនុវត្តគម្រោងអភិវឌ្ឍន៍ទេសចរណ៍ផ្សារភ្ជាប់នឹងធម្មជាតិខ្នាតតូចក្រោម ១០ហិកតា សុទ្ធសឹងតែជាការងារចម្បងដែលមន្ទីរបានចូលរួមអនុវត្ត ក្នុងគោលបំណងពង្រឹងការអភិវឌ្ឍសេដ្ឋ-កិច្ចមូលដ្ឋាន ឈានទៅរកការរស់នៅដោយចីរភាព និងរក្សាបាននិរន្តរភាពបរិស្ថាន។
លោកបន្តថា ក្នុងនាមក្រុមប្រឹក្សាខេត្ត គណៈអភិបាលខេត្ត សូមថ្លែងការកោតសរសើរ និងទទួលស្គាល់នូវសមិទ្ធផលទាំងអស់ ដែលមន្ទីរបរិស្ថានសម្រេចបានក្នុងឆ្នាំ២០២២។ ជាមួយគ្នានេះ រដ្ឋបាលខេត្តនឹងបន្តផ្តល់ការគាំទ្រលើការអនុវត្តតួនាទី និងភារកិច្ចរបស់មន្ទីរបរិស្ថានខេត្តឱ្យបានរលូន ហ្មត់ចត់ និងលើកទឹកចិត្តក្នុងការអនុត្តនូវផែនការសកម្មភាពបន្តសម្រាប់ឆ្នាំបន្ទាប់។ ក្នុងនោះលោក ក៏បានសម្តែងការកោតសរសើរដល់មន្ទីរបរិស្ថានខេត្ត ដែលបាននឹងកំពុងជំនះរាល់ការលំបាក និងបានដោះស្រាយប្រកប ដោយប្រសិទ្ធភាព ស្តែងចេញពីភាពជាអ្នកដឹកនាំ ការខិតខំប្រឹងប្រែងរបស់មន្ត្រីគ្រប់ជាន់ថ្នាក់ផ្អែកលើបទពិសោធន៍ និងមេរៀនកន្លងមករួមជាមួយនឹងការពិគ្រោះយោបល់ជាមួយថ្នាក់ដឹកនាំខេត្ត និងក្រសួងបរិស្ថាន និងមានកិច្ចសហ-ការល្អជាមួយស្ថាប័នពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់ អង្គការជាតិ អន្តរជាតិ និងដៃគូអភិវឌ្ឍន៍ ដើម្បីសម្រេចបាននូវលទ្ធផលទាំងនេះ។
មានប្រសាសន៍ក្នុងឱកាសនោះ ឯកឧត្តម សៅ សុភាព បានលើកឡើងថា គ្រប់សមទ្ឋិផលពាក់ព័ន្ឋនឹងវិស័យបរិស្ថាន ដែលមន្ទីរបរិស្ថានខេត្តសៀមរាប សម្រេចបានមិនមែនកើតឡើងពីការអនុវត្តតែឯកឯងនោះទេ វាត្រូវមានការចូលរួមគាំទ្រពីគ្រប់សមាសភាពពាក់ព័ន្ឋទាំងអស់ ទើបប្រសិទ្ឋផលការងារទទួលបានលទ្ឋផលល្អប្រសើរ កត្តាមួយទៀត គឺការសាមគ្គីភាពឯកភាពផ្ទៃក្នុង តាមរយៈការចែករំលែកនិងការយកចិត្តទុកដាក់ទៅលើកការគាំពារដល់មន្ត្រីរាជការនៅក្រោមឱវាទ។ ជាមួយគ្នានោះខេត្តសៀមរាប ជាប៉ូលទេសចរណ៍ទី២ របស់កម្ពុជាបន្ទាប់ពីរាជធានីភ្នំពេញ ដែលបញ្ហាសំរាមវាពាក់ព័ន្ឋទៅនឹងមុខមាត់ និងភាពថ្លៃថ្នូររបស់យើង ដោយការទុកដាក់សំណល់សំរាមមិនបានត្រឹមត្រូវវាបង្ហាញពីឥរិយាបទ កិរិយារបស់បុគ្គលខ្វះសណ្តាប់ធ្នាប់ ខ្វះអនាម័យ ដែលនាំឱ្យជះឥទ្ឋិពលមិនល្អដល់សហគមន៍និងសង្គមជាតិយើងទាំងអស់គ្នា។
ជាមួយគ្នានោះ ឯកឧត្តម បានជម្រុញដល់មន្ទីរបរិស្ថាន ត្រូវបង្កើនការយកចិត្តទុកដាក់ខ្ពស់ លើការពិភាក្សាក្នុងក្របខណ្ឌនៃការអនុវត្តគម្រោងផលិតជីសរីរាង្គក្រោមជំនួយពីសាធារណៈរដ្ឋបារាំង និងអនុវត្តគម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» ដោយការពង្រឹងការអនុវត្តច្បាប់ក្នុងតំបន់ការពារធម្មជាតិ ការលើកកម្ពស់ជីវភាពសហគមន៍មូលដ្ឋាន តាមរយៈការប្រែក្លាយតំបន់ដែលមានសក្តានុពលជាតំបន់អេកូទេសចរណ៍ និងពង្រឹងប្រសិទ្ធភាព នៃការផ្តល់សេវាកម្មរបស់ប្រជាសហគម ក្នុងសហគមន៍តំបន់ការពារធម្មជាតិ និង អនុវត្តគម្រោង «ជម្រុញការគ្រប់គ្រងប្រព័ន្ធអេកូឡូស៊ីសម្រាប់ជីវភាពរស់នៅប្រកបដោយចីរភាពក្រោមក្របខណ្ឌកិច្ចសហប្រតិបត្តិការមេគង្គ-ឡានឆាង» ក្នុងការគ្រប់គ្រង និងស្តារប្រព័ន្ធអេកូឡូស៊ីនៅក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ព្រមទាំងរៀបចំហេដ្ឋារចនាសម្ព័ន្ធ និងសម្បទាទេសចរណ៍ធម្មជាតិនៅក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន» និងផ្តល់កិច្ចការជាមួយវិស័យឯកជន ក្នុងការ វិនិយោគគម្រោងទេសចរណ៍ផ្សារភ្ជាប់នឹងធម្មជាតិខ្នាតតូចក្រោម ១០ហិកតា ដែលទទួលបានការអនុញ្ញាតជាគោលការណ៍ពីក្រសួងបរិស្ថាន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
