ដោយសារមើលឃើញពីកំណើននៃការប្រើប្រាស់សេវារបស់សាខាធនាគារ ABA ក្នុងខេត្តសៀមរាប ជាពិសេសសាខាធនាគារស្ថិតនៅលើផ្លូវស៊ីវត្ថា នៅជិតផ្សារកណ្ដាល ក្រុងសៀមរាប នៅរសៀលថ្ងៃទី១៨ ខែមករា ឆ្នាំ២០២៣នេះ ធនាគារ ABA បានប្រកាសផ្លាស់ប្ដូរទីតាំងចាស់ មកកាន់ទីតាំងថ្មី ដែលស្ថិតតាមផ្លូវអាចារ្យស្វា ភូមិវត្តបូព៌ សង្កាត់សាលាកំរើក ក្រុងសៀមរាប ទល់មុខវត្តព្រះព្រហ្មរ័ត្ន ព្រមជាមួយអគារធំផ្ដល់ផាសុខភាព ចំណតធំទូលាយ ដែលងាយស្រួលដល់ការមកទទួលសេវារបស់អតិថិជន។
មានប្រសាសន៍ ក្នុងពិធីសម្ពោធសាខាធនាគារ ABA ថ្មី តាមបណ្ដោយស្ទឹងសៀមរាបនេះ លោក យិន ចិន្ដាភក្ដី ប្រធានសាខាប្រចាំខេត្តសៀមរាប លើកឡើងថា ធនាគារ ABA ពិតមានកិត្តិយសណាស់ ដែលសមាជិកក្រុមប្រឹក្សាភិបាល នៃធនាគារជាតិនៃកាណាដា ដែលជាម្ចាស់ភាគហ៊ុនរបស់យើង បានចុះមកបំពេញទស្សនកិច្ចការងារ នៅប្រទេសកម្ពុជា ជាពិសេសជាថ្ងៃសម្ពោធអគារសាខាធនាគារ ABA ខេត្តសៀមរាបថ្មីជាផ្លូវការ។ នេះបានបង្ហាញពីសារៈសំខាន់នៃប្រតិបត្តិការរបស់ ABA ចំពោះម្ចាស់ភាគហ៊ុន និងបង្ហាញពីការគាំទ្ររបស់ពួកគាត់ ចំពោះវឌ្ឍនភាពរបស់យើង។
លោក បញ្ជាក់ថា សម្រាប់ទីតាំងថ្មីនេះ បានបំពាក់បន្ថែមនូវម៉ាស៊ីនដក ដាក់ប្រាក់ និង Self-Banking ជាដើម ដែលជួយដល់ការមកទទួលសេវារបស់អតិថិជនកាន់តែឆាប់រហ័ស ព្រមជាមួយចំណតយានយន្តធំទូលាយ បរិយាកាស អមដោយធម្មជាតិដ៏ស្រស់បំព្រងនៅតាមបណ្ដោយស្ទឹងសៀមរាប។ លោកបន្តថា បន្ថែមពីលើសេវាកម្មពេញលេញ ដែលផ្តល់ជូនដោយបុគ្គលិកមានវិជ្ជាជីវៈរបស់យើងនៅតាមសាខា អតិថិជន ABA ក៏អាចប្រើប្រាស់ម៉ាស៊ីនស្វ័យសេវា ២៤ ម៉ោងលើ ២៤ម៉ោង និង ៧ថ្ងៃក្នុងមួយសប្តាហ៍ ដែលមាននៅតាមសាខាផងដែរ។
លោក យិន ចិន្ដាភក្ដី បានថ្លែងអំណរគុណយ៉ាងជ្រាលជ្រៅបំផុត ចំពោះអតិថិជនរបស់ធនាគារ ABA ដែលបានគាំទ្រ និងជឿទុកចិត្តមកលើ ABA ជាជម្រើសធនាគារល្អបំផុតរបស់ពួកគាត់។ យើងខ្ញុំនឹងរង់ចាំបម្រើសេវាកម្មជូនលោកអ្នកដោយក្តីរីករាយនៅឆ្នាំ 2023 និងឆ្នាំក្រោយៗទៀត ជាមួយនឹងផលិតផលជាច្រើនពីធនាគាយើងខ្ញុំ ទៅតាមតម្រូវការពិតប្រាកដរបស់លោកអ្នក។
គួរជម្រាបថា ធនាគារ ABA បានចាប់ផ្តើមប្រតិបត្តិការនៅក្នុងខេត្តសៀមរាប ចាប់តាំងពីឆ្នាំ២០០៧ បច្ចុប្បន្នសាខាធនាគារនេះមាន ៣ទីតាំងក្នុងក្រុងសៀមរាប និងមានអតិថិជនកំពុងប្រើប្រាស់សេវាប្រមាណ៣ម៉ឹននាក់ និងជាង២លាននាក់នៅទូទាំងប្រទេស។
អត្ថបទ និងរូបភាព៖ លោក សេង ផល្លី
