ការប្រកួតបាល់ទាត់ពានរង្វាន់ ២៩ធ្នូ ដែលធ្វើឡើងលើកដំបូងនៅក្នុងខេត្ដសៀមរាប ត្រូវបានបានបិទបញ្ចប់ហើយនៅរសៀលថ្ងៃទី១៩ ខែមករាឆ្នាំ២០២៣នេះ បន្ទាប់ពីបានធ្វើការប្រកួតដ៏ស្វិតស្វាញអស់រយ:ពលជាច្រើនថ្ងៃកន្លងមក ដែលមានក្រុមកីឡាករទាំង ១២សង្កាត់ ក្នុងក្រុងសៀមរាប ។
លោក ស៊ុន ចំណាន អ្នករៀបចំកម្មវិធីប្រកួតបានឱ្យដឹងថា ការប្រកួតកីឡាពាន់រង្វាន់បាល់ទាត់ ២៩ធ្នូនេះ ធ្វើឡើង ដើម្បីរំលឹកដល់គុណ នៃទិវានយោបាយឈ្នះ ឈ្នះ ថ្ងៃទី២៩ ធ្នូ និងប្រតិបត្តិករនយោបាយឈ្នះ ឈ្នះផងដែរ។ ដឹងគុណស្ថាបនិកមគ្គុទ្ទេសក៍ឯក និងប្រតិបត្តិករនយោបាយឈ្នះ ឈ្នះ ដែលនាំមកនូវសន្តិភាព និងការឯកភាពជាតិពេញលេញ ដែលចលនាយុវជនឱ្យមានការគិតគូរអំពីសុខភាព មិត្តភាព ការផ្សារភ្ជាប់ទំនាក់ទំនងល្អយុវជននៅក្នុងសង្កាត់ និងក្នុងក្រុងសៀមរាប។ ជាមួយគ្នានោះ ក៏ជាការជំរុញយុវជនឱ្យចូលរួមលេងកីឡា ដើម្បីជៀសផុតពីអំពើអបាយមុខផ្សេងៗ ជាពិសេស គឺបំផុសបំផុលសកម្មភាពបាល់ទាត់នៅក្នុងខេត្តសៀមរាប ដែលជាផ្នែកមួយនៃការអភិវឌ្ឍន៍វិស័យកីឡាបាល់ទាត់នៅកម្ពុជា។ លោក បន្ដថា កីឡាករជាយុវជននៅតាមបណ្តាសង្កាត់ទាំង១២ ក្នុងក្រុងសៀមរាប តែមិនមែនជាកីឡាករអាជីពនោះទេ ដែលមួយសង្កាត់មានកីឡាករ ១៥នាក់ និងថ្នាក់ដឹកនាំក្រុម ៥នាក់ កីឡាករសរុប ១៨០នាក់ និងថ្នាក់ដឹកនាំក្រុម ៦០នាក់។ រូបមន្តប្រកួត ៧នាក់ ទល់នឹង ៧នាក់ ដោយប្រើប្រាស់ច្បាប់ដូចគ្នាទៅនឹងច្បាប់ទីលាន ១១នាក់ ទល់នឹង ១១នាក់ផងដែរ។ ការប្រកួតជម្រុះ បានចាប់ផ្តើមពីថ្ងៃទី២៦ ខែវិច្ឆិកា ឆ្នាំ២០២២។
ឯកឧត្តម ទៀសីហា អភិបាលខេត្ដសៀមរាប មានប្រសាសន៍ថា វិស័យកីឡា គឺជាចលករមួយដ៏សំខាន់ ក្នុងវិស័យទេសចរណ៍ ក៏ជាសម្ព័ន្ធភាពមួយដ៏សំខាន់ ក្នុងការទំនាក់ទំនងប្រាស្រ័យទាក់ទងគ្នា និង ធ្វើឲ្យកាយសម្បទាយើងមានភាពរឹងមាំ សុខភាពមាំមួនទៀតផង ។ ឯកឧត្តម ក៏បានបន្តទៀតថា នេះជាលើកទី១ហើយ ដែលក្រុមសហភាពសហព័ន្ធយុវជនក្រុងសៀមរាប បានរៀបចំការប្រកួតពានរង្វាន់បាល់ទាត់ ២៩ធ្នូ ក្នុងការរំលឹកដល់គុណ នៃទិវានយោបាយឈ្នះ ឈ្នះ ថ្ងៃទី២៩ ធ្នូ ក្រោមពាក្យស្លោក អរគុណសន្តិភាព។ ជាមួយគ្នានោះ ការប្រកួតកីឡានេះ គឺធ្វើឲ្យយុវជន សិស្សានុសិស្ស និងមហាជនយើងបង្កើនសាមគ្គីភាព និងមានទំនាក់ទំនងល្អរវាងសង្កាត់ និងសង្កាត់ ឃុំ និងឃុំ ស្រុក និងស្រុក ខេត្ត និងខេត្ត ដើម្បីពង្រឹងការយកចិត្តទុកដាក់លើវិស័យអប់រំកាយនិងកីឡា នៅតាមសាលារៀនទូទាំងខេត្ត ក៏ជាការចូលរួមលុបបំបាត់ការប្រើប្រាស់គ្រឿងញៀន នៅក្នុងសាលារៀន សហគមន៍ និងនៅទីសាធារណ:ជាដើម ។ ឯកឧត្ដមបន្ថែមថា កាប្រកួតពានរង្វាន់នេះ នឹងបន្តធ្វើជារៀងរាល់ឆ្នាំ ទៅតាមរូបភាព នៃពានរង្វាន់ ដោយមានការចូលរួមប្រកួតពីគ្រប់វិទ្យាល័យ អនុវិទ្យាល័យ ក្រុង ស្រុក និងមហាជន ឃុំ សង្កាត់ ក្នុងការជម្រុញឲ្យវិស័យកីឡានៅខេត្តសៀមរាប មានការអភិវឌ្ឍន៍ ព្រោះលេងកីឡាធ្វើឲ្យរាងកាយ សុខភាពរឹងមាំ ។ ឯកឧត្តមជម្រុញដល់ក្រុមកីឡាទាំងអស់ ត្រូវបង្កើនការហ្វឹកហាត់បន្តទៀត ហើយការប្រកួតពេលនេះ ក៏ជាការដកស្រងបទពិសោធន៍បច្ចេកទេសពីគ្នាទៅវិញទៅមក និងកុំមោទកភាពចំពោះជ័យជន្នះរបស់ខ្លួន គឺត្រូវបង្កើនការហ្វឹកហាត់ឲ្យមានគុណភាព និងទៅលទ្ធផលល្អ ដើមី្បរក្សាឲ្យបាននូវភាពជោគជ័យរបស់នៅពេលក្រោយៗទៀត៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
