សៀមរាបជាខេត្តប៉ូលសេដ្ឋកិច្ចសំខាន់មួយ បន្ទាប់ពីរាជធានីភ្នំពេញ ហើយការអនុវត្តន៍ប្លង់គោលនៅខេត្តសៀមរាប ជាពិសេសនៅទីក្រុងសៀមរាប វានឹងធើ្វឲ្យទីក្រុងពាណិជ្ជកម្ម និងទេសចរណ៍មួយនេះ នឹងផ្ដល់គុណភាពបរិស្ថានដល់ការរស់នៅរបស់ប្រជាពលរដ្ឋ ប្រកបទៅដោយសុខដុមរមនាល្អ។
នេះបើតាមប្រសាសន៍ ឯកឧត្តមបណ្ឌិត ឌុច វនទីតូ អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លើកឡើង នៅក្នុងសិក្ខាសាលាស្តីពី “ការផ្សព្វផ្សាយប្លង់គោលប្រើប្រាស់ដីនៅក្នុងក្រុងសៀមរាប ខេត្តសៀមរាប សម្រាប់ការអភិវឌ្ឃ និងការអភិរក្សប្រកបដោយចីរភាព” នៅសាលាខេត្តសៀមរាប នាព្រឹកថ្ងៃទី០២ ខែមេសា ឆ្នាំ២០១៩ ។
ឯកឧត្តមបណ្ឌិត ឌុច វនទីតូ បានឲ្យដឹងថា សិក្ខាសាលានេះមានគោលបំណង ផ្សព្វផ្សាយប្លង់គោលប្រើប្រាស់ដីក្នុងក្រុងសៀមរាប និងបទដ្ឋានគតិយុត្ត សម្រាប់ការអភិវឌ្ឍ និងការអភិរក្សប្រកបដោយចីរភាព ដល់អាជ្ញាធរខេត្ត មន្ទីរ អង្គភាពពាក់ព័ន្ធ អាជ្ញាធរនៅតាមមូលដ្ឋាន និងផ្នែកឯកជននៃខេត្តសៀមរាប។ ក្នុងនោះ ប្លង់គោលប្រើប្រាស់ដីក្រុងសៀមរាប ត្រូវបានសម្រេចដាក់ឲ្យប្រើប្រាស់ជាផ្លូវការ ដោយសេចក្តីសម្រេចលេខ ០០៤ សសរ ចុះថ្ងៃទី០៥ ខែកញ្ញាឆ្នាំ ២០១៨ ដែលជាសមិទ្ធផលថ្មីបន្ថែមទៀត នៃការអនុវត្តនយោបាយជាតិស្ដីពីការរៀបចំដែនដីនៃព្រះរាជាណាចក្រកម្ពុជានិងចូលរួមចំណែកអនុវត្តកាន់តែសកម្មនិងស៊ីជម្រៅថែមទៀតនូវការកែទម្រង់ដីធ្លី។
ឯកឧត្តមបណ្ឌិត បានគូសបញ្ជាក់ថា ពាក់ព័ន្ធនឹងការរៀបចំប្លង់គោលនៅក្រុងសៀមរាបនេះ វាបានកំណត់ចក្ខុវិស័យយ៉ាងច្បាស់លាស់ ក្នុងការរៀបចំតំបន់ទាំងអស់ក្នុងក្រុង ដែលរួមមាន ទីកន្លែងស្នាក់នៅរបស់ប្រជាពលរដ្ឋ ទីតាំងសម្រាប់ធ្វើការងារ ការផ្សារភ្ជាប់អំពីការដឹកជញ្ជូន និងចរាចរណ៍ និង កន្លែងកំសាន្តនានាជាដើម។
ឯកឧត្តមបណ្ឌិត បានបញ្ជាក់បន្ថែមថា ជាលទ្ធផលនៃការរៀបចំដែនដី និងនគរូបនីយកម្ម មិនត្រឹមតែជួយរួមចំណែក ធានាឲ្យមានការអភិវឌ្ឍ និងការអភិរក្សប្រកបដោយចីរភាពតុល្យភាព និងសមធម៌ប៉ុណ្ណោះទេ វាថែមទាំងបានរួមចំណែកយ៉ាងសំខាន់ ក្នុងការជម្រុញកំណើនសេដ្ឋកិច្ចកម្ពុជាក្នុងរង្វង់ ៧ភាគរយ ក្នុងមួយឆ្នាំ តាមរយៈកំណើននៃការអភិវឌ្ឍវិស័យសំណង់ជារៀងរាល់ឆ្នាំ។ ដែរនេះ ស្របទៅតាម កម្មវិធីនយោបាយរបស់រាជរដ្ឋាភិបាលនីតិកាលទី ៦ និងយុទ្ធសាស្ត្រចតុកោណដំណាក់កាលទី ៤ ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ខមន្ត្រី នៃព្រះរាជាណាចក្រកម្ពុជា ដែលសម្ដេចតែងតែបានគិតគូរជាអាទិភាព ក្នុងការបន្តកាត់បន្ថយភាពក្រីក្ររបស់ប្រជាជន ធ្វើឲ្យមានកំណើនសេដ្ឋកិច្ចខ្ពស់ និងអភិវឌ្ឍប្រទេសប្រកបដោយប្រសិទ្ធភាពចីរភាព សមធម៌ និងវិបុលភាព។
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
