ថ្ងៃទី០២ ខែមេសា ឆ្នាំ២០១៨ នៅសាលាគរុកោសល្យ និងវិក្រឹតការខេត្តសៀមរាប បានរៀបចំពិធីបូកសរុបលទ្ធផលការងារឆមាសទី១ ប្រចាំឆ្នាំ២០១៨-២០១៩ ដែលមានការនិមន្តចូលរួមដ៏ខ្ពងខ្ពស់ពី ព្រះសុមង្គលសីលាចារ្យ អាភាករោ ជុំ គឹមឡេង ព្រះមេគុណខេត្ត និងព្រះសាសនសត្ថាព្រះរាជាគណថ្នាក់កិត្តិយសជាព្រះបាឡាត់វិមលប្បញ្ញា កេសវណ្ណោ តង តន និងជាព្រះចៅអធិការវត្តព្រះព្រហ្មរតន៍ក្រុង- ខេត្តសៀមរាប ពុទ្ធបរិស័ទចំណុះជើងវត្តព្រហ្មរតន៍ ក៏ដូចជាលោកនាយក នាយិកា លោកគ្រូអ្នកគ្រូ និងគរុសិស្សទាំងពីរជំនាន់ផងដែរ។
មានសង្ឃដីកាចូលរួមក្នុងកម្មវិធីនោះ ព្រះបាឡាត់វិមលប្បញ្ញា កេសវណ្ណោ តង តន ព្រះចៅអធិការវត្តព្រះព្រហ្មរតន៍ មានសង្ឃដីកាថា ពាក្យថាគរុ គឺមានន័យថាធ្ងន់ដូច្នេះក្មូយៗ ដែលជាគរុសិស្សទាំងអស់ ត្រូវតាំងចិត្តឲ្យធ្ងន់នឹងខិតខំប្រឹងប្រែងអប់រំទូន្មានក្មេងៗ សិស្សានុសិស្ស ដែលជាទំពាំងស្នងឬស្សី ឲ្យមានព្រហ្មវិហារធម៌ល្អ ដើម្បីជាគំរូល្អនៅក្នុងសង្គមក្លាយជាធនធានយ៉ាងសំខាន់ ក្នុងការជួយអភិវឌ្ឍប្រទេសជាតិឲ្យមានការរីកចម្រើន។ កាលណាបើយើងជាអ្នកគំរូហើយបានសាបព្រោះគំរូល្អៗ ដល់អ្នកជំនាន់ក្រោយនោះ នឹងធ្វើឲ្យពួកគេក្លាយជាគ្រាប់ពូជល្អ ជាមនុស្សដែលមានចំណេះដឹង មានការគិតពិចារណាខ្ពស់ នឹងជាសសរទ្រូងនៃប្រទេសជាតិ។
ឆ្លៀតក្នុងឱកាសនោះ ដើម្បីជាការលើកទឹកចិត្តដល់លាកគ្រូអ្នកគ្រូ ដែលបានលះបង់ទាំងកម្លាំងកាយចិត្តក្នុងការខិតខំប្រឹងប្រែងបង្រៀនអប់រំទូន្មានសិស្សទាំងអស់ឲ្យមានចំណេះដឹង មានសុជីវធម៌ល្អ និងឥរិយាល្អក្នុងសង្គម ព្រះបាឡាត់វិមលប្បញ្ញា កេសវណ្ណោ តង តន ព្រះចៅអធិការវត្តព្រះព្រហ្មរតន៍ និងពុទ្ធបរិស័ទចុះជើងវត្ត បាននាំយកមហាទ័យទានមកចែកជូនគរុសិស្សចំនួន១២ថ្នាក់ នៃជំនាន់ទី៣៦ និងជំនាន់ទី៣៧ មានចំនួនសរុប ៤៥០នាក់ ដែលក្នុងមួយថ្នាក់ៗ ទទួលបានថវិកាចំនួន៤០០,០០០រៀល ទឹកសុទ្ធមួយកេស ទឹកក្រូចមួយកេស និងមីចំនួនមួយកេស ដោយឡែកគរុសិស្សប្រុសទទួលបានក្រមាពោះគោម្នាក់១ គរុសិស្សស្រីសារ៉ុងម្នាក់១ រីឯលោកគ្រូអ្នកគ្រូក៏ទទួលបានថវិកាម្នាក់ចំនួន១០០,០០០រៀលផងដែរ។
អត្ថបទ និង រូបថត ៖ លោក វ៉ាន់ លីហួង និងលោក ថៃ មករា
កែសម្រួលអត្ថបទ ៖ លោក សេង ផល្លី
