ការប្រឡង សិស្សពូកែថ្នាក់ខេត្តថ្នាក់ទី៩ និងថ្នាក់ទី១២ សម្រាប់ខេត្តត្បូវឃ្មុំ បានធ្វើការរៀបចំជាថ្នាក់កម្រង ថ្នាក់ក្រុង ស្រុក និងថ្នាក់ខេត្តដោយសម្រិតសម្រាំងបានជ័យលាភី ថ្នាក់ខេត្តចំនួន ២១រូប សម្រាប់ទៅប្រកួតប្រជែងថ្នាក់ជាតិ នាថ្ងៃទី ២១ មេសា ២០១៩ នៅខេត្តសៀមរាប នេះបើតាមរបាយការណ៍ លោក អ៊ិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្ត។
មានប្រសាសន៍ជួបសំណេះសំណាល សិស្សពូកែថ្នាក់ខេត្ត នៅថ្ងៃទី០២ ខែមីនា ឆ្នាំ២០១៩នេះ ឯកឧត្តមបណ្ឌិត ជាម ច័ន្ទសោភ័ណ បានផ្តល់អនុសាសន៍ល្អៗ ដល់បេក្ខជនជ័យលាភី សូមឲ្យជៀសឆ្ងាយពីគ្រឿងញៀន គោរពច្បាប់ចរាចរណ៍ លេងកីឡា និងចូលរួមចំណែកក្នុងការងារសង្គមឲ្យបានផុលផុស ។
ឯកឧត្តមបណ្ឌិត ថ្លែងគូសបញ្ជាក់ថា ដោយប្រទេសយើងមានសុខសន្តិភាពក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រី ធ្វើឲ្យយើងមានការអភិវឌ្ឍ និងបង្កើនមូលធនដល់ក្មេងៗជំនាន់ក្រោយ ។
ឯកឧត្តមបណ្ឌិត អភិបាលខេត្ត បានថ្លែងនូវការកោតសរសើរដល់ប្អូនៗ ដែលជាទំពាំងស្នងប្ញស្សី ជាពិសេសលោកគ្រូអ្នកគ្រូ និងឪពុកម្តាយ ជាអាណាព្យាបាលសិស្ស ដែលតែងតែជំរុញ និងលើកទឹកចិត្តដែលធ្វើឲ្យ ពួកគេសម្រេចបាននាពេលនះ។ ព្រមទាំងផ្តាំផ្ញើឲ្យចេះស្រលាញ់គ្នា និងសាមគ្គីគ្នា យកចិត្តទុកដាក់ ក្នុងការប្រលងសិស្សពូកែថ្នាក់ខេត្ត និងជូនពរឲ្យជោគជ័យ ទទួលបានជ័យលាភី ក្នុងការប្រឡង ដើម្បីយកត្តិយសជូនសាលា និងលោកគ្រូអ្នកគ្រួ ឪពុកម្តាយ ដែលជាអាណាព្យាបាល និងសំរាប់ខ្លួនឯងផ្ទាល់ ជាពិសេសត្រូវខិតខំប្រឹងប្រែង បន្ថែមបន្តទៀត ដើម្បីប្រឡងឲ្យជាប់មធ្យមសិក្សាទុតិយភូមិ នាពេលខាងមុខនេះ។
នៅក្នុងឱកាសនោះឯកឧត្តមបណ្ឌិត ជាម ច័ន្ទសោភ័ណ បានចែកបណ្ណសរសើរ សំភារៈសិក្សា និងថវិការមួយចំនួន ដល់សិស្សពូកែពីលេខ១ ដល់លេខ៣ ទាំង២១នាក់ផងដែរ។ បន្ថែមលើសពីនេះផងដែរ ឯកឧត្តមអភិបាលខេត្ត បានឧបត្ថម្ភដល់វិទ្យាល័យទូទាំងខេត្ត ដោយវិទ្យាល័យនីមួយៗ ទទួលបានថវិកា មួយលានរៀល ដើម្បីចួលរួមរៀបចំព្រឹត្តិការណ៍សង្ក្រាន្តប្រចាំសាលា សម្រាប់ឆ្នាំថ្មីប្រពៃណីជាតិខែ្មរខាងមុខនេះ។ ជាមួយគ្នានោះដែរ ឯកឧត្តមអភិបាលខេត្ត ក៍បានសន្យាដល់សិស្សានុសិស្សថ្នាក់ទី១២ ទាំងអស់ដែលបានប្រឡងជាប់និទ្ទេសA ក្នុងឆ្នាំសិក្សា ២០១៨-២០១៩ ដោយឧបត្ថម្ភកុំព្យូរទ័រយួរដៃមួយគ្រឿង ផងដែរ។
គួរជម្រាបថា ក្នុងពិធីជួបសំណេះសំណាលជាមួយសិស្សានុសិស្ស ដែលបានប្រឡងជាប់ជ័យលាភី សិស្សពូកែថ្នាក់ខេត្តថ្នាក់ទី៩ និងថ្នាក់ទី១២ នៅសាលប្រជុំគណៈបញ្ជា្កការឯកភាពសាលាខេត្ត ត្បូងឃ្មុំនេះដែរ ក៏មានការអញ្ជើញចូលរួម ពីសំណាក់អភិបាលរងខេត្ត នាយក នាយករងរដ្ឋបាល សាលាខេត្ត ថ្នាក់ដឹកនាំមន្ទីរអប់រំ យុវជន និងកីឡា លោក លោកស្រីប្រធានមន្ទីរអង្គភាពជុំវិញខេត្ត មាតាបិតាអាណាព្យាបាលសិស្ស លោកនាយក លោកគ្រូ អ្នកគ្រូសរុបប្រមាណ ១២០នាក់។
អត្ថបទ និង រូបថត ៖ មន្ទីរព័ត៌មានខេត្តត្បូងឃ្មុំ
