តាមទំនៀមទំម្លាប់ អ្នកខេត្តសៀមរាប ជាពិសេសស្ថិតក្នុងសង្កាត់ចុងឃ្នៀស និងសង្កាត់សៀមរាប ពិធីបូជាព្រះសព និងទក្ខិណានុប្បទាន ប្រគេនដល់ព្រះសពព្រះចៅអធិការវត្ត តែងមានពិធីមួយហៅថា ការលួចព្រះសព។ ជាក់ស្ដែង ព្រះសព ព្រះតេជគុណ ហាប់ ចយ ព្រះរាជាគណៈថ្នាក់កិត្តិយស និងជាអតីតព្រះចៅអធិការវត្តភ្នំខាងក្រោម បានអនិច្ចធម្មកាលពី ថ្ងៃទី ០៥ ខែមករា ឆ្នាំ ២០២០ ដោយរោគាពាធក្នុងជន្មាយុ៦៩ព្រះវស្សា ព្រះសព ព្រះអង្គត្រូវបានតម្កល់ និងបង្សុកូល ទក្ខិណានុប្បទាន ចាប់ពីថ្ងៃទី១៨ ខែកុម្ភៈ រហូតដល់ថ្ងៃទី៣ ខែមីនា ឆ្នាំ២០២៣។
បើតាមសង្ឃដីការបស់ព្រះតេជគុណ ម៉ៃ ភីរុណ ព្រះគ្រូចៅអធិការវត្តសុវណ្ណសាគរហៅកោះខ្សាច់ បង្ហាញថា ពិធីលួចព្រះសពនេះ មានលក្ខណៈខុសប្លែកគ្នាខ្លះៗ ពីតំបន់មួយទៅតំបន់មួយ ពីសម័យមួយទៅសម័យមួយ អាស្រ័យលើការប្រែប្រួលនិងរីកចម្រើននៃស្រុកទេស។ កាលពីមុនៗ ការលួចព្រះសព គឺមានលក្ខណៈ ស្ងប់ស្ងាត់ ហើយគេតែងធ្វើនៅពេលយប់ស្ងាត់ ឬពាក់កណ្ដាលអធ្រាត្រ មនុស្សចូលដំណេកអស់ ហើយអុជតែ ភ្លើងចន្លុះ និងគោះបំពង់ឬស្សីជាសញ្ញា និងមានបន្លឺសំឡេងថាចោរៗ និងស្រែកឲ្យគេជួយចាប់ចោរលួចព្រះសព។ រីឯកន្លែងតម្កល់សម្រាប់ធ្វើបុណ្យវិញ គេបានរៀបចំជារោងដោល ជាសំយាប ធ្វើនៅតាមវាលស្រែ តាមវត្តនានាជាដើម តម្កល់ធ្វើបុណ្យទក្ខិណានុប្បទាន ឆាន់ដារឆ្លងតាមប្រពៃណីនិយមធ្វើរបស់អ្នក ភូមិស្រុក។
ព្រះគ្រូចៅអធិការ បញ្ជាក់ ថា៖ ពិធីលួចព្រះសពគឺធ្វើឡើងសម្រាប់តែព្រះសព ដែលបានតម្កល់ធ្វើបុណ្យកាន់ទុក្ខជាហូរហែរច្រើនឆ្នាំ ពោលគឺមិនមែនជាសពស្រស់នោះទេ ហើយធ្វើចំពោះតែសពព្រះចៅអធិការវត្ត ព្រះគ្រូធម្មវាចារ ព្រះឧបជ្ឈាយ៍ ឬព្រះភិក្ខុដែលមានវស្សាចាស់បួសយូរឆ្នាំ ដែលញាតិញោមជិតឆ្ងាយគោរពសក្ការៈបំផុត។
ក្នុងនោះដែរ ព្រះតេជគុណ ហ៊ាក់ គឹមហ៊ត់ ព្រះគ្រូចៅអធិការវត្តអារញ្ញសាគរ បន្ថែមថា៖ វត្តអារាមនៅប៉ែកខាងក្រោមក្រុងសៀមរាប នៅតែរក្សាប្រពៃណីនៃពិធីលួចព្រះសពនេះនៅឡើយ។ ព្រះអង្គបានអំពាវនាវឱ្យយុវជនជំនាន់ក្រោយ និងសាធុសប្បុរសជនទាំងឡាយរួមគ្នាថែរក្សានូវ ប្រពៃណីទំនៀមទម្លាប់ កុំឱ្យបាត់បង់សម្រាប់ទុកឱ្យកូនចៅជំនាន់ក្រោយៗរបស់យើង បានឃើញបានដឹង សម្រាប់ជាគំរូដល់ពួកគាត់ ឱ្យចេះឱនលំទោនគោរពដឹងគុណ ចំពោះ អ្នកមានគុណ មាតាបិតា គ្រូឧបជ្ឈាយាចារ្យ ចេះគោរពចំពោះលោកគ្រូអ្នកគ្រូ រៀមច្បងគ្រប់ៗរូបជាដើមផង។
សូមជម្រាបថា ព្រះសព ព្រះធម្មមុនីញាណ ព្រហ្មជោតិ ហាប់ ចយ នឹងត្រូវរំកិលដង្ហែចេញពីព្រះមេរុ ស្ថិតនៅភូមិចុងឃ្នៀស សង្កាត់សៀមរាប ក្រុងសៀមរាប ទៅតម្កល់លើជើងថ្ករក្នុងឈាបនដ្ឋានវត្តភ្នំខាងក្រោមវិញនាវេលារសៀលថ្ងៃទី២៤ខែកុម្ភៈ និងថ្វាយព្រះភ្លើងបូជាព្រះសពនៅថ្ងៃទី២ ខែមីនាឆ្នាំ២០២៣ខាងមុខនេះ។
គួររំលឹកថា កុមារ ហាប់ ចយ កើតនៅថ្ងៃទី២៣ ខែសីហា ឆ្នាំ១៩៥១ ក្នុងត្រកូលកសិករ។ ព្រះអង្គបានបួសជាសាមណេរភាវៈក្នុងឆ្នាំ១៩៦៩ លុះក្នុងរបបប្រល័យពូជសាសន៍ ប៉ុល ពត គេបានបង្ខំឱ្យលោកលាចាកសិក្ខា(សិក្ខ) ហើយប្រើឱ្យលោកទៅធ្វើការដូចប្រជាជនខ្មែរដទៃទៀតដែរ។ ក្រោយមានគ្រួសារ និងកូនម្នាក់ រហូតដល់ឆ្នាំ១៩៨១ ព្រះអង្គ ហាប់ ចយ បានលាគ្រួសារវិលចូលក្នុងព្រះពុទ្ធសាសនាវិញ។ បន្ទាប់មក ឆ្នាំ១៩៨៣ ព្រះភិក្ខុ ហាប់ ចយ ត្រូវបានតែងតាំងជាចៅអធិការវត្តភ្នំក្រោម ឃុំសៀមរាប ស្រុកសៀមរាប ខេត្តសៀមរាប។ នៅក្នុងឆ្នាំ១៩៩៩ ព្រះភិក្ខុ ហាប់ ចយ ត្រូវបានតែងតាំងជាព្រះគ្រូឧបជ្ឈាយ៍ប្រចាំវត្តភ្នំក្រោម និងត្រូវបានតែងតាំងជាព្រះសមុហ៍ អនុគណក្រុងសៀមរាប ដល់ឆ្នាំ២០០៧ លោកក៏បានសុំលាលែងពីតំណែងសមុហ៍អនុគណក្រុង ដោយសុខភាពមិនល្អមានជំងឺប្រចាំព្រះកាយ។ នៅក្នុងឆ្នាំ២០១៨ ព្រះគ្រូត្រូវបានតែងតាំងគោរមងារ ជាព្រះគ្រូសុវណ្ណធម្មមុនី និងនៅក្នុងឆ្នាំ២០១៩ ព្រះគ្រូត្រូវបានព្រះមហាក្សត្រតែងតាំងជាព្រះធម្មមុនីញាណ ព្រះរាជាគណៈថ្នាក់កិត្តិយស នៃគណៈមហានិកាយ រហូតមក៕
អត្ថបទនិងរូបភាព ៖ លោក យូ វង្ស
កែសម្រួលដោយ ៖ លោក សេង ផល្លី
អត្ថបទនិងរូបភាព ៖ លោក យូ វង្ស
កែសម្រួលដោយ ៖ លោក សេង ផល្លី
