នារសៀលថ្ងៃទី២២ ខែកុម្ភៈ ឆ្នាំ២០២៣ នៅសាលាខេត្តសៀមរាប លោក ឃឹម ហ្វីណង់ អភិបាលរងខេត្តសៀមរាប បានទទួលជួបពិភាក្សាការងារ រវាងរដ្ឋបាលខេត្ត ជាមួយប្រតិភូខេត្តហឺណាន(Hunnan) និង ប្រតិភូក្រុងចាងចូវ (Zhengzhou) នៃសាធារណរដ្ឋប្រជាមានិតចិន ដឹកនាំដោយលោក ហ៊ី សង់ (He Xiong) អភិបាលក្រុង នៃរដ្ឋបាលប្រជាជនក្រុងចាងចូវ។
នៅក្នុងជំនួបពិភាក្សានេះ បានជជែកផ្តោតជាសំខាន់ទៅលើ ការជំរុញផ្នែកធុរកិច្ច និងវិនិយោគ រវាងខេត្តហឺណាន និងក្រុងចាងចូវ និងខេត្តសៀមរាប ។ ក្នុងកិច្ចពិភាក្សានោះដែរ លោក ឃឹម ហ្វីណង់ លើកឡើងថា ក្រោយធ្លាក់ចូលក្នុងវិបត្តិជំងឺកូវីដ-១៩ ខេត្តសៀមរាបានប៉ះពាល់យ៉ាងធ្ងន់ធ្ងរលើផ្នែកសេដ្ឋកិច្ច ជាពិសេសវិស័យទេសចរណ៍ និង វិស័យកសិកម្ម។
ព័ត៌មានជាតិ ថ្មីៗ
ជាមួយនោះ លោក អភិបាលរងខេត្ត បានថ្លែងអំណរគុណយ៉ាងជ្រាលជ្រៅបំផុត ចំពោះរដ្ឋាភិបាល និង ប្រជាជនចិន ដែលតែងតែគាំទ្រ និងជួយឧបត្ថម្ភគាំទ្រគ្រប់បែបយ៉ាងដល់ប្រជាជនកម្ពុជា ជាពិសេសការពង្រឹងនូវកិច្ចសហប្រតិបត្តិការ និង ចំណងសម្ព័ន្ធមេត្រីភាព រវាងខេត្តសៀមរាប ជាមួយបណ្តាខេត្ត ក្រុង នៃប្រទេសចិន។
លោកឃឹម ហ្វីណង់ សង្ឃឹមថា ប្រតិភូខេត្តហឺណាន និង ប្រតិភូក្រុងចាងចូវ នឹងនៅតែបន្តជួយគាំទ្រដល់ការអភិវឌ្ឍន៍ខេត្តសៀមរាប ឲ្យមានការរីកចម្រើន និងជំរុញដល់អ្នកវិនិយោគ និងភ្ញៀវទេសចរចិន មកកាន់ខេត្តទេសចរណ៍ដ៏មានប្រជាប្រិយភាពនេះ កាន់តែច្រើនឡើងថែមទៀត។
លោក ហ៊ី សង់ ក៏បានរំលឹកពីទំនាក់ទំនងដ៏រឹងមាំរវាងប្រទេសទាំងពីរ តាំងពីសម័យដ៏យូរលង់ និងក្នុងរាជ្យសម្ដេចព្រះនរោត្តម សីហនុ ព្រះបរមរតនកោដ្ឋ រហូតមកដល់បច្ចុប្បន្ន ដែលមានសន្តិភាព និងការរីកចម្រើនដ៏អស្ចារ្យ ដឹកនាំដោយសម្ដេចតេជោ ហ៊ុន សែន។
លោក អភិបាលក្រុង ក៏បានបង្ហាញផងដែរថា ខេត្តហឺណាន និងខេត្តសៀមរាប មានសក្ដានុពលប្រហាក់ប្រហែលគ្នា លើវិស័យកសិកម្ម និងទេសចរណ៍។ ក្នុងនោះ លោកបានលើកឡើងថា ពីចំណាប់អារម្មណ៍ក្នុងដំណើរទស្សនកិច្ចនាពេលនេះ និងរំពឹងថាខេត្តទាំងពីរ នឹងចាប់ដៃគូនឹងគ្នាក្នុងការពង្រឹងសក្ខានុពលផ្នែកវិស័យទេសចរណ៍ ឲ្យមានភាពរីកចម្រើនរឹងមាំថែមទៀត និងបន្តបង្កើនកិច្ចសហប្រតិបត្តិការជាមួយគ្នាលើវិស័យទេសចរណ៍ និង កសិកម្មឲ្យកាន់តែការីកចម្រើនបន្ថែមទៀត៕
អត្ថបទនិងរូបភាព ៖ លោក ទ្រា ពន្លឺ
កែសម្រួលដោយ ៖ លោក សេង ផល្លី
