ផ្អែកតាមជំរឿនប្រជាជនទូទៅឆ្នាំ២០១៩ របស់វិទ្យាស្ថានជាតិស្ថិតិ នៃក្រសួងផែនការ បង្ហាញថា អត្រាជនពិការនៅកម្ពុជា ដោយគិតត្រឹមអាយុ៥ឆ្នាំឡើង មានចំនួនសរុប ៦៨៩.៤៥៧នាក់ ឬស្មើនឹង៤.៩ភាគរយ នៃប្រជាជនសរុប។ អត្រានេះមានការកើនឡើង បើប្រៀបធៀបនឹងការអង្កេត សេដ្ឋកិច្ចសង្គមកាលពីឆ្នាំ២០១៤ ដែលមានចំនួនជនពិការត្រឹមតែ ៥២៤.០០០ នាក់ ឬស្មើនឹង៤ភាគរយ នៃប្រជាជនសរុបប៉ុណ្ណោះ។
ថ្លែងក្នុងសន្និបាតបូកសរុបលទ្ធផលការងារឆ្នាំ២០២២ និងទិសដៅអនុវត្តបន្តរបស់មូលនិធិជនពិការ ក្នុងក្រុងសៀមរាប ឯកឧត្តម រឿន រិទី្ធរ័ត្ន ប្រតិភូរាជរដ្ឋាភិបាលកម្ពុជា និងជាប្រធានក្រុមប្រឹក្សាភិបាលនៃមូលនិធិជនពិការ បង្ហាញថា មូលហេតុចម្បងៗ ដែលនាំឱ្យចំនួនជនពិការនៅកម្ពុជា មានការកើនឡើង គឺបណ្តាលមកពីជំងឺ ខ្វះអាហារូបត្ថម្ភ ដំណពូជ គ្រោះថ្នាក់ចរាចរណ៍ គ្រោះថ្នាក់ការងារ គ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះ អំពើហឹង្សា គ្រោះមហន្តរាយ ចាស់ជរា និងមូលហេតុផ្សេងៗទៀត។ ផ្តើមចេញពីបញ្ហានេះ រាជរដ្ឋាភិបាលកម្ពុជាបានកំណត់វិស័យពិការភាពជា ការងារអាទិភាព ដោយបានផ្តល់សច្ចាប័នលើ អនុសញ្ញា ស្តីពីសិទ្ធិជនពិការ និងលិខិតូករណ៍អន្តរជាតិ ផ្សេងៗ ដោយបានកសាង និងដាក់ឱ្យអនុវត្តន៍ច្បាប់ គោលនយោបាយ និងលិខិតបទដ្ឋានគតិយុត្តជាតិ ដើម្បីពង្រឹងការផ្តល់សេវាផ្សេងៗជូនដល់ជនពិការ។
ឯកឧត្តម ក៏បានជំរុញឱ្យមានការលើកកម្ពស់សុខុមាលភាព ជីវភាពរស់នៅរបស់ជនពិការ និងពង្រឹងការគ្រប់គ្រងការផ្តល់សេវាស្តារលទ្ធភាពពលកម្មជូនជនពិការគ្រប់ប្រភេទ ឱ្យកាន់តែល្អប្រសើរឡើងថែមទៀត ស្របតាមទិសដៅជាយុទ្ធសាស្ត្ររបស់រាជរដ្ឋាភិបាលកម្ពុជា។ ទន្ទឹមនេះ ដើម្បីឆ្លើយតបទៅនឹងតម្រូវការ និងស្ថានភាពរស់នៅរបស់ជនពិការ និងប្រជាពលរដ្ឋក្រីក្រ រាជរដ្ឋាភិបាលកម្ពុជា បានផ្តល់ជំនួយឧបត្ថម្ភជាបន្តបន្ទាប់ តាមរយៈការផ្តល់ របបគោលនយោបាយ ការផ្តល់ផ្ទះ និងផ្តល់កញ្ចប់អំណោយផ្សេងៗ និងការឧបត្ថម្ភសាច់ប្រាក់ តាមរយៈមូលនិធិជាតិជំនួយសង្គម ដល់គ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធប្រឆាំងជំងឺកូវីត-១៩។ ក្រៅពីនេះ សប្បុរសជន និងសង្គមស៊ីវិល ព្រមទាំងដៃគូអភិវឌ្ឍន៍នានា ក៏បានរួមចំណែកទាំងថវិកា និងធនធានមនុស្ស ដើម្បីសម្រេចបាននូវ ឧត្តមប្រយោជន៍ សម្រាប់ជនពិការនៅកម្ពុជាផងដែរ៕
អត្ថបទនិងរូបភាព ៖ លោក ឃុត សៅ
កែសម្រួលដោយ ៖ លោក សេង ផល្លី
