ព្រឹកថ្ងៃទី២៣ ខែកុម្ភៈ ឆ្នាំ២០២៣ ក្រសួងសុខាភិបាល បានរៀបចំបើកសិក្ខាសាលាពិនិត្យការអនុវត្តការប្រាស្រ័យទាក់ទង និងការចូលរួមរបស់សហគមន៍ និងផែនការប្រតិបត្តិ ក្រោមអធិបតីភាពលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល ដោយមានការចូលរួមពីសំណាក់តំណាងអង្គការសុខភាពពិភពលោក តំណាងនាយកដ្ឋានប្រយុទ្ធនឹងជំងឺឆ្លង (CDC) រួមនឹងវត្តមានប្រធានអនុប្រធានមន្ទីរសុខាភិបាលមកពីតាមបណ្ដាខេត្ត និងអង្គការដៃគូរជាច្រើនរូប។ សិក្ខាសាលានេះដែរ មានរយៈពេល០២ថ្ងៃ ចាប់ពីថ្ងៃទី២៣-២៤ ខែកុម្ភៈ ឆ្នាំ២០២៣ នៅសណ្ឋាគារ រីជិនស៊ី ក្រុងសៀមរាប។
មានប្រសាសន៍ក្នុងឱកាសនោះលោកជំទាវវេជ្ជបណ្ឌិត ឱ វណ្ណឌីន បានសម្តែងការរីករាយជាខ្លាំង ដែលបានចូលរួមជាអធិបតីនៅក្នុងសិក្ខាសាលា ដែលទាក់ទងទៅនឹងទំនាក់ទំនង និងហានិភ័យ ដែលជាប្រធានបទមួយមានសារៈសំខាន់ ដោយគ្រប់អន្តរាគមន៍នានា ប្រសិនមិនមានទំនាក់ទំនងល្អទេ វាអាចជះឥទ្ធិពលដល់ប្រតិបត្តិការ និងអន្តរាគមន៍ការងារទាំងមូល។ ជាក់ស្តែងនៅក្នុងបរិបទកូវីដ-១៩ ព័ត៌មានមិនត្រឹមត្រូវ ព័ត៌មានប្រឌិត និងព័ត៌មានក្លែងក្លាយជាច្រើន បានកើតមានឡើងដែលមិនមែនមានតែនៅកម្ពុជាទេ គឺពេញសកលលោក។ ជាមួយគ្នានោះលោកជំទាវ ក៏បានថ្លែងអំណរគុណដល់អ្នកសារព័ត៌មាន ដែលកន្លងមកបានចូលរួមយ៉ាងសកម្មក្នុងការផ្សព្វផ្សាយ ចែករំលែកព័ត៌មានផ្សេងៗ ដែលទាក់ទង់ទៅនឹងព្រឹត្តិការណ៍ ក៏ដូចជាការឆ្លើយតបគោលនយោបាយ យុទ្ធសាស្ត្ររបស់ប្រមុខរាជរដ្ឋាភិបាល ហើយក៏មានវិធានការទប់ស្កាត់នានា ដែលបានដាក់ចេញដោយក្រសួងសុខាភិបាល និងអនុវត្តន៍ឲ្យបានលឿន ដើម្បីលុបបំបាត់នូវហានិភ័យ ដែលបង្កឡើងដោយព័ត៌មានមិនពិត ព័ត៌មានក្លែងក្លាយ និងព័ត៌មានដែលមិនត្រឹមត្រូវ។
ក្នុងឱកាសនោះដែរ លោកជំទាវ ក៏បានជំរុញដល់មន្រ្តី ពិសេសប្រធានមន្ទីរសុខាភិបាល នៅតាមខេត្តរាជធានីទាំង២៥ ត្រូវយកចិត្តទុកដាក់លើការងារទំនាក់ទំនងហានិភ័យ ដូចជាការផ្ទុះឡើងនូវជំងឺឆ្លងថ្មីៗ ដោយត្រូវឆ្លើយតបឲ្យបានលឿនតាមតែអាចធ្វើទៅបាន។ ជាមួយគ្នានោះដោយមានការគាំទ្រពីអង្គការសុខភាពពិភពលោក នាយកដ្ឋានប្រយុទ្ធនឹងជំងឺឆ្លង រួមសហការជាមួយនឹងមជ្ឈមណ្ឌលជាតិ និងសុខភាព ទើបបានរៀបចំនូវវគ្គបណ្ដុះបណ្ដាលនេះឡើង ដល់បណ្ដាថ្នាក់ដឹកនាំមន្ទីរសុខាភិបាលរាជធានីខេត្ត រួមនឹងមន្ត្រីបច្ចេកទេសដែលពាក់ព័ន្ធ។ ការទាក់ទងទៅនឹងទំនាក់ទំនងនឹងហានិភ័យនេះដែរ គឺត្រូវមានការឆ្លើយតបឲ្យបានលឿន និងត្រូវមានការសហកាល្អជាមួយនឹងអ្នកសារព័ត៌មាន ដើម្បីផ្ដល់នូវព័ត៌មានត្រឹមត្រូវ ព័ត៌មានពិតជាក់ស្ដែង ហើយធ្វើឲ្យបានលឿនដើម្បឲ្យពួកគាត់មានមូលដ្ឋានត្រឹមត្រូវក្នុងការផ្សព្វផ្សាយព័ត៌មាននេះជាបន្តទៀត ពីព្រោះតួនាទីរបស់អ្នកសារព័ត៌មានបានជួយច្រើន។
ជាមួយគ្នានោះ អ្នកស្រី លីហ្សា ស្មីត (Lisa Smyth) តំណាងអង្គការសុខភាពពិភពលោក បានលើកដែរថា ការចូលរួមរបស់សហគមន៍មានសារៈសំខាន់ណាស់ ហើយយើងនឹងរៀនសូត្រ ពីការប្រាស្រ័យទាក់ទង និងការចូលរួមពីសហគមន៍រយៈពេល ២ថ្ងៃនេះ។ នៅមុនពេលការរាតត្បាតនៃជំងឺកូវីដ-១៩ យើងមានការប្រាស្រ័យទាក់ទងពីការទទួលនូវជំងឺផ្សេងៗ ជាពិសេសនៅជំនាន់ជំងឺអេបូឡា។ ប៉ុន្តែពេលដែលផ្ទុះជំងឺកូវីដ-១៩ ការងារនេះ មានសារៈសំខាន់ និងជួយឱ្យមានការជឿទុកចិត្តរវាងរដ្ឋាភិបាល និងសហគមន៍ នឹងជំរុញឲ្យមានការជាទុកចិត្តជឿជាក់គ្នានៅក្នុងពេលមានវិបត្តិ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាល នៃរដ្ឋបាលខេត្តសៀមរាប បានលើកឡើងថា ព្រះរាជាណាចក្រកម្ពុជាបានទទួលជោគជ័យក្នុងការទប់ស្កាត់នៃការឆ្លងរីករាលដាលនៃជំងឺកូវីដ-១៩ យើងបានធ្វើរួមគ្នាក្រោមការដឹកនាំ និងចង្អុលបង្ហាញរបស់ប្រមុខរាជរដ្ឋាភិបាល ក៏ដូចជាថ្នាក់ដឹកនាំរបស់ក្រសួងសុខាភិបាល។ លោកវេជ្ជបណ្ឌិត ក្រុស សារ៉ាត់ បានបន្តថា ក្នុងអំឡុងពេលវិបត្តិកូវីដ-១៩ ២ឆ្នាំមកនេះ ខេត្តសៀមរាបមានអ្នកស្លាប់ដោយជំងឺនេះសរុបចំនួន ៣៦២នាក់ ហើយភាគច្រើន ជាអ្នកដែលមានកាយសម្បទាមិនរឹងមាំ និងជាមនុស្សចាស់ ។ ក្នុងចំណោមនោះ ២០ ទៅ៣០ភាគរយ គឺជាអ្នកខេត្តផ្សេងៗ ដែលស្វែងរកការព្យាបាលក្នុងមន្ទីរពេទ្យក្នុងខេត្តសៀមរាប។
អត្ថបទនិងរូបភាព ៖ លោក អ៊ុន ណារាជ្យ
កែសម្រួលដោយ ៖ លោក សេង ផល្លី
