ដោយមានការឧបត្ថម្ភគាំទ្រពីក្រសួងមហាផ្ទៃ និងសមាគមជាតិក្រុមប្រឹក្សារាជធានី ខេត្ត នៅព្រឹកថ្ងៃទី០១ ខែមីនា ឆ្នាំ២០២៣នេះ អគ្គលេខាធិការដ្ឋានសមាគមក្រុមប្រឹក្សារដ្ឋបាលថ្នាក់ក្រោមជាតិ បានរៀបចំសិក្ខាសាលាលើកកម្ពស់ការយល់ដឹង និងអបអរសាទរទិវាអន្តរជាតិនារី ៨ មីនា ខួបទី១១២ ក្រោមមូលបទ “ស្រ្តីរួមគ្នា រក្សាសុខ សន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល” នៅខេត្តសៀមរាប ក្រោមអធិបតីភាព ឯកឧត្តម ម៉ប់ សារិន ប្រធានសមាគមជាតិក្រុមប្រឹក្សារាជធានី ខេត្ត ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប និងជាអនុប្រធានសមាគមជាតិក្រុមប្រឹក្សារាជធានី ខេត្ត លោកជំទាវ គឹម ស៊ីផាត់ រដ្ឋលេខាធិការ ក្រសួងកិច្ចការនារី និងលោកស្រី យូ សុភា អភិបាលរងខេត្តតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប ដោយមានការចូលរូមជាថ្នក់ដឹកនាំសមាគមជាតិ សមាជិកគណៈកម្មការទទួលបន្ទុកកិច្ចការស្ត្រីនិងកុមារ ប្រធានគណៈកម្មាធិការពិគ្រោះយោបល់ស្ត្រីនិងកុមារខេត្ត-រាជធានីទាំង២៥(គ.ក.ស.ក) ថ្នាក់ដឹកនាំសម្ព័ន្ឋភាពជាតិក្រុមប្រឹក្សាថ្នាក់មូលដ្ឋាន តំណាងក្រសួងកិច្ចការនារី សរុបចំនួនប្រមាណជា១៥០នាក់។
មានប្រសាសន៍ក្នុងឱកាសនោះ លោកស្រី យូ សុភា អភិបាលរងខេត្តសៀមរាប បានចាត់ទុកសិក្ខាសាលានេះថាពិតជាមានសារៈសំខាន់ ព្រោះវាបានបង្ហាញឱ្យឃើញកាន់តែច្បាស់អំពីកិច្ចខិតខំប្រឹងប្រែង និងការយកចិត្តទុកដាក់ក្នុងការអនុវត្តការងាររបស់សមាគមជាតិក្រុមប្រឹក្សារាជធានី ខេត្ត ដែលត្រូវបានទទួលស្គាល់ដោយរាជរដ្ឋាភិបាល ជា “ស្ថាប័នតំណាងឱ្យសំឡេង និងជាអ្នកការពារផលប្រយោជន៍ស្របច្បាប់របស់ក្រុមប្រឹក្សារាជធានី ខេត្ត” ដើម្បីរួមចំណែកនៅក្នុងដំណើរការ នៃការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការនៅប្រទេសកម្ពុជា។
ឯកឧត្តម ម៉ប់ សារិន ប្រធានសមាគមជាតិក្រុមប្រឹក្សារាជធានី ខេត្ត មានប្រសាសន៍ថា៖ជារៀងរាល់ឆ្នាំ ប្រទេសកម្ពុជាបានរៀបចំយុទ្ធនាការទិវាអន្តរជាតិនារី ៨ មីនា ដើម្បីរំលឹកពីការតស៊ូទាមទារសិទ្ធិ សេរីភាព និងឆ្លុះបញ្ចាំងអំពីវឌ្ឍនភាព សមិទ្ធផល បញ្ហាប្រឈម ការប្តេជ្ញាចិត្ត និងវិធានការជាវិជ្ជាមាននានា ក្នុងការសម្រេចបាននូវសមភាពយេនឌ័រ និងការបង្កើនភាពអង់អាចដល់ស្រ្តី និងក្មេងស្រីគ្រប់រូប។
ឯកឧត្តម បន្តថា សមាគមជាតិបានបញ្ចូលការរៀបចំកម្មវិធីអបអរសាទរទិវាអន្តរជាតិនារី ៨ មីនា ជាសកម្មភាពអាទិភាពមួយ និងបានអនុវត្តចាប់តាំងពីឆ្នាំ២០១៧ ក្នុងគោលបំណងរួមចំណែកក្នុងយុទ្ធនាការរបស់រាជរដ្ឋាភិបាលកម្ពុជាដែលមានក្រសួងកិច្ចការនារី ជាសេនាធិការ និង ផ្តល់ឱកាសសម្រាប់ការជួបជុំសមាជិកក្រុមប្រឹក្សារាជធានី ខេត្តជាស្រ្តីនៅទូទាំងប្រទេស ក្នុងមួយឆ្នាំម្តង ដើម្បីយល់ដឹងអំពីសារៈសំខាន់នៃទិវាអន្តរជាតិនារី គោលនយោបាយរាជរដ្ឋាភិបាលក្នុងការលើកកម្ពស់ស្រ្តី និងចែករំលែកបទពិសោធន៍អំពីការបង្កើនភាពអង់អាចដល់ស្រ្តីនៅកម្ពុជា។
គួររំលឹកថា សមាគមជាតិក្រុមប្រឹក្សារាជធានី ខេត្ត ត្រូវបានបង្កើតជា “នីតិបុគ្គល” តាមរយៈមហាសន្និបាតនៅឆ្នាំ២០១៣ ដោយបានកំណត់ក្នុងលក្ខន្តិកៈលើកកម្ពស់ឋានៈនិងអភិវឌ្ឍសមត្ថភាពដល់ក្រុមប្រឹក្សារាជធានីខេត្ត ដែលគិតមកទល់បច្ចុប្បន្ននេះ សមាជិកក្រុមប្រឹក្សារាជធានី ខេត្ត ជាស្រ្តីនៅទូទាំងប្រទេស ក្នុងអាណត្តិទី៣ មានចំនួន ៩៥ រូប នៃសមាជិកក្រុមប្រឹក្សារាជធានី ខេត្ត សរុប ៥៥៩ រូប ស្នើនឹង ១៦.៩៩% នៃសមាជិកក្រុមប្រឹក្សាជាបុរស ៕
អត្ថបទនិងរូបភាព ៖ លោក យូ វង្ស និង លោក ឈិត សាវី
កែសម្រួលដោយ ៖ លោក លីវ សាន្ត
