គ្រឹះស្ថានអង្គរបានបង្ហាញថា ភ្ញៀវទេសចរអន្ដរជាតិ ទិញសំបុត្រចូលទស្សនាអង្គរ និងប្រាសាទកោះកេរ រយ:ពេលមួយខែ មានចំនួនជាង ៧ម៉ឺននាក់ និងទទួលថវិកាពីការលក់សំបុត្រជាង ៣លានដុល្លា បើធៀបនឹងឆ្នាំ២០២២កើនឡើងជាង ៩០០ភាគរយ។
យោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ចេញផ្សាយ នៅថ្ងៃទី០១ ខែមីនា ឆ្នាំ២០២៣នេះ បានបង្ហាញថា ចាប់ពីថ្ងៃទី០១ ខែកុម្ភ: ដល់ថ្ងៃទី២៨ ខែកុម្ភ: ឆ្នាំ២០២៣នេះ ការលក់សំបុត្រចូលទស្សនាអង្គរនេះ មានការកើនឡើង ដោយក្នុងមួយខែកុម្ភ:នេះ មានចំនួនភ្ញៀវទេសចរអន្ដរជាតិ ៧៩,៥១៥នាក់ ទទួលបានចំណូល ៣,៧៤៣,២៩៥ដុល្លារ, ប្រាក់ឧបត្ថម្ភមូលនិធិមន្ទីរពេទ្យគន្ធបុប្ផាសម្រាប់ខែកុម្ភ: មានចំនួន ១៥៩,០៣០ដុល្លា។
សេចក្ដីប្រកាស ដដែលបានបន្ដថា សម្រាប់រយ:ពល ២ខែដើមឆ្នាំ២០២៣ មានចំនួនភ្ញៀវទេសចរទិញសំបុត្រចូលទស្សនាអង្គរចំនួន ១៥៦,៩៥១នាក់ ដោយទទួលបានចំណូលថវិកា ៧,៣៨៦,៧៩២ដុល្លា កើនឡើងជាង ១ពាន់% បើធៀបនឹងឆ្នាំ២០២២ កន្លងមក។ បើតាមសេចក្ដីប្រកាសព័ត៌មាន បានបន្ថែមទៀតថា សម្រាប់ខែមករា និងខែកុម្ភ: ឆ្នាំ២០២៣ មូលនិធិមន្ទីរពេទ្យគន្ធបុប្ផាមាន ៣១៣,៩០២ដុល្លា។ ចំណូលពីការលក់បណ្ណចូលទស្សនាប្រាសាទកោះកេររយ:ពេល ២ខែ មានចំនួន ៤៥,៦៩០ដុល្លា។ ប្រាក់ចំណូលពីការលក់សំបុត្រទូករយ:ពេលពីរខែ ពីខែមករា និងខែកុម្ភ: ឆ្នាំ២០២៣នេះ មានចំនួន១១៩,០៦២ដុល្លារ៕
អត្ថបទ និងរូបភាព: លោកបូ សាវី
កែសម្រួលដោយ លីវ សុខុន!!!
