នៅរសៀលថ្ងៃទី ២៨ ខែ កុម្ភៈ ឆ្នាំ២០២៣នេះ នៅរដ្ឋបាលសាលាខេត្តសៀមរាប មានបើកកិច្ចប្រជុំគណៈកម្មាធិការ សម្របសម្រួលបចេ្ចកទេស របស់ក្រុមប្រឹក្សាខេត្ត អាណត្តិទី៣ ដើមី្បធ្វើការត្រួតពិនិត្យ និងលើកមកដោះស្រាយទៅលើ សំណួរសំណូមពររបស់ប្រជាពលរដ្ឋ នៅតាមមូលដ្ឋានក្រុងស្រុកទាំង១២ តាមរយៈវេទិកា ផ្សព្វផ្សាយ និង ពិគ្រោះយោបល់របស់ក្រុមប្រឹក្សាខេត្ត អាណត្តិទី៣។
កិច្ចប្រជុំនេះដឹកនាដោយ ឯកឧត្តម ទៀ សីហា អភិបាលខេត្តសៀមរាប និងជាប្រធានគណៈកម្មាធិការ សម្របសម្រួលបចេ្ចកទេស របស់ក្រុមប្រឹក្សាខេត្ត អាណត្តិទី៣ និងមានការចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រីអភិបាលរង នៃគណៈអភិបាលខេត្ត មន្ត្រីចំណុះសាលាខេត្ត ព្រមទាំងមន្ទីរ អង្គភាព ក្រុង ស្រុកជុំវិញខេត្ត។
ព័ត៌មានជាតិ ថ្មីៗ
អញ្ជើញមានមតិបើក កិច្ចប្រជុំ ឯកឧត្តម ទៀ សីហា បានជំរុញដល់រដ្ឋបាលក្រុង ស្រុក លើកនូវសំណួរសំណូមពររបស់ប្រជាពលរដ្ឋ ដែលនៅសេសសល់ និងមានអាទិភាពដាក់ចូលក្នុងកិច្ចប្រជុំ ជាពិសេសសំណួរសំណូមរបស់ប្រជាពលរដ្ឋ ចាប់ពីឆ្នាំ២០១៩-២០២០ ដែលបានអាក់ខានក្នុងការដោះស្រាយដោយសារតែវិបត្តិជំងឺកូវីដ-១៩ ដើម្បីរដ្ឋបាលខេត្តត្រួតពិនិត្យ និងសម្រេចដោះស្រាយជូនប្រជាពលរដ្ឋ ចៀសវាងអូសបន្លាយពេលវេលាយូរបន្ថែមទៀត។
សម្រាប់របៀបវារៈទី១ ក្នុងកិច្ចប្រជុំ បានពិភាក្សាផ្ដោតទៅលើការដោះស្រាយបញ្ហាវិវាទក្រៅប្រព័ន្ធតុលារការនៅថ្នាក់ក្រុង ស្រុក ដោយប្រើយន្តការដែលមានស្រាប់។ កិច្ចប្រជុំបានឯកភាព ទៅលើការដោះស្រាយនេះថា វាបានសម្រួលការលំបាករបស់ប្រជាពលរដ្ឋ ដូចជា កាត់បន្ថយពេលវេលាឡើងតុលាការ កាត់បន្ថយការចំណាយផ្សេងៗនៅតុលារ បញ្ចប់វិវាទដោយសន្តិវិធី ជាដើម។ បន្ថែមលើនោះ ឯកឧត្តម ទៀ សីហា បានណែនាំដល់រដ្ឋបាលក្រុង ស្រុក ត្រូវជ្រើសរើសមន្ត្រី ដែលមានជំនាញច្បាស់លាស់ ព្រមជាមួយទេពកោសល្យដោះស្រាយវិវាទ ដែលជាបច្ច័យជួយឱ្យភាគីទាំងសងខាង មានទំនុកចិត្តមកលើអាជ្ញាធរ និងដោះស្រាយបានឆាប់រហ័ស ជាពិសេសមន្ត្រីដោះស្រាយវិវាទត្រូវឈរលើគោលការអព្យាក្រឹត មិនលម្អៀង។
សម្រាប់របៀបវារៈទី២ កិច្ចប្រជុំ បានពិភាក្សាផ្ដោតទៅលើការដោះស្រាយ សំណូមពរស្នើសុំរបស់ប្រជាពលរដ្ឋ លើហេដ្ឋារចនាសម្ព័ន្ធនៅតាមក្រុង ស្រុក ដែលបានលើកឡើងនៅ២០១៩-២០២០។ ចំពោះសំណូមពរទាំងនោះ បណ្ដាមន្ទីរ អង្គភាពពាក់ព័ន្ធមួយចំនួន បានដោះស្រាយរួចរាល់ និងមួយចំនួនទៀត បានបន្តតាមដានដោយសារពាក់ព័ន្ធនឹងតំបន់ការពារធម្មជាតិ និងសំណូមពរមួយចំនួនមានទំហំតូចពេក ដែលអាចអាជ្ញាធរមូលដ្ឋានមានលទ្ធភាពក្នុងការដោះស្រាយបាន។ ទោះជាយ៉ាងនេះក្ដី ឯកឧត្តម ទៀ សីហា បានណែនាំដល់ មន្ទីរ អង្គភាពពាក់ព័ន្ធ ត្រូវចូលរួមរកដោះស្រាយ ចំពោះសំណួរសំណូមពរ ដែលមិនទាន់ដោះស្រាយរួចរាល់ ធ្វើយ៉ាងណាពន្យល់ប្រជាពលរដ្ឋ និងអាជ្ញាធរមូលដ្ឋានឱ្យបានយល់ច្បាស់ពីដំណោះស្រាយ។
សម្រាប់របៀបវារៈទី៣ ទៅលើបញ្ហាផ្សេងៗ ឯកឧត្តម ទៀ សីហា បានលើកយកបញ្ហា ការថែរក្សាសណ្ដាប់ធ្នាប់ក្នុងក្រុង ការប្រើប្រាស់ហេដ្ឋារចនាសម្ព័ន្ធផ្លូវ៣៨ខ្សែឱ្យបានត្រឹមត្រូវ ការលើកកម្ពស់សោភណ្ឌភាពដងស្ទឹងសៀមរាប ការរឹតបន្តឹងសុវត្ថិភាពចរាចរណ៍ និងបញ្ហាមួយចំនួនទៀត ដែលទាមទារឱ្យ មន្ទីរ អង្គភាព អាជ្ញាធរពាក់ព័ន្ធពិនិត្យតាមដាន ឱ្យបានខ្ជាប់ខ្ជួន ខណៈខេត្តសៀមរាប នឹងក្លាយជាទីតាំងប្រារព្ធព្រឹត្តិការណ៍អង្គរសង្គ្រាន្ត និងព្រឹត្តិការណ៍ធំៗជាច្រើននៅពេលខាងមុខដ៏ខ្លី។
អត្ថបទនិងរូបភាព ៖ លោក ម៉ី សុខារិទ្ធ
កែសម្រួលដោយ ៖ លោក សេង ផល្លី
