នាថ្ងៃទី២៣ ខែកុម្ភៈ ឆ្នាំ២០២៣ អាជ្ញាធរជាតិប្រយុទ្ធនឹងជំងឺអេដស៍បានបើក សិក្ខាសាលាពិគ្រោះយោបល់ លើឯកសារផែនការយុទ្ធសាស្រ្តទីក្រុងពន្លឿនការឆ្លើយតបមេរោគអេដស៍ និងជំងឺអេដស៍ ក្នុងក្រុងសៀមរាប ដោយមានការអញ្ជើញជាគណៈអធិបតី ឯកឧត្តម ទា ផល្លា អនុប្រធានអាជ្ញាធរជាតិប្រយុទ្ធនឹងជំងឺអេដស៍ លោកពិន ប្រាកដ អភិបាលរង ខេត្តសៀមរាប និងមន្ទីរអង្គភាព អាជ្ញាធរពាក់ពន្ធគ្រប់ជាន់ថ្នាក់ជុំវិញខេត្ត។
ថ្លែងក្នុងពិធីនោះ ឯកឧត្តម ទា ផល្លា បានបង្ហាញពីការព្រួយបារម្ភលើ ករណីអ្នកឆ្លងថ្មី និងការងារបង្ការ ដោយបច្ចុប្បន្ននេះ ការចម្លងមេរោគអេដស៍ភាគច្រើនមានប្រភពពី អ្នកស្រលាញ់ភេទដូចគ្នា គឺបុរសរួមភេទជាមួយបុរស (MFM ) ដែលស្ថិតក្នុងស្រទាប់យុវវ័យ។ ឯកឧត្តម បន្ថែមថា ចំពោះសិក្ខាសាលាពិគ្រោះយោបល់នេះ នឹងផ្ដោតសំខាន់លើអ្នកស្រលាញ់ភេទដូចគ្នា ជាពិសេសគឺយុវវ័យ ដែលជាចំណុចកំពុងមានការព្រួយបារម្ភខ្លាំង។
ក្នុងនោះដែរ លោក ពិន ប្រាកដ បានគាំទ្រយ៉ាងពេញទំហឹង និងចូលរួមសហការក្នុងអាជ្ញាធរខេត្ត ដើម្បីផ្សព្វផ្សាយ កាត់បន្ថយការឆ្លង និងរីករាលនៃជំងឺអេដស៍។ ការប្រយុទ្ធប្រឆាំងនឹងជំងឺអេដស៍ ត្រូវការការចូលរួមពីគ្រប់ភាគីពាក់ព័ន្ធ មិនមែនសំដៅតែផ្នែកសុខាភិបាលតែប៉ុណ្ណោះទេ។
លោកពិន ប្រាកដ អភិបាលរងបញ្ជាក់បន្ថែមថា ចំពោះអ្នកដែលសង្ស័យថាខ្លួនមានផ្ទុកមេរោគអេដស៍ ត្រូវតែទៅពិនិត្យ និងពិគ្រោះយោលបល់ជាមួយអ្នកជំនាញ ឬគ្រូពេទ្យជំនាញ ដើម្បីធ្វើឱ្យខ្លួនឯងមានទំនុកចិត្ត និងថែរក្សាសុខភាពឱ្យបានល្អប្រសើរ។ ទាំងនេះជាការចូលរួម ប្រយុទ្ធប្រឆាំងនឹងជំងឺអេដស៍ឱ្យមានប្រសិទ្ធភាព ដើម្បីឈានឆ្ពោះទៅរកការបញ្ចប់ជំងឺអេដស៍ ដែលជាការគម្រាមដល់សុខភាពសាធារណៈនៅឆ្នាំ២០២៥។
អត្ថបទនិងរូបភាព ៖ លោក ហាំ ម៉េងហួត
កែសម្រួលដោយ ៖ លោក សេង ផល្លី
