នៅសាលាខេត្តសៀមរាប នាព្រឹកថ្ងៃទី១៣ ខែមីនា ឆ្នាំ២០២៣ លោកស្រី ម៉ននី រង្សី អភិបាលរងខេត្ត បានដឹកនាំកិច្ចប្រជុំជាមួយថ្នាក់ដឹកនាំ និងតំណាងមន្ទីរអង្គភាព ស្ថាប័នជំនាញពាក់ព័ន្ឋ និងសមត្ថកិច្ចក្នុងខេត្ត ដើម្បីបែងចែកភារកិច្ចពាក់ព័ន្ឋនឹងការងារដង្ហែគប់ភ្លើងកីឡាស៊ីហ្គេមលើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ដែលនឹងរៀបចំនៅថ្ងៃទី២១ ខែមីនា ឆ្នាំ២០២៣ នៅប្រាសាទអង្គរវត្តខេត្តសៀមរាប ក្រោមព្រះរាជវត្តមានដ៏ខ្ពស់របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
លោកស្រី ម៉ននី រង្សី មានប្រសាសន៍ថា ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ និងកីឡាអាស៊ានប៉ារ៉ាហ្គេមលើកទី១២ ដែលកម្ពុជាយើងរៀបចំធ្វើជាម្ចាស់ផ្ទះ សម្រាប់ខេត្តសៀមរាប មានកីឡា ២ប្រភេទ គឺប្រណាំងកង់ (កង់គួក និងកង់ភ្នំ) និងកីឡាអត្តពលកម្ម(រត់ម៉ារ៉ាតុន និងដើរប្រណាំង)នៅតំបន់អង្គរ និងនៅឧទ្យានជាតិជើងភ្នំគូលែន។ ការប្រកួតចាប់ពីថ្ងៃទី៦ ដល់ទី១៣ ខែឧសភា។ ប្រតិភូអគ្គពលិក ៩ប្រទេស ចំនួនជាង ១០០នាក់ ក្រុមការងារសហព័ន្ធខ្មែរទោចក្រយាន និងគណៈកម្មាធិការខេមសុខ ចំនួនប្រមាណ ២០០នាក់ ដែលនឹងមកដល់ខេត្តសៀមរាបជាបន្តបន្ទាប់នៅថ្ងៃទី០១ ខែឧសភា។
លោកស្រី អភិបាលរងខេត្ត បញ្ជាក់ថា ពាក់ព័ន្ឋនឹងការងារដ៏មានសារៈសំខាន់ខាងលើនេះ ថ្មីៗកន្លងមករដ្ឋបាលខេត្តបានជួបប្រជុំជាបន្តបន្ទាប់ទាំងនៅថ្នាក់ជាតិនិងនៅថ្នាក់ខេត្ត ហើយអង្គប្រជុំបានស្នើដល់រដ្ឋបាលខេត្តសៀមរាប រៀបចំហេដ្ឋារចនាសម្ព័ន្ឋគាំទ្រ លើយន្តការមួយចំនួនដូចជា៖ ជួយការងាររក្សាសន្តិសុខ សណ្ដាប់ធ្នាប់ និងចរាចរណ៍ ជួយរៀបចំរថយន្ត-ម៉ូតូស៊ីស៊ីរ៉ែន រៀបចំភ្លើងបំភ្លឺដងផ្លូវតាមគោលដៅ រៀបចំបង្គន់ចល័ត រៀបចំរថយន្តពេទ្យនិងមន្ទីរពេទ្យ តាមដងផ្លូវគោលដៅ រៀបចំឲ្យមានអ្នកចូលរួមអបអរសាទរ ជួយសម្អាតអនាម័យតាមដងផ្លូវ និងតាមមុខផ្ទះ និងស្នើសុំជួយសម្រួលចរាចរណ៍ និងរក្សាសន្តិសុខសណ្ដាប់ធ្នាប់ ក្នុងកំឡុងពេលហ្វឹកហាត់ និងពេលប្រកួត។ល។
លោកស្រី ម៉ននី រង្សី បញ្ជាក់ថា៖នៅថ្ងៃទី២១ ខែមីនា ឆ្នាំ២០២៣ ខាងមុខនេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត នឹងយាងអញ្ជើញសុំព្រះអគ្គីកីឡា នៅទីតាំងក្តារបែនបរិវេណខាងក្នុងប្រាសាទអង្គរវត្ត និងនៅថ្ងៃទី២២ ខែមីនា ឆ្នាំ២០២៣ ពិធីដង្ហែភ្លើងគប់កីឡាទៅ និងចេញពីវត្តរាជបូណ៌ ឆ្ពោះទៅកាន់អាកាសយានដ្ឋានអន្តរជាតិសៀមរាប ដើម្បីបន្តដំណើរទៅកាន់បណ្តា ប្រទេសនានាក្នុងតំបន់អាស៊ាន និងជុំវិញបឹងទន្លេសាប ហើយថ្ងៃទី០៣ ខែឧសភា ឆ្នាំ២០២៣ ភ្លើងគប់នឹងដង្ហែមកដល់ខេត្តសៀមរាបជាថ្មី រួចបន្តដង្ហែទៅខេត្តកំពង់ធំនៅថ្ងៃទី០៤ ខែឧសភា ឆ្នាំ២០២៣ ដោយខេត្តសៀមរាបទទួល រៀបចំគប់ភ្លើងកីឡាចំនួន ២ដង។ ជាមួយគ្នានោះលោកស្រី ក៏បានជម្រុញដល់អ្នកពាក់ព័នញធទាងអស់ ជួយសម្របសម្រួលរៀបចំការងារសន្តិសុខ សណ្ដាប់ធ្នាប់ តាមដងផ្លូវដែលគប់ភ្លើងកីឡាឆ្លងកាត់ រៀបចំសម្អាត អនាម័យ ក្នុងក្រុងសៀមរាប រៀបចំប្រជាពលរដ្ឋចូលរួមអបអរសាទរតាមដងផ្លូវដែលភ្លើងគប់កីឡាឆ្លងកាត់ដោយមានក្រវីទង់ជាតិ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
