ថ្លែងក្នុងពិធីប្រគល់សញ្ញាបត្រថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ដល់និស្សិតជ័យលាភីចំនួន ១៨៧៥នាក់ នៃសាកលវិទ្យាល័យ សៅស៍អ៊ីសថ៍អេយសៀ ខេត្តសៀមរាប កាលពីល្ងាចថ្ងៃទី១៣ ខែមីនា ឆ្នាំ២០២៣នេះ ឯកឧត្តម ស សុខា រដ្ឋលេខាធិការ ក្រសួងអប់រំ យុវជន និងកីឡា បានបញ្ជាក់ថា ក្នុងឆ្នាំ២០២២កន្លងទោនេះ អត្រានៃការបោះបង់ការសិក្សារបស់ស្សិតនៅតាមមហាវិទ្យាល័យ មានចំនួនថយចុះគួរឲ្យកត់សម្គាល់ ដោយសារតែអាណាព្យាបាលបានជួយជ្រោមជ្រេងឱ្យកូនៗរបស់ពួកគាត់ បានបន្តការសិក្សារហូតដល់បញ្ចប់បរិញ្ញាបត្រ។
ឯកឧត្តម ស សុខា បានបញ្ជាក់បន្ថែមថា ជាក់ស្ដែងក្នុងឆ្នាំ២០២០កន្លងទៅ អត្រាបោះបង់ការសិក្សារបស់និសិ្សត ដោយងាកទៅចាប់យកការងារធ្វើ ដើម្បីជួយគ្រួសារដោយសារជីវភាពខ្វះខាត គ្មានថវិកាសិក្សាបន្ត ព្រមទាំងកត្តាផ្សេងៗទៀតមានរហូតដល់ ៤២ភាគរយ។ ប៉ុន្តែនៅឆ្នាំ២០២២នេះ អាត្រាបោះបង់ការសិក្សារបស់និស្សិតថយចុះមកត្រឹម ៣២ភាគរយ ដែលការថយចុះនេះ ដោយសារតែគ្រឹះដ៏សំខាន់ពីឪពុកម្តាយ ដែលបានជួយជ្រោមជ្រេងឱ្យកូនៗ បានបន្តការសិក្សារហូតដល់ចប់។ ដោយឡែកការសិក្សារបស់សិស្សចាប់ពីថ្នាក់មតេយ្យរហូតដល់រៀនចប់ថ្នាក់ទី១២ នូវមិនទាន់សម្រេចបានតាមផែនការដែលក្រសួងចង់បានតាមគុណភាពស្តងដាបាននៅឡើយទេ។ តាមការសិក្សាស្រាវជ្រាវរបស់ក្រសួងអប់រំ យុវជន និងកីឡា បានបង្ហាញថា សិស្សដែលបានរៀនចាប់ពីថ្នាក់មតេយ្យរហូតដល់រៀនចប់ថ្នាក់ទី១២ ក្នុងចំណោម ១០០នាក់ មាន៥០នាក់ប៉ុនណ្ណោះបានរៀនចប់ថ្នាក់ទី១២ ក្នុងនោះមានតែ ៥០ភាគរយប៉ុនណ្ណោះ ដែលមានកម្រិតដែលក្រសួងចង់បាន ដែលបញ្ហានេះក្រសួងបានកំពុងតែខិតខំកែសម្រួលកម្មវិធីរៀន និងបង្រៀន ដើម្បីធ្វើឱ្យកាន់តែមានប្រសិទ្ធភាព។
ឯកឧត្តម បានបញ្ជាក់ទៀតថា កន្លងមកនេះ ក្រសួងអប់រំដែលជាសេនាធិការរបស់រាជរដ្ឋាភិបាល បានអនុវត្តប្រកបដោយជោគជ័យនូវយុទ្ធសាស្រ្តកំណែទម្រង់វិស័យឧត្តមសិក្សា ឆ្នាំ២០១៨-២០២៣ រួមមាន៖ ការជំរុញឱ្យគ្រឹះស្ថានឧត្តមសិក្សាសាធារណៈ និងឯកជន រៀបចំក្របខណ្ឌកម្មវិធីសិក្សាឱ្យឆ្លើយតបទៅនឹងការវិវត្តឧស្សាហកម្មសេដ្ឋកិច្ចសង្គមឌីជីថល ការស្រាវជ្រាវ នវានុវត្តន៍ និងការលើកទឹកចិត្តមជ្ឈមណ្ឌលស្រាវជ្រាវ ឧត្តមភាព និងការវាយតម្លៃគុណភាពអប់រំផ្ទៃក្នុង និងវាយតម្លៃគុណភាពអប់រំនៅតាមគ្រឹះស្ថានឧត្តមសិក្សា។
បើតាមលោកបណ្ឌិត សៀន សុវណ្ណា ស្ថាបនិក និងជាប្រធានក្រុមប្រឹក្សាភិបាល នៃសាកលវិទ្យាល័យសៅស៍អ៊ីសថ៍អេយសៀ បានឲ្យដឹងថា ដើម្បីលើកកម្ពស់គុណភាពអប់រំឱ្យឆ្លើយតបទៅនឹងផែនការយុទ្ធសាស្រ្តរបស់ក្រសួងអប់រំ សាកលវិទ្យាល័យសៅស៍អ៊ីសថ៍អេយសៀ បានកំណត់នូវចក្ខុវិស័យ និងបេសកកម្មច្បាស់លាស់ ដើម្បីបណ្ដុះបណ្ដាលកម្មវិធីអប់រំថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត សំដៅចូលរួមអភិវឌ្ឍប្រទេសជាតិ។ នៅរយៈពេល ១៦ឆ្នាំកន្លងមកនេះ សាកលវិទ្យាល័យសៅស៍អ៊ីសថ៍អេយសៀ បានដំណើរការបណ្តុះបណ្តាលនិស្សិតថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ដែលមាននិស្សិតចុះឈ្មោះចូលរៀនសរុបចំនួន ១៩.៩៩៧នាក់ ហើយបានបញ្ចប់ការសិក្សាចំនួន ៧.៦៤៤នាក់។ ជាមួយគ្នានេះ និស្សិតជ័យលាភីដែលនឹងត្រូវទទួលសញ្ញាបត្រនៅថ្ងៃនេះចំនួន ១.៨៧៥នាក់ ស្រីចំនួន ១.០១១នាក់៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
