នៅថ្ងៃទី១៥ ខែមីនា ឆ្នាំ២០២៣ អង្គការឡូតទុសវើល ខេត្តសៀមរាប បាននាំយកឯកសណ្ឋាន និងសម្ភារៈសិក្សា ដែលជាជំនួយរបស់ព្រះតេជគុណ ឆាអ៊ូ ព្រះចៅអធិការវត្តភីរ៉ូចាណាគុកជេសន់វ៉ុន និងសហការីនៃសាធារណរដ្ឋកូរ៉េ ចែកជូនដល់សិស្សានុសិស្ស នៃសាលាបឋមសិក្សាគោកកក់ភីរ៉ូចាណា ចំនួន១៧០នាក់ ស្ថិតក្នុងភូមិគោកកក់ ឃុំស្វាយចេក ស្រុកអង្គរធំ ខេត្តសៀមរាប។
តាមរបាយការណ៍របស់អ្នកស្រី ញេប សាយឿន គណៈគ្រប់គ្រង នៃសាលាបឋមសិក្សាគោកកក់ភីរ៉ូចាណា សាលារៀននេះ មានអគារសិក្សា ១ខ្នងមាន ៦បន្ទប់ និងអគាររដ្ឋបាល ១ខ្នងមាន២បន្ទប់ រួមមាន ទីចាត់ការ ១បន្ទប់ និងបណ្ណាល័យ ១បន្ទប់។ សាលានេះដែរ មានកម្រិតមត្តេយ្យសិក្សា ថ្នាក់ទី១ រហូតដល់ថ្នាក់ទី៦។ នៅឆ្នាំដំបូងសាលារៀននេះ មានអ្នកគ្រូ ចំនួន ២នាក់ និងមានសិស្សត្រឹមតែ ៥៦នាក់ប៉ុណ្ណោះ។ បច្ចុប្បន្ន សាលារៀននេះទទួលបានអ្នកគ្រូចំនួន ម្នាក់បន្ថែមទៀត និងមានចំនួនសិស្សសរុប ១៧០នាក់។ ប៉ុន្តែអ្នកស្រី បញ្ជាក់ថា ដើម្បីឱ្យសមស្របតាមចំនួនសិស្ស ដែលមានការកើនឡើង សាលារៀននេះត្រូវមានគ្រូបង្រៀនយ៉ាងហោច ៦នាក់។
មានប្រសាសន៍ក្នុងឱកាសនោះ លោក សេង គីមហុង ប្រធានគ្រប់គ្រងទូទៅ អង្គការឡូតទុសវើល លើកឡើងថា តាមរយៈការស្នើសុំរបស់សហគមន៍ និងមន្ទីរអប់រំយុវជន និងកីឡាខេត្តសៀមរាប ទីតាំងព្រៃសហគមន៍ ដ៏ស្ងាត់ជ្រងំនេះ បានប្រែក្លាយទៅជាសាលារៀន ដែលមានភាពអ៊ូរអរ និងសម្រួលការធ្វើដំណើរទៅសាលារៀនរបស់កុមារតូច ធំ ក៏ដូចជាអាណាព្យាបាលក្នុងមូលដ្ឋាននេះ។ លោក បញ្ជាក់ ជាទឹកចិត្តដ៏សប្បុរសពីព្រះតេជគុណ ឆាអ៊ូ និងសហការីទាំងអស់ សាលាបឋមសិក្សានេះបានសាងសង់នៅឆ្នាំ២០២០ និងបើកទទួលសិស្សរយៈពេល ២ឆ្នាំមកហើយ។
ព័ត៌មានជាតិ ថ្មីៗ
លោក បន្ថែមថា សាលារៀនដ៏ស្រស់ស្អាតនេះ ក្រៅពីអគារសិក្សា និងអគាររដ្ឋបាល ក៏មានធុងចម្រោះទឹកស្អាត ដែលអាចឱ្យកុមារទទួលទាន និងប្រើប្រាស់ទូទៅដោយសុវត្ថិភាព បង្គន់អនាម័យចំនួន ៤បន្ទប់់ សម្ភារៈក្មេងកម្សាន្ត និងទីលានបាល់ទាត់ផងដែរ។ ដោយឡែក ក្នុងថ្នាក់រៀននីមួយៗ អាចផ្ទុកសិស្សបានចំនួន ៣០នាក់ ជាមួយនិងកង្ហាពិដាន ចំនួន ២ ដែលសម្រួលដល់សិស្សកំពុងសិក្សាក្នុងថ្នាក់ផងដែរ។
សូមជម្រាបថា អំណោយចែកជូនសិស្សានុសិស្ស នាពេលនោះ ម្នាក់ៗទទួលបាន កាបូប ១ សៀវភៅ ប៊ិក ១កញ្ចប់ ឯកសណ្ឋានសិស្ស ១ឈុត ឯកសណ្ឋានកីឡា ១ឈុត និងកន្សែង១។ នេះជាឆ្នាំទី២ហើយ ដែលព្រះតេជគុណ ឆាអ៊ូ បានផ្ដល់អំណោយដល់ សិស្សានុសិស្ស នៃសាលាបឋមសិក្សាគោកកក់ភីរ៉ូចាណា បន្ទាប់ពីសាងសង់សាលារៀននេះរួចរាល់។
អត្ថបទ និងរូបភាព៖ លោក សេង ផល្លី
