នៅថ្ងៃទី១៤ ខែមីនា ឆ្នាំ២០២៣នេះ ក្រុមគ្រូពេទ្យស្ម័គ្រចិត្ត នៃសមាគមមនុស្សធម៌ឈឹងអ៊ីសាន់សៀហួយ មកពីកោះតៃវ៉ាន់ ប្រទេសចិន បានចុះពិនិត្យ និងព្យាបាលជំងឺទូទៅតាមបែបបុរាណចិន ដោយឥតគិតថ្លៃ និងចែកអំណោយសប្បុរសធម៌ ជូនប្រជាពលរដ្ឋ ព្រមទាំងចែកសម្ភារសិក្សាដល់សិស្សានុសិស្ស ស្ថិតក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប សរុប ១០២០គ្រួសារ។
ការពិនិត្យព្យាបាលនេះ ធ្វើឡើងនៅវត្តកំពង់ភ្លុក ដែលមានរយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី ១៦ ខែមីនានេះ ដោយមិនកំណត់ចំនួនមនុស្ស និងលើកទឹកចិត្តដល់ប្រជាពលរដ្ឋមកពីស្រុក ឃុំដទៃមកពិនិត្យ និងព្យាបាលដោយឥតគិតថ្លៃនេះផងដែរ។
ឯកឧត្តម អ្នកឧកញ៉ា បណ្ឌិត សៀង ណាំ តំណាងរាស្ត្រមណ្ឌលខេត្តសៀមរាប លើកឡើងថា កន្លងមកឃុំកំពង់ភ្លុក មានការលំបាក និងពិបាកធ្វើដំណើរ ដោយសារតែនៅជាប់តំបន់៣បឹងទន្លេ និងមានប៉ះពាល់ដោយកម្រិតទឹកទន្លេឡើងចុះជារៀងរាល់ឆ្នាំ។ ក្នុងនាមអ្នកតំណាងឱ្យប្រជាជន ឯកឧត្តម បានកសាងផ្លូវថ្នល់ ស្ដារព្រែក មណ្ឌលសុខភាព និងការអភិវឌ្ឍជាច្រើនរបស់រាជរដ្ឋាភិបាល នៅក្នុងមូលដ្ឋាន ដែលជាការគិតគូររបស់សម្ដេចតេជោ ហ៊ុន សែន នាយករដ្ឋមន្ត្រី។ តាមរយៈការគិតគូរពីសុខុមាលភាពរបស់ប្រជាជន នៅក្នុងឃុំកំពង់ភ្លូក ឯកឧត្តម រួមនិងអាជ្ញាធរខេត្ត បានអញ្ជើញក្រុមគ្រូពេទ្យស្ម័គ្រចិត្ត នៃប្រទេសចិន ដែលមានជំនាញច្បាស់លាស់ មកពិនិត្យ និងព្យាបាលជំងឺទូទៅដោយឥតគិតថ្លៃជូនប្រជាជននៅទីនេះ។ ឯកឧត្តម អ្នកឧកញ៉ា បានថ្លែងអំណរគុណសមាគមមនុស្សធម៌ឈឹងអ៊ីសាន់សៀហួយ ដែលបានចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់សុខភាពប្រជាពលរដ្ឋនៅតាមជនបទ ក៏ដូចជាឧបត្ថម្ភជាអំណោយដល់ជនក្រីក្រ និងសិស្សានុសិស្សផងដែរ។
ក្នុងនាមឯកឧត្តម ទៀ សីហា អភិបាលខេត្តសៀមរាប លោក ពិន ប្រាកដ អភិបាលរងខេត្ត ក៏បានថ្លែងអំណរគុណដល់ក្រុមគ្រូពេទ្យស្ម័គ្រចិត្ត នៃប្រទេសចិន ដែលបានមកដល់ឃុំកំពង់ភ្លុក ដែលជាឃុំស្ថិតក្នុងតំបន់ការពារ នៃបឹងទន្លេសាបនេះ។ ជាមួយនោះ លោក អភិបាលរងខេត្ត ក៏បានគូសបញ្ជាក់ដែរថា ក្រៅពីការគិតគូរទៅលើសុខុមាលភាពរបស់ប្រជាពលរដ្ឋនៅឃុំកំពង់ភ្លុកនេះ រាជរដ្ឋាភិបាល ក៏ដូចជារដ្ឋបាលខត្ត បានគិតគូរពីការរស់នៅប្រចាំថ្ងៃរបស់ប្រជាពលរដ្ឋ ជាពិសេសអ្នកកំពុងអាស្រ័យផលនៅលើដីតំបន់៣ ដែលជាដីអភិរក្សបឹងទន្លេសាប ដើម្បីស្នើដល់សម្ដេចតេជោ ហ៊ុន សែន ធ្វើការកាត់ឆ្វៀលជូនប្រជាពលរដ្ឋ ក្នុងឃុំកំពង់ភ្លុក ដើម្បីអាស្រ័យផលបានជាប្រក្រតី។
គួរជម្រាបថា ក្រុមគ្រូពេទ្យស្ម័គ្រចិត្ត នៃសមាគមមនុស្សធម៌ឈឹងអ៊ីសាន់សៀហួយ បានចុះពិនិត្យ និងព្យាបាលទូទៅ និងចែកអំណោយមនុស្សធម៌នៅប្រទេសកម្ពុជាមានរយៈពេល ២០ឆ្នាំហើយគិតមកដល់បច្ចុប្បន្ន ដោយក្នុងមួយឆ្នាំៗ ពួកគេធ្វើដំណើរមកប្រទេសកម្ពុជាចំនួន ២លើក។
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
