ស្ថិតក្នុងយុគសម័យឌីជីថល បានធ្វើឱ្យវិស័យព័ត៌មានដើរតួនាទីយ៉ាងខ្លាំងក្នុងការផ្សព្វផ្សាយព័ត៌មាន ដែលជះឥទ្ធិពលទាំងវិជ្ជមាន និងអវិជ្ជមាន ហើយរួមជាមួយនឹងស្មារតីនៃបទពិសោធន៍ជាមូលដ្ឋានគ្រឹះនៃវិស័យព័ត៌មានរបស់រដ្ឋក្នុងទិសដៅកសាងឱ្យបាននូវអភិបាលកិច្ចល្អលើវិស័យព័ត៌មានថ្នាក់ក្រោមជាតិ និងដើម្បីជំរុញប្រសិទ្ធភាពនៃការផ្សព្វផ្សាយ បំផុសព័ត៌មានឱ្យចូលកៀកទៅនឹងប្រជាពលរដ្ឋគ្រប់មធ្យោបាយ ក្នុងការបំផុស និងរំលេចនូវផលប្រយោជន៍របស់ប្រជាពលរដ្ឋនៅតាមមូលដ្ឋាន។
ថ្លែងក្នុងពិធីបើកអង្គសិក្ខាសាលាស្តីពី “ទិសដៅនៃការពង្រឹងយន្តការ និងគោលការណ៍នយោបាយព័ត៌មាន” នៅសាលាខេត្តសៀមរាប នាព្រឹកថ្ងៃទី១៦ ខែមីនា ឆ្នាំ២០២៣នេះ លោកស្រី ម៉ននី រង្សី អភិបាលរងខេត្ត បានចាត់ទុកថា វិស័យព័ត៌មានក្នុងយុគសម័យឌីជីថល ជះឥទ្ធិពលទាំងវិជ្ជមាន និងអវិជ្ជមាន ក្នុងការផ្សព្វផ្សាយ។ ជាមួយគ្នានោះអភិបាលកិច្ចល្អក្នុងវិស័យព័ត៌មាន គឺកិច្ចពង្រឹងវេទិកាសន្ទនាឆ្លើយឆ្លង រវាងមន្ត្រីព័ត៌មាន និងមន្ទីរវិស័យជំនាញជុំវិញរដ្ឋបាលខេត្ត ដើម្បីផ្ដល់ការយល់ដឹងដល់សាធារណជន ឈានទៅការបង្កើតបាននូវលំហនៃតម្លាភាព គណនេយ្យភាព និងការដោះស្រាយបញ្ហាជូនប្រជាពលរដ្ឋ ប្រកបដោយប្រសិទ្ធភាព និងស័ក្ដិសិទ្ធភាព។ ក្នុងការបញ្ជ្រៀបព័ត៌មានជាប្រចាំ អំពីសមិទ្ធផលដែលរដ្ឋបាលថ្នាក់ក្រោមជាតិ និងមន្ទីរ អង្គភាពនីមួយៗ សម្រេចបាន ដើម្បីឱ្យប្រជាពលរដ្ឋទូទៅបានជ្រាប និងទទួលព័ត៌មាន ព្រមជាមួយនឹងការឆ្លើយតបទៅនឹងសំណូមពរ និងបញ្ហាប្រឈមឱ្យកាន់តែមានប្រសិទ្ធភាព ឆាប់រហ័ស និងចំគោលដៅនៃបញ្ហា ឬសំណូមពរ។
លោកស្រី អភិបាលរងខេត្ត ក៏បានស្នើដល់អង្គសិក្ខាសាលាត្រូវយកចិត្តទុកដាក់ស្តាប់ ដើម្បីជាបទពិសោធន៍សម្រាប់មូលដ្ឋានក្នុងការឆ្លើយតបទៅនឹងបញ្ហាសង្គមដែលកើតមាននៅមូលដ្ឋាន។ ម្យ៉ាងទៀតត្រូវបញ្ចេញនូវមតិយោបល់ទៅកាន់វាគ្មិន ដើម្បីឱ្យវាគ្មិនបានបកស្រាយបន្ថែមរាល់ចម្ងល់របស់អង្គសិក្ខាសាលា។ លោកស្រីរំពឹងថា តាមរយៈសិក្ខាសាលារយៈពេល២ថ្ងៃនេះ នឹងទទួលបានជោគជ័យ ផ្លែផ្កាយ៉ាងត្រចះត្រចង់ ដើម្បីចូលរួមសម្រេចបាននូវបេសកកម្មដ៏ឧត្តុង្គឧត្តមក្នុងកិច្ចថែរក្សា ការពារ សុច្ចរិតភាព នៃផលប្រយោជន៍រួមរបស់ជាតិក៏ដូចជាសន្តិភាព ស្ថិរភាព និងការអភិវឌ្ឍប្រទេសជាតិ ដែលជាឆន្ទៈមុះមុតរបស់រាជរដ្ឋាភិបាល រួមគ្នាជាមួយប្រជាពលរដ្ឋ។
សូមជំរាបថា អង្គសិក្ខាសាលាស្តីពី “ទិសដៅនៃការពង្រឹងយន្តការ និងគោលការណ៍នយោបាយព័ត៌មាន” ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល សហការជាមួយរដ្ឋបាលខេត្តសៀមរាប មានរយៈពេល ២ថ្ងៃ នៅថ្ងៃទី១៦-១៧ ខែមីនា ឆ្នាំ២០២៣ នៅសាលាខេត្តសៀមរាប។ សិក្ខាសាលានេះដែរ គឺដើម្បីពង្រឹង និងរំលេចការយល់ដឹងដល់បន្ថែមទៀតនូវរាល់បញ្ហាជា អន្តរវិស័យនៅជុំវិញរដ្ឋបាលខេត្ត ដែលបានផ្តល់សេវាសាធារណៈប្រកបដោយការទទួលខុសត្រូវខ្ពស់ ជាមួយនឹងកិត្យានុភាព ឧត្ដមភាពនៃការដឹកនាំរាប់តាំងពីថ្នាក់ជាតិរហូតដល់ថ្នាក់ក្រោមជាតិ ដោយមានសិក្ខាកាមជាមន្ត្រីទទួលបន្ទុកជាអ្នកនាំពាក្យសាលាខេត្ត ប្រធានមន្ទីរអង្គភាពជំនាញ មន្ទីរស្ថាប័នពាក់ព័ន្ធមកពីខេត្តចំនួន៤ រួមមាន៖ ខេត្តសៀមរាប កំពង់ធំ ព្រះវិហារ និងខេត្តពោធិសាត់ សរុបជាង ២០០នាក់ រួមជាមួួនឹងវាគ្មិន លោក ឱម ច័ន្ទតារ៉ា ជំនួយការអមទីស្ដីការ គណៈរដ្ឋមន្ត្រី និងជាទីប្រឹក្សាអង្គភាពអ្នកនាំពាក្យរាជរដ្ឋាភិបាល និងលោក លោកស្រី ប្រតិភូអមដំណើរនៃអង្គភាពអ្នកនាំពាក្យរាជរដ្ឋាភិបាលមួយចំនួនទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
