នៅតាមដងផ្លូវសំខាន់ៗក្នុងក្រុងសៀមរាប នារសៀលថ្ងៃទី១៦ ខែមីនា ឆ្នាំ២០២៣ ព្រះសង្ឃ មន្ត្រីរាជការ និងប្រជាពលរដ្ឋ ក្នុងខេត្ត និងមកពីតាមបណ្ដាខេត្ដផ្សេងៗ បានចូលរួមយ៉ាងច្រើនកុះករ ដើម្បីដង្ហែរូបសំណាកព្រះសង្ឃរាជ ជោតញ្ញាណោ ជួន ណាត ដែលជាផ្នែកមួយនៃពិធីរំឭកព្រះឧបការគុណព្រះអង្គ និងក្រុមជំនុំព្រះត្រៃបិដកខ្មែរលើកទី១២។
ព្រះតេជគុណកុសលមេធា ស៊ី សំណាង និមន្តមកពីរាជធានីភ្នំពេញ មានសង្ឃដីកាថា ទិវារំលឹកគុណនេះ ជាការបណ្ដុះគំនិតដល់ប្រជាពលរដ្ឋ ក៏ដូចជាព្រះសង្ឃឱ្យបានដឹងនូវសកម្មភាព របស់សម្ដេចព្រះសង្ឃរាជ ជួន ណាត និងក្រុមជំនុំព្រះត្រៃបីដកខ្មែរ ដែលប្រជាពលរដ្ឋខ្មែរចាត់ទុកព្រះអង្គថាជាវីរបុរសដ៏អស្ចារ្យ ដោយព្រះអង្គបានលះបង់កម្លាំង កាយចិត្ដ និងប្រើពេលប្រមាណ៤០ឆ្នាំ ក្នុងបេសសកម្មរៀបចំគម្ពីរព្រះត្រៃបិដកខ្មែរ ១១០ភាគ តាំងពីឆ្នាំ១៩៣០ រហូតដល់ឆ្នាំ១៩៦៨ ទើបសម្រេចបានចប់សព្វគ្រប់ នូវគម្ពីរដ៏ពិសិដ្ឋ ដែលមានគុណតម្លៃមិនអាចកាត់ថ្លៃបាន និងមានលក្ខណៈពិសេសជាងបណ្តាប្រទេស ដែលគោរពព្រះពុទ្ធសាសនាដទៃទៀ លើពិភពលោកទាំងអស់។ ព្រះអង្គបន្តថា លក្ខណៈពិសេសនោះ គឺប្រទេសទាំងនោះ មានត្រឹមភាសាជាតិរបស់ខ្លួនប៉ុណ្ណោះ ប៉ុន្តែប្រទេសកម្ពុជា លោកអ្នកប្រាជ្ញខ្មែរបានរៀបចំឱ្យមានទាំងភាសាដើម គឺមគធភាសា ឬភាសាបាលី និងភាសាខ្មែរ។
ព័ត៌មានជាតិ ថ្មីៗ
ដោយឡែក គរុសិស្ស នៃសាលាគរុកោសល្យ និងវិក្រិតការខេត្ដសៀមរាប លើកឡើងថា នេះលើកទី២ហើយ ដែលពួកគេបានចូលរួមពិធីរំឭកព្រះឧបការគុណព្រះអង្គ និងក្រុមជំនុំព្រះត្រៃបិដកខ្មែរនេះ។ ពួកគេ បន្តថា សម្រាប់ស្នាដៃ ដែលព្រះអង្គបានបន្សល់ទុក រួមមាន វចនានុក្រមខ្មែរ ព្រះរាជនិពន្ធទំនុកច្រៀងបទនគររាជ សម្រាប់ការគោរពទង់ជាតិ បទគោរពទង់ព្រះពុទ្ធសាសនា បទសារភញ្ញ ។ល។
សូមបញ្ជាក់ថា ពីធីរំលឹកគុណនៅឆ្នាំនេះ រៀបចំឡើងមានរយៈពេលពីរថ្ងៃ ចាប់ពីថ្ងៃទី១៦ ដល់ថ្ងៃទី១៧ ខែមីនា ឆ្នាំ២០២៣។ ពិធីនេះ បានអាក់ខានរៀបចំរយៈពេល ពីរឆ្នាំ ដោយសារជំងឺកូវីដ១៩។ នៅឆ្នាំនេះដែរ ការដង្ហែក្បួន មានរូបសំណាកសម្ដេចព្រះសង្ឃរាជ ជួន ណាត រៀបជា ២៩ផែន ដោយមានផែនព្រះសង្ឃ ផែនគ្រូបង្រៀន កងកម្លាំងប្រដាប់អាវុធ តាជីយាយជី ជាដើម ដោយចេញពីវត្ដព្រះរាជបូព៌ និងឆ្ពោះទៅតាមផ្លូវសំខាន់ៗជាច្រើនទៀត ក្នុងក្រុងសៀមរាប៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
