នារសៀលថ្ងៃទី៣០ ខែមីនា ឆ្នាំ២០២៣នេះ សាខាកាកបាទក្រហមកម្ពុជាខេត្តសៀមរាប បានសហការជាមួយអង្គការទ្រទ្រង់សុវត្ថិភាពកម្ពុជា (CAMSAFE) បើកវគ្គបណ្ដុះបណ្ដាលដល់គ្រូបង្គោលសុវត្ថិភាពចរាចរណ៍ ផ្ដោតទៅលើសុជីវធម៌ផ្ទាល់ខ្លួនដើម្បីទប់ស្កាត់ការបើកបរក្រោមឥទ្ធិពលគ្រឿងស្រវឹង ដែលវគ្គបណ្ដុះបណ្ដាលនេះមានរយៈ ២ថ្ងៃ នៅវិទ្យាល័យ ១០មករា ១៩៧៩ ក្រុងសៀមរាប។
លោក លី ប៊ុនណា លេខាធិការគណៈកម្មាធិការសាខាកាកបាទក្រហមកម្ពុជាខេត្ត មានប្រសាសន៍ថា វគ្គបណ្តុះបណ្តាលនាពេលនេះ ក្នុងគោលបំណងបង្កើនសមត្ថភាពអ្នកប្រើប្រាស់ផ្លូវ ដើម្បីបង្ការការបើកបរក្រោមឥទ្ធិពលនៃគ្រឿងស្រវឹងតាមរយៈការប្រើប្រាស់ការស្រាវជ្រាវបែបវិទ្យាសាស្ត្រ លើកទឹកចិត្តឲ្យមានការអនុវត្តវិធានការណ៍នានាដើម្បីកាត់បន្ថយគ្រោះថ្នាក់ចរាចរណ៍ផ្លូវគោកតាមរយៈការបង្រៀន ការធ្វើយុទ្ធនាការ និងរំលែកបទពិសោធន៍ដែលទទួលបាន បង្កើនការរួមគ្នាធ្វើសហប្រតិបត្តិការ ជាពិសេសដើម្បីកាត់បន្ថយគ្រោះថ្នាក់ចរាចរណ៍ដែលមានពាក់ព័ន្ធដល់ការបើកបរក្រោមឥទ្ធិពលនៃគ្រឿងស្រវឹង។ លោកថា ការទទួលទានគ្រឿងស្រវឹងជាជម្រើសផ្ទាល់ខ្លួន ប៉ុន្តែជារៀរាល់ថ្ងៃឃើញមានព័ត៌មានផ្សាយអំពីគ្រោះថ្នាក់ចរាចរណ៍ ដែលបណ្តាលមកពីការបើកបរក្រោមឥទ្ធិពលនៃគ្រឿងស្រវឹងជារឿយៗ ដែលវាជាបញ្ហាប្រឈម ហើយនឹងជាក្តីបារម្ភរបស់រាជរដ្ឋាភិបាលដោយសារវាបានធ្វើឱ្យប៉ះពាល់ដល់អាយុជីវិត របួស ពិការ ធនធានមនុស្ស បន្សល់ទុកនូវ កុមារ កំព្រា ស្ត្រីមេម៉ាយ និងធ្វើឱ្យបាត់បង់នូវសេដ្ឋកិច្ចគ្រួសារ និងសេដ្ឋកិច្ចជាតិផងដែរ។
លោក លី ប៊ុនណា បន្តថា ជាមួយបញ្ហានេះ បច្ចុប្បន្ននអាជ្ញាធរខេត្តបានខិតខំប្រឹងប្រែងឆ្លើយតប និងចាត់វិធានការដោះស្រាយតាមគ្រប់រូបភាព រួមទាំងការប្រើប្រាស់កំលាំងចំរុះដូចជា៖ កំលាំងនគរបាលចរាចរណ៍ កងរាជអាវុធហត្ថ កំលាំងប្រជាការពារ រួមទាំងមានកិច្ចសហការជាមួយអ្នកពាក់ព័ន្ធផ្សេងទៀតមានក្រុមហ៊ុន និងអង្គការក្រៅរដ្ឋាភិបាល។ ជាពិសេសអាជ្ញាធរពាក់ព័ន្ធ ក៏បានជម្រុញសកម្មភាពការចុះផ្សព្វផ្សាយតាមរយៈកម្លាំងយុវជនស្ម័គ្រចិត្តគ្រប់ប្រភេទ ដូចជាយុវជនកាកបាទក្រហមកម្ពុជា យុវជនសហភាពសហព័ន្ធយុវជនកម្ពុជា និងយុវជនកាយរិទ្ធិជាតិកម្ពុជា ដើម្បីផ្សព្វផ្សាយបន្តដល់សិស្សានុសិស្សតាមគ្រឹះស្ថានសិក្សា និងអ្នកស្ម័គ្រចិត្តផ្សព្វផ្សាយដល់ប្រជាពលរដ្ឋក្នុងសហគមន៍ ចុះអនុវត្តសកម្មភាពផ្សព្វផ្សាយដល់យុវជនយុវសិស្សលោកគ្រូអ្នកគ្រូនៅតាមគ្រឹះស្ថានសិក្សា និងផ្សព្វផ្សាយនូវសារសុវត្ថិភាពចរាចរណ៍តាមខិត្តប័ណ្ណ រូបភាពផ្ទាំងធំនៅតាមទីតាំងភ្លើងសញ្ញាចរាចរណ៍ និងតាមទីសាធារណៈ។
ព័ត៌មានជាតិ ថ្មីៗ
ជាមួយគ្នានោះដែរ បន្ទាប់ពីបញ្ចប់វគ្គបណ្តុះបណ្ដាលនេះ លោករំពឹងថា លោកលោកស្រីដែលជាគ្រូបង្គោល នឹងបានទទួលចំណេះដឹង និងមានភារកិច្ចធ្វើការ ផ្សព្វផ្សាយចែករំលែកបន្តដល់មន្រ្តី និយោជិក តាមអង្គភាពនីមួយៗ យុវសិស្សក្នុងគ្រឹះស្ថានសិក្សា្រជាពលរដ្ឋក្នុងសហគមន៍។ ហើយសកម្មភាពចូលរួមរបស់លោកគ្រូ អ្នកគ្រូបន្ទាប់ពីបានចូលរួមនៅក្នុងវគ្គបណ្តុះបណ្តាលនេះ នឹងអាចរួមចំណែកជួយឲ្យរាជរដ្ឋាភិបាលក្នុងការសម្រេចបានតាមផែនការជាតិសុវត្ថិភាពចរាចរណ៍ផ្លូវគោកឆ្នាំ២០២១-២០៣០ ដែលបានកំណត់គោលដៅកាត់បន្ថយចំនួនអ្នកស្លាប់ដោយសារគ្រោះថ្នាក់ ចរាចរណ៍ឲ្យបា ន៥០%ត្រឹមឆ្នាំ២០២៣ខាងមុខនេះ។ ក្នុងនោះដែរ លោកក៏សូមថ្លែងអំណរគុណចំពោះអង្គការទ្រទ្រង់សុវត្ថិភាពកម្ពុជា និងវិទ្យាស្ថានស្រាវជ្រាវ និងបណ្តុះបណ្តាលនៃអង្គការសហប្រជាជាតិ(UNITAR) និងកាជួយឧបត្ថម្ភពីក្រុមហ៊ុន PERNOD RICARD CAMBODGE សម្រាប់ការបើកវគ្គគ្រូបង្គោលសុវត្ថិភាពចរាចរណ៍នៅពេលនោះ ដើម្បីចូលរួមកាត់បន្ថយគ្រោះថ្នាក់ចរាចរណ៍នៅក្នុងខេត្តសៀមរាបទាំងមូល៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ អ៊ុន ណារាជ្យ
