នៅថ្ងៃទី២ ខែមេសា ឆ្នាំ២០២៣ ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប និងសមាគម ឡាយអ៊ិនក្លឹប អន្តរជាតិ ៣០០តំបន់ជី១(G1)នៃប្រទេសចិន បានសម្ពោធដាក់ឱ្យប្រើប្រាស់ជាផ្លូវការអណ្តូងទឹកខ្នាតធំសរុបចំនួន ២៥អណ្ដូង ជូនដល់ប្រជាពលរដ្ឋរស់នៅក្នុងស្រុកប្រាសាទបាគង និងស្រុកពួក ខេត្តសៀមរាប ដែលសរុបជាទឹកប្រាក់ចំនួន ៣៦ ០០០ដុល្លារអាមេរិក។
ថ្លែងទៅកាន់ប្រជាពលរដ្ឋ នៅតាមស្រុកទាំង២ ដែលទទួលបានអណ្តូងទឹកខ្នាតធំ ឯកឧត្តម អ្នកឧកញ៉ា សៀង ណាំ លើកឡើងថា ទឹកស្អាតជាប្រភពនៃជីវិត ជាមួយនេះក្នុងរដូវប្រាំង ការរក្សាទឹកមានសារសំខាន់ណាស់នៅតាមទីជនបទ ដែលវាបានជួយសម្រាលការលំបាក និងកាត់បន្ថយការចំណាយជាច្រើន។ ឯកឧត្តម សង្ឃឹមថា អណ្តូងទឹក ដែលបានប្រគល់ជូនប្រជាពលរដ្ឋនៅពេលនេះ នឹងអាចជួយដល់ជីវភាពរស់នៅរបស់ប្រជាពលរដ្ឋកាន់តែប្រសើរឡើង និងកាត់បន្ថយជំងឺផ្សេងៗ មកពីការប្រើប្រាស់ទឹកមិនស្អាត។ នាពេលខាងមុខសប្បុរសជន នៃសមាគមតោអន្តរជាតិ នៃបណ្តាប្រទេសផ្សេងៗទៀត នឹងបន្តជួយអណ្តូងទឹកបន្ថែមទៀតមកកម្ពុជា ជាពិសេសខេត្តសៀមរាប។
ឯកឧត្តម ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវថែរក្សាសុខភាពអនាម័យឱ្យបានគ្រប់ៗគ្នា ជាពិសេសត្រូវ ពិសារទឹកដាំពុះ ឬទឹកស្អាត បរិភោគចំណីអាហារត្រូវពិនិត្យពិច័យឱ្យបានត្រឹមត្រូវ ដើម្បីចៀសវាងពីជំងឺរាគរុស ដែលនាំឱ្យខូចសុខភាពនិងខាតបង់ថវិកាគ្រួសារក្នុងការពិនិត្យនិងព្យាបាលជំងឺផ្សេងៗ។
គួរបញ្ជាក់ថា សម្រាប់ស្រុកប្រាសាទបាគង មានឃុំសរុបចំនួន ៩ ទទួលបានអណ្ដូងទឹកចំនួន ១១ ដែលស្ថិតនៅតាមឃុំចំនួន ៤ និងមានប្រជាពលរដ្ឋប្រើប្រាស់ទឹកប្រមាណ ៣ ០០០គ្រួសារ ។ ដោយឡែក ស្រុកពួក ទទួលបានអណ្ដូងទឹកចំនួន ១៤ ដែលស្ថិតនៅតាមឃុំចំនួន ៧ និងមានប្រជាពលរដ្ឋប្រើប្រាស់ទឹកប្រមាណ ២ ០០០គ្រួសារ។
អត្ថបទ និងរូបភាព: លោក យូ វង្ស
កែសម្រួល: លោក សេង ផល្លី
