កាលពីចុងសប្ដាហ៍កន្លងទៅនេះ ថ្នាក់ដឹកនាំ និងសមាជិក នៃសមាគមហ្វឹកហាត់បាញ់កាំភ្លើងកម្ពុជា សាខាខេត្តសៀមរាបប្រមាណជាង ៤០រូប ត្រូវបានប្រកាសតែងតាំងជាផ្លូវការ ក្រោមអធិបតី ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានសមាគមហ្វឹកហាត់បាញ់កាំភ្លើងកម្ពុជា និងលោក ពិន ប្រាកដ អភិបាលរងខេត្តសៀមរាប។
តាមរបាយការណ៍របស់ លោក ម៉ក់ ធារ៉ា ប្រធានសមាគមហ្វឹកហាត់បាញ់កាំភ្លើងកម្ពុជា សាខាខេត្តសៀមរាប បង្ហាញថា ទីស្នាក់ការសមាគមហ្វឹកហាត់បាញ់កាំភ្លើងកម្ពុជា សាខាខេត្តសៀមរាប មានទីតាំងស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប។ សមាសភាពថ្នាក់ដឹកនាំ សមាជិក សមាជិកាសមាគមហ្វឹកហាត់បាញ់កាំភ្លើងកម្ពុជាសាខាខេត្តសៀមរាប សុទ្ធតែជាបញ្ញាវ័ន្ត ជាធនធានមនុស្សដ៏សំខាន់ៗ មកពីស្ថាប័ន អង្គភាពរដ្ឋ និងវិស័យឯកជន ក្នុងនោះក៏មានជនជាតិបរទេសផងដែររួមមាន ចិន កូរ៉េ និងថៃ។ លោកបន្តថា ការបង្កើតសមាគមនេះ មានគោលបំណងចូលរួមចំណែកជួយអភិវឌ្ឍ និងផ្សព្វផ្សាយវិស័យកីឡាបាញ់កាំភ្លើងកម្ពុជា ដែលផ្ដល់ឱកាសដល់អ្នកមានទេពកោសល្យ មកពីគ្រប់មជ្ឈដ្ឋាន បានបញ្ចេញសមត្ថភាព ចូលរួមការប្រកួតកីឡាបាញ់កាំភ្លើង ជ្រើសរើសជើងឯកថ្នាក់ជាតិប្រចាំឆ្នាំនៅរាជធានីភ្នំពេញ និងក្លាយជាកីឡាករឆ្នើមតំណាងប្រទេសជាតិ។
លោក ពិន ប្រាកដ វាយតម្លៃថា ការបង្កើតសមាគមហ្វឹកហាត់បាញ់កាំភ្លើងកម្ពុជា សាខាខេត្តសៀមរាបនេះ នឹងចូលរួមទាក់ទាញភ្ញៀវទេសចរជាតិ និងអន្តរជាតិ ដែលមានការចាប់អារម្មណ៍លើកីឡាបាញ់កំាំភ្លើងនេះ ក៏ដូចជាទាក់ទាញនូវការរៀបចំព្រឹត្តិការណ៍កីឡាថ្នាក់ជាតិ និងអន្តរជាតិនាពេលខាងមុខ។
ជាមួយនោះ ឯកឧត្តម នាយឧត្តមសេនីយ៍ មៀច សុផាន់ណា គូសបញ្ចាក់ថា ការបង្កើតសមាគមនេះឡើង ដើម្បីលើកកម្ពស់វិស័យកីឡាបាញ់កាំភ្លើង ប៉ុន្តែកាំភ្លើងក៏ជាអាវុធយោធូបករណ៍ ដែលអាចយកទៅប្រើប្រាស់ក្នុងគោលដៅច្រើនយ៉ាង និងអាចប៉ះពាល់ដល់អាយុជីវិតមនុស្សផងដែរ។ ដូច្នេះ ការរៀបចំរបស់សមាគមត្រូវទាមទារឱ្យមានច្បាប់ និងការយល់ដឹងអំពីសុវត្ថិភាពឱ្យបានត្រឹមត្រូវ។
អត្ថបទ និងរូបភាព: លោក យូ វង្ស
កែសម្រួល: លោក សេង ផល្លី
