កាលពីចុងសប្ដាហ៍កន្លងទៅនេះ ព្រះតេជគុណ ឡាច ចន្ថា ព្រះគ្រូចៅអធិការវត្តដំណាក់ គណៈកម្មការវត្ត ព្រមទាំងពុទ្ធបរិស័ទ ស្ថិតក្នុងក្រុងសៀមរាប បាននាំយកអំណោយជាគ្រឿងឧបភោគបរិភោគ ចែកជូនដល់គ្រួសារចំនួន ២៦គ្រួសារ រស់នៅក្នុងសង្កាត់សាលាកំរើក ក្រុងសៀមរាប ដែលកំពុងជួបការលំបាក និងមានជីវភាពទីទ័លក្រ។
មានសង្ឃដីកានាពេលនោះ ព្រះតេជគុណ ឡាច ចន្ថា បញ្ជាក់ថា ទេយ្យវត្ថុគ្រឿងឧបភោគបរិភោគទាំងអស់នេះ គឺបានមកពីញាតិញោមពុទ្ធបរិស័ទជិតឆ្ងាយ ដែលមានសទ្ធាជ្រះថ្លាចំពោះព្រះសង្ឃគង់នៅក្នុងទីអារាម។ ដូច្នេះ ទេយ្យវត្ថុទាំងនេះ ក៏នឹងជួយសម្រួលទៅដល់ញាតិញោមដទៃទៀត ដែលកំពុងជួបការលំបាក ខ្វះខាត ក៏ដូចជាការជួយគ្នាទៅវិញទៅមកនៅក្នុងសង្គម។ ព្រះតេជគុណ បន្តថា កន្លងមក ព្រះសង្ឃ និងគណ:កម្មការវត្តដំណាក់ ព្រមទាំងវត្តនានាក្នុងក្រុងសៀមរាប តែងតែបានចូលរួមនាំយកទេយ្យវត្ថុ ទៅចែកជូនដល់ប្រជាពលរដ្ឋ ដែលកំពុងខ្វះខាតនៅតាមមូលដ្ឋានជារឿយៗ។
លោក សាម ឡន ចៅសង្កាត់សាលាកំរើក បានអរព្រះគុណដល់ព្រះគ្រូចៅអធិការវត្តដំណាក់ ដែលមានទឹកព្រះទ័យជ្រះថ្លាចួលរួមលើការងារមនុស្សធម៌នានាក្នុងសង្កាត់ ដែលនេះជាសកម្មភាពចែករំលែកដ៏សប្បុរស និងជាគំរូដល់ប្រជាពលរដ្ឋក្នងសង្គម ធ្វើការចែករំលែកដល់អ្នកមានជីវភាពខ្វះខាត ដើម្បីជួយឱ្យសង្គមជាតិមានការរីកចម្រើនទៅមុខទាំងវិស័យពុទ្ធចក្រ និងអាណាចក្រ។
សូមជម្រាបថា អំណោយជាគ្រឿងឧបភោគបរិភោគដែលគ្រួសារនីមួយៗ ទទួលបានរួមមាន៖ អង្ករ ៥០គីឡូក្រាម ទឹកត្រី១យួរ ទឹកស៊ីអ៊ីវ១យួរ ត្រីខ១យួរ អំបិល១គីឡូក្រាម ស្កស១គីឡូក្រាម មី១កេស ទឹកបរិសុទ្ធ១កេស សម្ភារ:ផ្ទះបាយមួយចំនួន និងថវិកា ១០ម៉ឺនរៀល ៕
អត្ថបទ និងរូបភាព: លោក ស៊ាន សុផាត
កែសម្រួល: លោក សេង ផល្លី
